Isaías 54 - Mam Huehuetenango New Ortography

Aju tk'ujlalil Dios minti' b'ajsb'il te

1Tjaw sch'ina tu'n tzalajb'il aya xu'j mib'an alina ex minti' jun tala o tzaj; tjaw b'itzana tu'n tzalajb'il aya b'ajx tzaj jun tala, porke chi Qman kyja': Aju xu'j o kyaj kolin tu'n tchmil, mas nim tal che ul itz'j twitz ju xu'j at tchmil.

2Nimsa'n el tuj tjaya xb'alun ex mi'n xob'a tu'n t-xi tlik'pu'na ju xb'alun tokxa tuj, nuqpinxa mas qe taq'al ex pajo'n ku'xa mas qe stak te tzuyb'il te,

3ex max kpol b'aja tuj tkyaqil lugar ti'jeleya; qe tiyjila kb'el kyi'j nimku nasyon kyu'n, ex che najal kyuj qe tnam minti' xjal kyuj ja'lo.

4Mi'n xob'a, mlay kub' tch'ixwiya ex mlay tz'ok ik'lena. K'ik'el tna'l tu'na aju tch'ixwiya tzaj tej matoq q'apojxa ex mlay tzaj tna'ntla aju tch'ixwiya kub' tej ttena te meb'a xu'j,

5porke aju b'inchante teya kjawil xu'jla'na tu'n, ex atzun tb'i jlu: Qman aju Tajaw Tkyaqil; aju kolpil teya atzun Dios Xjan kye aj Israel, ex atzun Dios tuj tkyaqil twitz tx'otx'.

6Ik ttena ik tza'n jun xu'j o kyaj kolin tu'n tchmil ky'itzqetoq toklen moje', ex at nim tb'is, ex ma txkonjtza juntl maj tu'n Dios ex in tma'n teya kyja':

7Noq ch'in tuj kyaj nkolina, ex tu'nju at nim nxtalb'ile, ktzajel wi'ne juntl maj tu'n tmoje'ya wuk'ile.

8Noq tu'nju in jaw kyaqpaje, o tz'el npa'n wib'e te jun rat ti'ja, ex tu'nju minti' b'ajsb'il te nk'ujlalile, ktzajel tz'e'y nk'u'je ti'ja, chi Qman aju Kolpil teya.

9Ik tza'n xi nma'ne jun nyole axix tok te Noé, tu'n mi'n tnaj juntl maj twitz tx'otx' tu'n a', ikxtzun kxel nma'ne jun nyole axix tok ja'lo, tu'n mi'n ttzaj juntl maj nq'oje ti'ja, ex tu'n mi'n wok tzoqpaje kyuw tu'n nyole ti'ja.

10Maske ch'expet kylugar qe nmaq witz ex maske che kub' xitj qe tal witz, aju nk'ujlalile ti'ja mlay ch'expet ex mlay ch'expet aju nyole kyaj b'ant ti'j kyuk'ile tu'n kytene tuj txub'txaj, chi Qman, aju at tk'u'j kyi'je.

Aju Ak'aj Jerusalén

11B'ek'b'il twitza tnam Jerusalén, ma b'aj yajla'na kyu'n xjal ik tza'n in naj jun tnam tu'n jun nintz kyq'iq', ex mi a'l jun ma q'uqb'ante tk'u'ja. Atzun ja'lo tb'anil ab'j azabache kyb'i che ajb'el te muro wu'ne ti'ja, ex ju t-simyentila kb'antel kyi'j qe tb'anil ab'j zafiro kyb'i.

12Qe tb'anil ab'j rubí kyb'i che ajb'el tu'n kyjaw b'inchet qe ja ma' kywa'l te kwentb'il tnam, qe tlamela che b'antel kyi'j qe tb'anil ab'j berilo kyb'i, ex aju muro k'okel ti'ja, ti'j tb'anil ab'j kjawil b'inchet.

13Kxel nq'o'ne xnaq'tzb'il kye xjal che najal tuja ex kykyaqil che tel tuj txub'txaj.

14K'okel nimxix tipuna ok tb'inchet aju tz'aqlxix tu'na; minti'tl yajb'il ti'ja, mlay xob'a, ex mlay tzaj juntl maj xob'ajil ti'ja.

15Qa at jun ma tz'ok tzoqpaj ti'ja, mya wu'ne sama'n jlu, ex kb'el ti'j tu'na aju k'okel tzoqpaj ti'ja.

16B'intza, aqine in b'inchante kye xjal tx'inol k'uxb'il nno'kx kyxupin q'aq' tu'n tjaw k'ant, ex in che b'ant tkyaqil txkaj ub'l kyu'n noq alkyex tajb'en; ax ikx ma nb'inchaye ju xjal in b'aj naj nimku tu'n, tu'n tb'aj t-xitun nimku;

17ex mi jun xjal jaku b'ant jun ub'l tu'n tu'n tnaja tu'n. B'i'x kmaqsetel kytzi' tu'na, aqeju in tzaj kyma'n qa at tila. Atzun jlu in xi nq'o'ne kye qeju in che ajb'en weye, ex aju kolb'il kye, wu'ne in xi nq'o'ne, chi Qman.