Levítico 10 - Mam Huehuetenango New Ortography

Aju il tb'incha Nadab ex Abiú

1Ate Nadab tuk'ix Abiú, aqeju tky'ajal Aarón, teyle junjun tzaj ti'n t-ẍla'k, ku'x kyq'o'n q'aq' tuj tuk'ix storak, ex kub' kyq'o'n junxitl q'aq' twitz Qman, aju minti' otoq tma Qman tu'n tkub' q'ot.

2Etztzun jukpaj jun q'aq' twitz Qman ex b'i'x e tz'e'y tu'n. Kyja'tzun tten e kyim twitz Qman.

3Xitzun tma'n Moisés te Aarón:

—Atzun jlu o yolin Qman ti'j tej tmante kyja':

Kxel nyek'un wib'e qa xjan qine kye qeju che pol laq'e' nwitze, ex kxel nyek'une wajwalile kye kykyaqil aj Israel, chi Qman.

Atzunte Aarón minti'tl o q'ajt.

4Tzajtzun txko'n Misael tuk'ix Elzafán tu'n Moisés, aqeju tky'ajal Uziel aju terman tman Aarón, ex xi tma'n kye:

—Kytzaje ex kyi'n exe kyximlal kyermaniye twitz tja Dios, ex kyi'nxe ti'jxi campament.

5E pontzun laq'e' ex e je'x kyi'n qe kyimni tuk'ix kyẍjo'w ti'jxi campament, ik tza'nx otoq tma Moisés.

Aju ilxix ti'j tu'n tb'ant kyu'n pal

6Xitzun tma'n Moisés te Aarón ex te Eleazar ex Itamar aqeju tky'ajal:

—Mi'n txi kychitpu'ne ttzmal kywi'ye ex mi'n tz'el kysb'it'une kyxb'alune kyi'je te jun techal kyb'ise, tu'ntzun mi'n kykyime ex tu'n mi'n ttzaj tq'oj Dios kyi'j tnam xjal. Atzun kye aj Israel, b'a'n tu'n kyb'isun kyi'j kab'e kyermaniye ma che kyim tu'n q'aq' ma tzaj t-sama'n Qman.

7Ax ikx mi'n che el laq'e'ye ttzi ja xb'alun te mojb'ab'l tib'il tu'ntzun mi'n kykyime, porke o che xjansete tu'n aseyt te Qman.

B'anttzun kyu'n ik tza'nx xi tma'n Moisés kye.

8Ax ikx tzaj yolin Qman tuk'il Aarón ex tma:

9Aya ex qe tky'ajala, ok kyokxe tuj ja xb'alun te mojb'ab'l tib'il, mi'n txi kyk'a'ne vin ex mi q'e'n, tu'ntzun mi'n kykyime; atzun jun ley jlu kyjel ten kyuk'ile te jumajx tu'n tajb'en kyeye, ex wiqinwiq tu'n tkyaj kyma'ne kye kyk'wa'le,

10tu'ntzun tel kynik'e ti'j alkye xjan ex alkye mya xjan, alkye saq ex alkye tz'il,

11ex tu'n tb'ant kyq'o'ne xnaq'tzb'il kye aj Israel ti'j tkyaqil ley xi nq'o'ne te Moisés, chi Qman.

12Ax ikx xi tma'n Moisés te Aarón, te Eleazar ex te Itamar, aqeju kab'e tky'ajal Aarón otoq che kyaj ten:

—Kyi'nxe aju oyaj ti'j twitz awal, aju ma kyaj ten kyi'j qe oyaj ma che kub' patit te Qman, ex ax kywa'nxe twitz altar, ex mi'n txi kyq'o'ne t-samel tuj tu'n tjaw mal tk'u'j, porke a jlu xjanxix.

13Kxel kywa'ne tuj jun lugar xjan, ex atzun jlu k'okel te teya ex kye qe tky'ajala ti'j oyaj patun in kub' te Qman. Atzun jlu ma tzaj q'ma'n weye.

14Aju ttzi t-xu'k alumaj in xi yukut twitz Qman, tuk'ix tkux in xi yek'ut te, b'a'n tu'n t-xi kychyo'ne tuj jun lugar saq, aya kyuk'ix qe tky'ajala ex qe tme'jela, ex atzun jlu k'ajb'el kyeye kyi'j qe chojb'il in xi kyq'o'n aj Israel te mojb'ab'l tib'il.

15Junx ktzajel q'it t-sebyil alumaj tu'n tkub' patit, ex tkux in xi yek'ut twitz Qman ex ttzi t-xu'k in xi yukut twitz. A jlu teya k'ajb'el ex te kye qe tk'wa'la te jumajx, ik tza'nx o tzaj tma'n Qman.

16Xi tqanin Moisés ti'j tman chip aju otoq txi q'ot te chojb'il il, ex o tb'i qa otoq kub' patit. Tzajtzun tq'oj ti'j Eleazar ex ti'j Itamar, aqeju kab'e tky'ajal Aarón otoq che kyaj anq'in, ex xi tma'n kye:

17—¿Tiqu'n minti' ma txi kychyo'ne tuj jun lugar xjan aju chojb'il in xi q'ot te chojb'il il? A jlu xjanxix te, ex o tzaj tq'o'n Qman kyeye tu'ntzun tel kyi'ne aju kyil tnam xjal ex tu'n tnajset kyil kyu'ne twitz Qman.

18Ex tu'nju minti' ma txi kyi'ne chik' tuj tja Dios, iltoq ti'j tu'n t-xi kychyo'ne aju chojb'il lu tuj jun lugar xjan, ik tza'n xi nma'ne kyeye, chi Moisés.

19Atzunte Aarón xi ttzaq'we'n:

—B'intza, ja'lo ma txi kyq'o'n xjal chojb'il ti'j kyil tuk'ix kyoyaj patun in kub' te Qman. Ex ke'yintza aju ma b'aj wi'je, noqwit ma txi nchyo'ne ja'lo aju chojb'il ti'j il, ¿mawpelo tzalaj Qman ti'j jlu? Chi Aarón.

20Tejtzun tb'inte Moisés jlu, b'i'x tzaj chewix tk'u'j.