2 Reyes 18 - Mam Huehuetenango New Ortography

Tej tkawin Ezequías tuj Judá 2 Crónicas 29.1-2

1Otoq b'ant ox ab'q'i ttzyetlen tkawin Oseas aju tky'ajal Ela, aju rey kye aj Israel, tej ttzyet tkawin Ezequías aju tky'ajal Acaz, aju rey te Judá.

2Toktoq Ezequías twi' 25 ab'q'i tej ttzyet tkawin ex o kawin 29 ab'q'i tuj Jerusalén. Aju ttxu' Ezequías Abi tb'i ex tme'jel Zacarías.

3B'a'n e ela qe tb'inchb'en Ezequías tuj twitz Qman, ik tza'nx tkyaqil tb'inchb'en David aju qtzan t-xe'chel.

4E b'aj tq'uchin Ezequías qe ja in che ajb'en te kyk'ulb'il xjal kywi' qe witz, e b'aj tb'uchin qe ab'j nno'k kydiosin xjal, e b'aj tpa'n qe tilb'ilal xu'j dios Asera, ex b'aj tpiẍun aju tilb'ilal lob'aj q'an k'uxb'il, aju otoq kub' tb'incha'n Moisés, tu'nju kukxtoq tkub' kypatun aj Israel storak twitz, ex otoq tz'ok kyq'o'n tb'i Nehustán.

5Ok qe'xix tk'u'j Ezequías ti'j Qman aju Kydios aj Israel. Kyxol kykyaqil qe rey te Judá, minti' jun o pon ik tza'n te Ezequías, mi tej na'nxtoq tok te rey ex mi te tib'ajxi.

6Ok lpe'xix ti'j Qman ex minti' el tpa'n tib' ti'j, noq o'kx e japun qe tmandamyent tu'n, aqeju e tzaj tq'o'n Qman te Moisés.

7Kyja'tzun o ten Qman tuk'il, ex tkyaqil aju in tb'incha'ntoq puro b'a'n e'la te te.

Jaw ti'n tib' Ezequías ti'j rey te Asiria ex minti' okx tq'on tib' tjaq' tkawb'il.

8Ax ikx kub' kyi'j aj Filisteo tu'n; pon tuj tnam Gaza ex pon b'aj max tuj tkyaqil tmojonil, tzajx jatum ate' qe ja ma' kywa'l, jatum in che okx ten qe soldad xq'uqil tnam, ex pon b'aj max jatum ate' qe tnam tok muro kyi'j.

Tej tkub' ti'j tnam Samaria

9Tej otoq b'ant kyaje ab'q'i ttzyetlen tkawin Ezequías tuj Judá, ex tuj twuqin ab'q'i ttzyetlen tkawin Oseas aju tky'ajal Ela kyib'aj aj Israel, ul Salmanasar aju rey te Asiria, b'aj kytxolb'an kyib' qe t-soldad ti'jele tnam Samaria ex e ok tzoqpaj ti'j.

10Tuj toxin ab'q'i kub' ti'j tu'n. Atzun tqaqin ab'q'i toklen Ezequías te rey tuj Judá, ex ya otoq b'ant b'elaj ab'q'i toklen Oseas te rey kye aj Israel, tej tkub' ti'j tnam Samaria kyu'n aj Asiria.

11Aju rey kye aj Asiria e je'x ti'n qe aj Israel tu'n kypon tuj tnam Asiria, ex e kub' tq'o'n jun k'loj tuj tnam Halah, ex juntl k'loj niqayin ttzi nima Habor tuj tx'otx' Gozán, atzun juntl k'loj e kub' tq'o'n kyuj qe tnam kye aj Media.

12O b'aj jlu ikju, tu'nju minti' e niman te Qman aju Kydios, noq o'kx e ik' tib'aj ju yol kyaj b'ant ti'j tu'n kyuk'il, ex minti' xi kyb'i'n tkyaqilju o tma Moisés kye aju tmajen Qman, ex minti' e ximan ti'j tu'n tjapun kyu'n.

Pon Senaquerib q'ojlel kyi'j aj Judá 2 Crónicas 32.1-19; Isaías 36.1-22

13Tuj tkyajlajin ab'q'i toklen Ezequías te rey tuj Judá, ok tzoqpaj Senaquerib aju rey te Asiria kyi'j kykyaqil tnam tok muro kyi'j tuj Judá, ex kub' kyi'j tu'n.

