Levítico 9 - Mam Huehuetenango New Ortography

Tej ttzyet taq'nan Aarón te pal

1Tuj twajxaqin q'ij txkettzun Aarón tu'n Moisés kyuk'ix qe tky'ajal ex qe kytijil xjal kyxol aj Israel,

2ex xi tma'n te Aarón kyja': Q'intza jun tal tor te chojb'il il, tuk'ix jun tman ẍne'l tu'n t-xi q'ot te jun oyaj patun in kub', kykab'il alumaj lu minti' kypaltil, ex q'onxa qe te Qman.

3Ax ikx q'manxa kye aj Israel tu'n ttzaj kyi'n jun tman chip te chojb'il il, tuk'ix jun tal tor ex jun tal tman ẍne'l ma te jun ab'q'i qe ex minti' kypaltil, tu'ntzun kyxi q'ot te jun oyaj patun in kub',

4tuk'ix jun tor ex jun tman ẍne'l tu'ntzun kykub' b'yet twitz Qman te jun chojb'il te mojb'ab'l tib'il. Ax ikx il ti'j tu'n ttzaj kyi'n jun oyaj ti'j twitz awal, ch'in arin xyoq'amaj tuk'il aseyt, porke kb'el tyek'un tib' Qman kywitze ja'lo, chi Moisés, xi tma'n kye.

5Xitzun kyi'n aj Israel aju otoq txi tma'n Moisés kye; pon kyi'n max ttzi ja xb'alun te mojb'ab'l tib'il, ex kykyaqiltzun tnam xjal e pon laq'e' ex e kub' we' twitz Qman.

6Atzunte Moisés xi tma'n kye kyja': Atzun jlu ma tzaj tma'n Qman, kyb'inchame ex kb'el tyek'un tib' t-spik'umal Qman kywitze.

7Xi tma'n Moisés te Aarón: Laq'etza ti'j altar ex q'onxa chojb'il tila, tuk'ix ju alumaj kxel tq'o'na te chojb'il patun in kub' te najsb'il tila ex te najsb'il kyil aj Israel. Ax ikx q'onxa kyoyaj aj Israel te najsb'il kyil, ik tza'n o tma Qman.

8Pontzun laq'e' Aarón ti'j altar ex okx tqesin tjaq' tqul tal tor tu'n t-xi tq'o'n te chojb'il til.

9Atzun qe tky'ajal e pon laq'b'ante chik', ex ku'xtzun tq'o'n Aarón twi tal tq'ab' tuj chik' ex ok t-su'n kyi'j qe tkach altar, atzunju chik' kyaj ten ku'x tqo'n t-xe tqan altar.

10Kub'tzun tpatun Aarón tib'aj altar aju t-sebyil alumaj chojb'il il, kyuk'ix qe tchenaq' tuk'ix ju sebo toksa'n ti'j ttx'otx', ik tza'nx otoq tma Qman te Moisés.

11Atzunju tchib'jal tuk'ix ttz'umal kub' tpatun ti'jxi campament.

12Ax ikx okx tqesin Aarón tjaq' tqul alumaj te oyaj patun in kub', ex atzun qe tky'ajal e pon laq'b'ante chik' ex ok ttx'ito'n Aarón ti'jele tk'u'j altar.

13Xitzun kyi'n qe tky'ajal Aarón twi' alumaj patun in kub', tuk'ix ju tchib'jal otoq b'aj kypaẍu'n, ex kub' tpatun Aarón jlu tib'aj altar,

14e b'aj ttx'jo'n qe tuj tk'u'j, kyuk'ix qe tqan, ex e kub' tq'o'n tib'aj tchib'jal alumaj tib'aj altar ex kub' tpatun tkyaqil.

15Ax ikx xi tq'o'n Aarón kyoyaj aj Israel. Tzaj ti'n tman chip, aju tu'n t-xi q'ot te chojb'il kyil tnam xjal, okx tqesin tjaq' tqul ex xi tq'o'n te chojb'il il, ik tza'nx otoq tb'incha ti'j tal tor xi tq'o'n nej.

16Ax ikx xi tq'o'n alumaj patun in kub', ik tza'nx q'ma'maj.

17Ax ikx xi tq'o'n aju oyaj ti'j twitz awal; tzaj ti'n jun yub' arin ex kub' tpatun tib'aj altar; part ju oyaj in kub' patit te prim.

18Ax ikx okx tqesin Aarón tjaq' tqul tor ex tman ẍne'l, aju xi kyq'o'n aj Israel te jun chojb'il te mojb'ab'l tib'il. Atzun qe tky'ajal e pon laq'b'ante chik', atzun te ok ttx'ito'n chik' ti'jele tk'u'j altar.

19Ax ikx xi kyi'n t-sebyil tor, tuk'ix t-sebyil tman ẍne'l, tuk'ix tje', tuk'ix sebo toksa'n kyi'j qe tuj tk'u'j, kyuk'ix qe tchenaq' ex tuk'ix sebo toksa'n ti'j ttx'otx',

20ex kub'tzun kyq'o'n t-sebyil alumaj tib'aj ttzi t-xu'k. Atzunte Aarón kub' tpatun sebo tib'aj altar,

21atzun qeju ttzi t-xu'k ex qe tkux alumaj tuj tb'anq'ab', noq xi tyukun Aarón twitz Qman, ik tza'nx otoq tma Qman te Moisés.

22Xitzun tnuqpi'n tq'ab' Aarón kyib'aj aj Israel ex e kub' tky'iwla'n, ex t-xilenxi tq'o'n chojb'il ti'j il, tuk'ix oyaj patun in kub' ex chojb'il te mojb'ab'l tib'il, eltzun laq'e' ti'j altar.

23Okxtzun Moisés tuk'ix Aarón tuj ja xb'alun te mojb'ab'l tib'il, ex tej kyetz e ok ten ky'iwlalte kye aj Israel. Kub'tzun tyek'un tib' t-spik'umal Qman kywitz kykyaqil aj Israel;

24etztzun jukpaj jun q'aq' twitz Qman ex b'aj tz'e'y alumaj tu'n, aju attoq tkub'il patit kyuk'ix qe sebo kykub'sa'n tib'aj altar.

Tejtzun kylonte aj Israel jlu, e jaw sch'in kykyaqil tu'n tzalajb'il, e kub' ẍmeje' ex pon takl tib'aj kywitz max twitz tx'otx'.