Génesis 50 - Mam Huehuetenango New Ortography

1Tzaj tchle'n José t-ximlal tman, in oq'toq ex el ttz'ub'an twitz.

2Xitzun tma'n kye q'anal aqeju in che ajb'entoq te, tu'n tb'aj kyb'incha'n t-ximlal tman tu'n mi'n tq'ay, ex o b'inchanjtz ikju.

3Xi ti'n 40 q'ij tu'n tb'aj b'inchet t-ximlal, tu'nju atzun tajlal q'ij in xi ti'ntoq tu'n tb'aj b'inchet t-ximlal jun kyimni. O che oq' aj Egipto ti'j Israel 70 q'ij.

4Tejtzun kyjapun b'aj qe q'ij te b'is, o yolin José kyuk'il aj sanjelal ate'toq tuj tja Faraón ex xi tma'n kye kyja':

—Qa b'a'n ma chin ele tuj kywitze, kyb'inchame xtalb'il tu'n t-xi kyma'ne te Faraón kyja':

5Tej ch'ixtoq tkyim nmane, tzaj tma'n weye tu'n t-xi nma'ne jun yol axix tok twitz Dios te, ex tma tu'n tokx nmaqu'ne tuj toy' pik aju tu'nx o b'ant, atzun ta' tuj tx'otx' Canaán. Kyja'tzun in xi nqanine xtalb'il te Faraón, tu'n ttzaj tq'o'n amb'il weye tu'n nxi'ye maqulte qtzan nmane, ex chin ul meltz'aje, che chikuye te Faraón, chi José.

6Xitzun ttzaq'we'n Faraón:

—Txi'ya maqulte qtzan tmana ik tza'nx o tma teya, che chikuye te José, chi Faraón.

7Xi'tzun José maqulte qtzan tman, ax ikx e je'x qe aj sanjelal tuk'il, aqeju attoq kyoklen tuj tja Faraón ex tuj tx'otx' Egipto.

8Ax ikx e je'x qeju ate'toq tuj tja Jacob, kyuk'ix qeju ate'toq tuj tja José ex qe terman. O'kx qe kyk'wa'l kyuk'ix qe kyalun e kyaj ten tuj tx'otx' Gosén.

9Ax ikx e je'x carwaj ex xjal tib'aj chej tuk'il. Kyja'tzun nim xjal e je'x tuk'il.

10Tejtzun kypon tuj tpe'n Atad, jatum nne'ltoq ttxk'omil triw, aju tkub'toq tuj tjawitz q'ij jlajxi nima Jordán, atzun kub' kychmon kyib' ti'j kyimni ex e kub' ten oq'el tuk'il nimxix b'is. Atzun o b'isun José, ex o tz'oq' ti'j qtzan tman wuq q'ij.

11Tejtzun kylonte qe aj Canaán, aqeju najltoq tuj tx'otx' lu, kyma kyja': Nim kyb'is aj Egipto ti'j jun kykyimni, che chi. Tu'ntzun jlu, Abel-mizraim tb'i lugar lu ok q'o'n. Aju lugar lu tkub' tuj tjawitz q'ij jlajxi nima Jordán.

12Kyb'incha qe tky'ajal Jacob ik tza'nx o tma kye.

13Atzun xi kyi'n tuj tx'otx' Canaán, ex atzun okx kymaqu'n tuj toy' pik tuj kojb'il Macpela tb'i, tuj tx'otx' otoq tz'el tlaq'o'n Abraham te Efrón aju aj Heteo, tu'n tajb'en te muqb'il. Aju tx'otx' ex aju toy' pik lu, atzun ta' twitz Mamre tuj tjawitz q'ij.

14Tej tokx tmaqu'n José qtzan tman, aj meltz'aj tuj Egipto kyuk'ix qe terman ex kykyaqil qe xjal otoq che'x tuk'il.

Qe mankb'il q'ij te José

15Tej kylonte qe terman José otoq kyim kyman, kyma kyja': Oklo qo elel tik'un José, ex oklo ktzajel tq'o'n mya b'a'n te t-xel ju mya b'a'n qb'incha ti'j ojtxi.

16Xitzun kyq'o'n tqanil te José, che chi kyja': Tej na'nxtoq tkyim qtzan qman kyaj tma'n qeye

17tu'n t-xi qma'ne teya kyja': B'inchama xtalb'il, najsama aju mya b'a'n ex aju il o b'inchanjtz ti'ja kyu'n qe ttzika. Ax tok mya b'a'n o kyb'incha ti'ja. Tu'ntzun jlu, in qo kub'sane twitza tu'n tkub' tnajsa'na qile, aqo'ye tmajen Dios aju Tdios qman, che chi.

Ok ten José oq'el akux in che yolintoq qe sanjel.

18Ax ikx kywitzelku qe terman José e pon tuk'il, e kub' mok'e' twitz, pon takl tib'aj kywitz max twitz tx'otx' ex xi kyma'n te kyja':

—Lu qo'ye lu, tmajena qo'ye, che chi.

19Xitzun tma'n José kye kyja':

—Mi'n che xob'e, baqa Dios qine.

20Kub' kyximane tu'n tb'ant mya b'a'n wi'je, atzunte Dios o tz'ok tq'o'n te b'a'n, tu'n tb'ant aju in qil ja'lo, tu'n kyklet nimku xjal tu'n mi'n kykyim.

21Tu'ntzun jlu mi'n che xob'e. Che xel nk'a'chine kyuk'ix qe kyk'wa'le, chi José.

Kyja'tzun q'uqb'anjtz kyk'u'j tu'n José, tu'nju o yolin kyuk'il tuk'il nimxix tk'ujlalil.

22Najantltzun José tuj Egipto junx kyuk'il qe tiyjil tman. O anq'in José 110 ab'q'i,

23ex o til qe tal tchman Efraín aju tky'ajal. Ax ikx qe tk'wa'l Maquir aju tky'ajal Manasés e kub' q'o'n kywi tqan José tej kyul itz'j.

Kyim José

24Xitzun tma'n José kye terman kyja': Weye chin kymele, atzunte Dios k'onilte kyeye ex che elex q'i'ne tu'n tuj tx'otx' lu, tu'ntzun kypone tuj tx'otx' tzaj ttziyan te Abraham, te Isaac ex te Jacob, chi José.

25Xitzun tma'n José kye tu'n t-xi kyma'n jun yol axix tok twitz Dios ex tma kyja': Ax tok tzul Dios onilte kyeye. Oktzun tjapun jlu, b'ix txi kyi'ne nb'aqile, chi José.

26Kyimtzun José otoq japun twi' 110 ab'q'i. B'ajtzun b'incha'n t-ximlal tu'n mi'n tq'ay ex ku'x q'o'n tuj jun kax tuj Egipto.