14Xitzun t-sama'n Ezequías jun t-sanjel tuk'il rey kye aj Asiria, ex atzun ta'toq tuj tnam Laquis, ex atzun yol lu tu'n t-xi tma'n t-sanjel: Ma b'ant jun mya b'a'n wu'ne. Texa tuj ntanmiye ex jaku txi nchjo'ne tkyaqil aju ktzajel tqanina weye, chi t-sanjel.

Atzunte rey te Asiria xi tqanin te Ezequías aju rey te Judá, tu'n ttzaj tq'o'n kab' syent quintal saq pwaq te ex winqin quintal q'an pwaq.

15Tu'ntzun jlu xi tq'o'n Ezequías tkyaqil saq pwaq te, aju tokx tuj tja Qman, tuk'ix q'inumab'l tokx tuj tja rey.

16Tujx tq'ijlalil lu el ti'n Ezequías q'an pwaq ti'j tlamel tja Qman ex kyi'j qe tmarkil, aju tu'nx otoq tz'ok tlo'tzin, ex xi tq'o'n te rey kye aj Asiria.

17Te tib'ajxi jlu, e je'x t-sama'n rey kye aj Asiria ox xjal ma' kyoklen ex nejenel qe kye soldad, kyuk'ix nimku soldad, tu'n kypon tuk'il rey Ezequías. Kub'tzun b'e kyu'n tuj tnam Laquis tu'n kypon tuj Jerusalén, ex tu'n kyok tzoqpaj ti'j. Tejtzun kypon tuj Jerusalén e kub' ten ttxlaj tb'eyil a' in pon tuj chemb'il te, tjax te jawni, ttzi b'e nne'x tuj tkojb'il Tx'jol ti'j Xb'alun.

18Txkettzun rey kyu'n, ex atzun qe jlu e etz tu'n kyyolin kyuk'il qe aj Asiria: Eliacim, aju mayordom tuj tja rey, aju tky'ajal Hilcías, tuk'ix Sebna, aju aj tz'ib'al te rey, ex tuk'ix Joa, aju tky'ajal Asaf, aju mas ma' toklen tok ttxlaj rey.

19Aju xjal ma' toklen ttxlaj rey te Asiria tzaj tma'n kye:

—Kyq'manxe te Ezequías aju tqanil lu, aju ma tzaj tma'n nintz rey, aju rey kye aj Asiria: ¿Al i'j nno'k qe' tk'u'ja?

20Chitzuna in tma'na: At nnab'le ex at wipune tu'n nq'ojine, chiya, ex noq tu'n ttzi'ya in tma'na jlu. ¿Al i'j ma tz'ok qe' tk'u'ja tu'nju ma jaw ti'n tib'a tu'n tq'ojina wi'je?

21Tuj nwitze a nno'k qe' tk'u'ja ti'j onb'il tu'n Egipto. Ex aju tnam Egipto ik tten ik tza'n jun ajlaj toqnaj, ex ok ttzaj qtzyu'n tu'n tajb'en te qky'aqo'ch, qa ma txi qq'o'n qalil tib'aj in kub' toqj, ex in xi tz'upl tuj qq'ab'. Iktzun tten Faraón aju rey te Egipto kye kykyaqil xjal nno'k qe' kyk'u'j ti'j.

22Ex qa ma kymaye weye: Qeye, atzun q'uql qk'u'je ti'j Qmane aju Qdiose, qa che chiye, ex, ¿myapetzun o che b'aj tq'uchin Ezequías qe lugar te k'ulb'il kyuk'ix qe altar teju Dios lu, ex o tma kye aj Judá ex kye aj Jerusalén tu'n kyk'ulun o'kx twitz altar tuj Jerusalén?

23Kyb'inchame ti'j jun kyyole tuk'il npatrone aju rey te Asiria: Jaku txi nq'o'ne kab'e mil chej teya, qa jaku che knet xjal tu'na tu'n kychejin kyib'aj.

24B'alpelo mlay tz'el oq jun nejenel kye soldad kye aj Asiria tu'na, aju mas ch'in toklen, ¿ex che knetelpetzun qe chej tuj Egipto tu'na, kyuk'ix qe xjal b'a'n che chejin?

