Isaías 5 - Mam Huehuetenango New Ortography

Aju tqan uva jun techal kyi'j aj Judá

1Kxel nb'itzane jun b'itz te wamiwoye, in yolin ti'j tqan uva etzan tu'n. Awa'ntoq tqan uva tu'n wamiwoye tuj jun tx'otx' tb'anilxix tok tk'u'j witz.

2B'aj tq'u'n twitz tx'otx', b'aj tchmo'n qe ab'j ex ku'x tawa'n tq'ab' awal tb'anilxix te iyaj. T-xol tqan awal lu jaw tb'incha'n jun ja ma' twa'l te kwentb'il te, ex b'aj tb'incha'n jun lugar jatum tu'n tel patz'ut ta'l twitz uva. Ximantoq tu'n wamiwoye tu'n ttzaj tq'o'n tqan uva twitz chi'xix, ex aju twitz tzaj tq'o'n, puro tx'am.

3Atzun ja'lo in tma'n wamiwoye: Aqeye xjal najl tuj tnam Jerusalén kyuk'ix qe aj Judá, kymantze alkye at til. ¿Apeju tqan uva ex qa aqine?

4¿Atpe juntl ti'xti minti' ma b'ant wu'ne ti'j tqan uva etzan wu'ne? Ximantoq wu'ne tu'n ttzaj tq'o'n twitz chi'xix. ¿Tiqu'ntzun puro tx'am twitz tzaj tq'o'n?

5Atzun ja'lo kxel nma'ne kyeye alkye kb'antel wu'ne ti'j tqan uva etzan wu'ne: K'elel wi'ne aju pe'n tok ti'jele tu'n tb'aj naj; kb'el nxitune ju tapya tok ti'jele tu'n tb'aj wab'an tqan uva;

6ex k'okel nq'o'ne te jun tx'otx' minti' in tzaj awal tuj. Mi'n tz'el q'it tq'ab' ex mi'n tz'el ju'lit ti'j, ktzajel ch'iy nim ch'i'x k'ul tjaq' ex txqantl k'ul in naj awal tu'n. Kxel nma'ne te muj tu'n mi'n ttzaj tq'o'n jb'al tib'aj, chi wamiwoye.

7Aju tqan uva te Qman aju Tajaw Tkyaqil, ex aju tawal k'ujla'nxix tu'n, atzun qe aj Israel ex qe aj Judá. Ximantoq tu'n Qman tu'n tjapun tley kyu'n, ex ma che ok te b'yol xjal, ximantoq tu'n tu'n kyb'inchante aju tz'aqlxix, ex noq in che sch'in xjal tu'nju yajb'il kye.

Aju xob'tzab'l ktzajel kyib'aj qe b'inchal mya b'a'n

8Ay b'ek'b'il kywitze, aqeye xjal noq laq'oj ja nno'k tilil kyu'ne, in b'aj kylaq'o'ne nim kojb'il, minti' in kyq'o'ne amb'il kye txqantl xjal ex in che kub' tene najal kyuj, mer ik tza'nku o'kx kyeye tajaw tx'otx'.

9Ma tzaj q'ma'n jun yol axix tok weye tu'n Qman aju Tajaw Tkyaqil, chi kyja': Nimku ja che b'el xitj ex maske nmaq qe ex tb'anilxix che ke'yin, mi jun knajal kyuj.

10Tuj 75 ech tqan uva, noq jun barril ta'l twitz uva ktzajel tq'o'n. Ok tku'x awat laj sak triw, noq o'kx jun sak twitz ktzajel tq'o'n.

11Ay b'ek'b'il kywitze, aqeye in che jaw we' primxix tu'n kyk'ane q'e'n, ex ok t-xi' aq'b'il, kukx meq'maj qeye tu'n vin.

12Ok nno'k jun nintz wa'n kyu'ne in pon kyi'ne tkyaqil txkaj chnab'; at arpa, kitar, tampor ex at tulix ex nimku vin; ex minti' in che ximane ti'j aju in tb'incha'n Qman, minti' nno'k kykwente ti'j tb'inchb'en.

13Kyja'tzun, tu'nju mib'an che b'in qe xjal etzan wu'ne, che xel q'i'n pres tuj juntl tnam najchaq. Kykyaqil xjal kyuk'ix qe nejenel kyxol che kymel tu'n we'yaj ex tu'n txqetle'n.

14Aju kynajb'il kyimni in xi tk'ab'in tuj ttzi' mer ik tza'n jun txkup te tjaq' k'ul, tu'n t-xi tb'alq'u'n qe tnam xjal kyuk'ix qe nejenel kye, aqeju in che sch'in tuj tzalajb'il ex tuj achb'il.

