Proverbios 23 - Mam Huehuetenango New Ortography

-6-

1Qa ma txkonjtza tu'n jun xjal ma' toklen tu'n t-xi'ya wa'l tuk'il, ximana ti'j alkyeju xjal tkub' twitza.

2Maske nne'l tk'u'ja wen, pero mi'n txi' nim tu'na;

3mi'n pon tk'u'ja kyi'j qe tchi' tb'anilxix, ex jaku kub' sb'u'na tu'n.

-7-

4Mi'n b'aj t-siksan tib'a tu'n toka te q'inun; kolinxa tu'n t-ximana ti'j jlu.

5Qa ma tz'ok tq'o'n tkwenta ti'j q'inumab'l, k'elel tnik'a ti'j qa mya nim in ten, porke jurat kb'el naj ik tza'n jun t'iw jurat nnik' lipan ex najchaq in pon, mer ik tza'n otoq jlet t-xik' q'inumab'l.

-8-

6Mi'n kub' qe'ya wa'l ti'j tmes jun xjal xk'a, ex mi'n pon tk'u'ja ti'j tchi' puro tb'anil,

7porke tok tkwent ti'j nik'pun kb'ajel tu'na ex in tma'n: Wa'na ex k'ana chi, ex noq tten tu'n,

8ex te tib'ajxi kjawitz t-xa'wina aju otoq txi twa'na, ex noqx gan otoq txi tq'o'na chjonte te.

-9-

9Mi'n txi tma'na jun ti'xti teju xjal minti' tnab'l, porke noq k'okel ten xmayil kyi'j qe tyola at tnab'l.

-10-

10Mi'n b'aj tch'expu'na tmojonil tx'otx' kub' q'o'n ojtxi, ex mi'n tz'el ti'na kytx'otx' qe k'wa'l o che kyim kyman,

11tu'nju at jun kye kolil kyi'j nimxix tipumal, ex k'okel tzoqpaj ti'ja tu'n tkolin kyi'j.

-11-

12Xnaq'tzam tib'a kyi'j qe xnaq'tzb'il, ex q'onx twi'ya kyi'j qe yol at kynab'l.

-12-

13Mi'n txi tkolina tu'n kyxi tkawina qe k'wa'l, ex mlay che naj ok t-xi tjato'na kyasyal;

14qa ma che'x tkawina, che kletel tu'na te kamik.

-13-

15Nk'wa'l, qa ma tz'oka at tnab'la, chin tzalajele ti'ja;

16ex nimxix chin tzalajele ok nb'inteye qa in yolina tuj tumel ti'j jun ti'xti.

-14-

17Mi'n tzaj lo'ch tk'u'ja kyi'j qe xjal aj il; noq o'kx kukx nimana te Qman;

18kyja'tzun b'a'n k'elel te teya, ex aju in ayona ti'j mlayx kub' xitun.

-15-

19B'intza aya nk'wa'l tu'ntzun tok tnab'la, ex tz'ok tililx tu'na tu'n tb'eta tuj b'e b'a'n.

20Mi'n tz'ok tuk'in tib'a kyuk'il qe xjal k'al q'e'n ex mi kyuk'il qe xjal jawni che wa'n,

21porke qe k'al q'e'n ex qe jawni che wa'n che okel te meb'a, ex qe ky'aj puro ttx'aqan xb'alun k'okel kyi'j.

-16-

22B'i'nxa tyol tmana aju o k'wa'lin teya, ex mi'n tz'el tik'una ttxu'ya ok ttijin.

23Laq'oma yol axix tok, ju ojtzqib'l ex ju xnaq'tzb'il, tuk'ix ju nab'l, ex mi'n che'x tk'ayina.

24Nim in tzalaj jun mamb'aj ti'j tk'wa'l qa b'a'n ex qa at tnab'l;

25kuchiwt che tzalaj tmana ex ttxu'ya ti'ja, ex kuchiwt tzalaj aju alin teya.

-17-

26Nk'wa'l, b'i'nxa qe nyole, ex kano'mila aju in b'ant wu'ne;

27porke aju xu'j aj pajil ex ju xu'j jawni twitz kyuk'il xinaq, ik kyten ik tza'n jun jul ma' t-xe' ex ch'in tuj;

28ex ik kyten ik tza'n jun eleq', in che kub' ten xq'uqil kyi'j qe xinaq, ex nimku xinaq in che naj kyu'n.

-18-

29¿Alkye in ayayan tu'n ta'w? ¿Alkye in jyon q'oj ex in oq'? ¿Alkye b'i'x in tzaj sutin tuj twitz?

30A aju xjal minti' in kyaj tkolin tu'n tk'an vin ex in xi tk'a'n nim txkaj vin smo'n tuk'il juntl.

31Mi'n txi tke'yina k'ab'j vin puro kyaq ke'yin twitz ex in qoptz'aj tuj tkub'il, ex mya kyuw in ku'x kyu'n xjal.

32Ex te tib'ajxi, ik tten ik tza'n nno'k tx'a'n jun xjal tu'n lob'aj, in tzaj nim ta'w.

33Noq tichaq k'okel yek'un tuj twitza tu'n, ex minti' ttxolil t-ximb'etza ex tyola;

34ok tna'ya mer ik tza'n tjaxa twi' jun tze' tku'x tuj tmij barc ex in yukch tu'n kyq'iq' tuj tmij mar,

35ex ok tma'ya kyja': Ma chin ok b'ju'ne, ex minti' xnna'ye, ma chin b'aj asyaline, ex minti' xnna'ye ta'w; ex ok tul nnab'le, chin xe'le jyol txqantl vin.