25¿Ex chipetzuna qa noq tu'n wexe wajb'ile ma chin tzaje tzalu tu'n wok tzoqpaje ti'j tnam lu tu'n tkub' nxitune, ex qa minti' ma txi nqanine te Qman? Ate Qman ma tzaj q'mante weye tu'n wok tzoqpaje ti'j tnam lu ex tu'n tkub' nxitune tnam, chitzun nintz rey, chi xjal.

26Xitzun kytzaq'we'n Eliacim, Sebna ex Joa te xjal ma' toklen ttxlaj rey te Asiria:

—B'inchama xtalb'il, yolina quk'ile tuj yol Arameo, ex atzunju nne'l qnik'e ti'j. Mi'n tzaj yolina quk'ile tuj yol Hebreo, ex kykyaqil xjal kyjax twi muro in che b'in ti'j.

27Atzunte xjal ma' toklen ttxlaj rey te Asiria xi tma'n:

—Baqa tuk'il kypatrone, ex baqa kyuk'ile ẍin tzaj sama'ne q'malte jlu tu'n rey kye aj Asiria; kyelpe kye xjal, aqeju ate'jx twi muro, ex aqe jlu ikx che telb'a ik tza'nx che telb'a kyeye, kxel kywa'n kytxa' ex kxel kyk'a'n kytz'a'l.

28Kub'tzun we' ju xjal ma' toklen, ex jaw tq'ajq'ajel twi' kyuw wen tuj yol Hebreo ex tma:

—Kyb'intze aju in tma'n nintz rey, aju rey te Asiria:

29Mi'n txi kyq'on kyib'e tu'n kykub' sb'u'ne tu'n Ezequías; mlay che klete tu'n tuj nq'ab'e.

30Qa taj Ezequías tu'n tkub' ti'j kynab'le tu'n, ex qa ma tma kyeye tu'n tok qe' kyk'u'je ti'j Kydiose, ex qa chi: Ax tok ate Qman Dios kkolol qi'j ex mlay taq' amb'il tu'n tkub' ti'j tnam lu tu'n tipumal rey te Asiria, qa chi,

31mi'n txi kyb'i'ne tyol. Ma chin tzaj lajo'ne tu'n rey te Asiria q'malte kyeye tu'n mi'n ttentl q'oj qxol, ex tu'n taj kyq'on kyib'e tuk'il, ex teyle junjun kyeye jaku nik'b'en ti'j twitz t-uva ex ti'j twitz t-higo, ex jaku k'an a' tujx tex t-xoch.

32Te tib'ajxitzun che xel q'i'ne tu'n tuj jun tnam ik tza'nx ju kytanmiye, aju tnam lu at triw tuj ex at tqan uva, jaku knet pan te kywaye ex ta'l twitz uva te kyk'a'ye, ex tuj tnam lu at aseyt nne'l ti'j twitz tze' olivo, ex at ta'l kab'. Jaku che anq'ine b'a'n, ex mlay che kyime, ex mi'n txi kyb'i'ne tyol Ezequías, porke in che kub' sb'u'ne tu'n ok in tma'n kyeye qa che kletele tu'n Kydiose.

33Baqa o che klet txqantl tnam kyu'n qe kydios tuj tq'ab' rey te Asiria.

34¿Jatum ate' qe dios te tnam Hamat ja'lo, ex qe dios te tnam Arfad? ex ¿jatum ate' qe dios te tnam Sefarvaim, qe dios te tnam Hena, ex qe dios te tnam Iva? ¿Opetzun klet tnam Samaria kyu'n tuj tq'ab' rey te Asiria?

35¿Alkyetzun kyxol kykyaqil qe dios kye tnam lu ma che klet qe tnam kyu'n tuj tq'ab' rey te Asiria? ¿Tza'ntzun tten in kub' kyximane qa jaku klet tnam Jerusalén tu'n Kydiose? Chi xjal ma' toklen, b'aj tma'n.

36Qe xjal minti' e q'ajt, ex mi jun yol xi kytzaq'we'n, tu'nju otoq txi q'ma'n kye tu'n rey Ezequías tu'n mi'n t-xi kytzaq'we'n jun yol.

37Tzajtzun tb'is Eliacim aju mayordom tuj tja rey, tuk'ix Sebna aju aj tz'ib'al te rey, ex tuk'ix Joa aju xjal ma' toklen tok ttxlaj rey, el kysb'it'un kyxb'alun kyi'j ex e je'x q'malte te Ezequías tkyaqil yol otoq tma xjal ma' toklen ttxlaj rey te Asiria.