15Qe xjal ch'in kyoklen ex qeju ma' kyoklen, jumajx che kyjel ten minti' kyoklen, ex qeju in jaw kyniman kyib', b'i'x che kb'el mok'e' tu'n kych'ixwi.

16Ate Qman aju Tajaw Tkyaqil kjawil nimsa'n ok tkub' kycastiw xjal tu'n; aju Dios Xjan kxel tyek'un qa xjante ok tkub' kysentens xjal tu'n tuj tumelxix.

17Che b'el xitj qe tnam ex che wa'l qe ẍne'l ex qe chip kyxol qe ja otoq che kub' tilj.

18Ay b'ek'b'il kywitze aqeye xjal; tu'n nik'aj yol in tzaj kyi'ne mya b'a'n kyib'aje, k'alo'n qeye tu'n il ik tza'n jun boys jawolte carret k'alo'n tu'n pyal.

19In kyma'ne kyja': E tb'ant naj tu'n Dios aju taj tu'n tb'ant tu'n, tu'ntzun tqile; xjante Dios aju Kydios aj Israel, b'a'n tu'n tjapun naj tu'n aju ma b'aj t-ximan, tu'ntzun tel qnik'e ti'j, che chiye.

20Ay b'ek'b'il kywitze aqeye xjal nno'k kyq'o'ne te b'a'n aju mya b'a'n, ex nno'k kyq'o'ne te mya b'a'n aju b'a'n, nno'k kyq'o'ne spik'un te qlolj, ex nno'k kyq'o'ne qlolj te spik'un; nno'k kyq'o'ne aju at tk'ayil te chi', ex aju chi' nno'k kyq'o'ne te k'a.

21Ay b'ek'b'il kywitze aqeye xjal nno'k kyq'on kyib'e at kynab'le ex nno'k kyq'on kyib'e sek' kynab'le.

22Ay b'ek'b'il kywitze aqeye xjal jawni che k'ane vin ex mi a'l jun jaku pon ik tza'n kyeye tu'n tb'aj smet q'e'n tuk'il tk'ok'jal.

23Noq tu'n pwaq in tzaj q'o'n kyeye nno'k kyq'o'ne te minti' til aju xjal at til, ex minti' in xi kyb'incha'ne ti'j ju xjal minti' til.

24Kyja'tzun, ik tza'n in b'aj tz'e'y ch'im tu'n q'aq' ex in tz'e'y t-xaq tze' tzqij tu'n tq'aq'al, ax ikxtzun kyeye che najele, ik tza'n in naj jun tze' in ku'x q'ay tlok' ex in che'x iqan t-xmakal tu'n kyq'iq' ik tza'n quq. Porke ma tz'el kyik'une aju ley ex ju yol tzaj tq'o'n Qman aju Tajaw Tkyaqil, aju Dios Xjan kye aj Israel.

25Kyja'tzun ma tzaj tq'oj Qman kyi'j qe xjal etzan tu'n ex ma jaw ti'n tq'ab' tu'n tkub' tq'o'n kycastiw. Ma che tzaj lu'lun qe witz, ma che kyaj pale' kyximlal kyimni tuj cay ik tza'n tz'is. Maske ikju, na'nx tchewix tq'oj Qman kyi'j ex kukx tjaw ti'n tq'ab' tu'n tkub' kycastiw.

26Kjawil tq'o'n Qman jun bander te txokb'il kyi'j qe nasyon ate' najchaq, ex kxel ẍut'in tu'n ttzaj ttxko'n aju tnam najchaq ta'. Lu qe che ul naj ex in che ojqelan wen.

27Mi a'l jun kye jaku sikt, mi a'l jun jaku jaw tolj, mi a'l jun ktal, mi a'l jun ktzajel twatl, mi a'l jun ktel mya qitz'un k'alb'il tk'u'j, mi a'l jun ktzaqjel taq'al t-xajab'.

28Qe kyplech puro tz'u'p kywi' ex kykyaqil ma tzaj kyjawo'n taq'al kyxob'l plech. Kyuwxix qe t-xpak'al tqan kychej mer ik tza'n ab'j ex qe tqan kycarwaj mer ik tza'n xkyaqinpaẍ.

29Aju tq'ajq'ajel kywi', mer ik tza'n tq'ajq'ajel twi' jun b'alun ex ik tza'n tq'ajq'ajel twi' jun tal tman b'alun ok tjaw tzanun; in che jaw tzanun ok ttzyet kykanb', in xi kyi'n ex mi a'l jun jaku tz'el q'inte kye.

30Ok tpon aju q'ij b'animaj ti'j, kjawil julun aju nasyon lu kyi'j qe aj Israel, ik tza'n in jululun mar; ex qa at jun ma txi tke'yin tx'otx', ok tila' puro qloljxix tkyaqil ex b'isb'ajilxix, ex k'okel qlolj twitz kya'j tu'n q'eq muj.