Ezequiel 46 - Mam Huehuetenango New Ortography

Aju at tu'n tb'ant tu'n kawil kyuj ninq'ij

1Aqine Dios in xi nma'ne jlu: Aju tlamel tkub' tumlal tjawitz q'ij jatum tu'n qokx tuj tkab'in ttxa'n pe'n, klametel tuj enter qaq q'ij aq'untl, ex kjaqetel tuj q'ij te ojlab'l ex tuj q'ij ok ttzaj ke'yin ak'aj xjaw.

2K'okex kawil tuj tlamel te tkab'in ttxa'n pe'n ex kb'el we' ttxlaj tmarkil tlamel ja. Ex akuxtzun in kub' kypatun pal qe alumaj te chojb'il il, ex akux in xi kyq'o'n qe oyaj te mojb'ab'l tib'il, aqeju otoq che pon ti'n kawil, atzunte kawil kb'el ten k'ulul ttzi ja, ex te tib'ajxi jlu k'eletztzun. Ex mi'n lamet tlamel, max klametel okxi tex q'ij.

3Kyuj qe q'ij te ojlab'l ex tuj q'ij ok ttzaj ke'yin ak'aj xjaw, che b'el ten xjal k'ulul twitz Qman ax twitz tlamel lu.

4Qe alumaj che xel tq'o'n kawil tuj q'ij te ojlab'l tu'n kykub' patit te oyaj te Qman, atzun qe jlu: Qaq tal tman ẍne'l ex jun tman ẍne'l; kykyaqil qe jlu minti' ch'in kypaltil.

5Ti'j junjun tman ẍne'l kxel q'ot kyaje alm triw, atzun kyi'j qe tal tman ẍne'l noq nik'pun taj txi tq'o'n. Ax ikx ti'j kyaje alm triw kxel q'ot ox litro tuk'il mey aseyt.

6Tuj q'ij ok ttzaj ke'yin ak'aj xjaw kxel tq'o'n te oyaj, jun tor, qaq tal tman ẍne'l ex jun tman ẍne'l. Kykyaqil qe jlu minti' ch'in kypaltil.

7Ti'j junjun tor kxel tq'o'n kyaje alm triw, ex kyaje alm ti'j junjun tman ẍne'l, atzun kyi'j qe tal tman ẍne'l noq nik'pun taj txi tq'o'n. Ex ti'j kyaje alm triw kxel tq'o'n ox litro tuk' mey chib'j aseyt.

8Ok tokx ju kawil, k'okex tuj tal cuart mas ma' aju tkub' ttzi ja, ex ax k'eletz juntl maj.

9Ok kyokx qe xjal k'ulul twitz Qman tuj ninq'ij, il ti'j kb'antel kyu'n kyja': Aqeju che okex ttzi ja tkub' tuj tumlal tb'anq'ab' q'ij, che eletz ttzi ja tkub' tuj tumlal tnayaj q'ij, ex atzun qeju che okex ttzi ja tkub' tuj tumlal tnayaj q'ij che eletz ttzi ja tkub' tuj tumlal tb'anq'ab' q'ij. Mlay che ajtz meltz'aj ttzi ja jatum otoq che okx. Atzun che elex ttzi ja tkub' jlajxi ttxa'n pe'n.

10Aju kawil at tu'n tokx junx kyuk'il xjal ex junx tu'n kyetz.

11Ex tuj junjun ninq'ij kxel kyq'o'n kyaje alm triw ti'j jun tor, ex kyaje alm ti'j jun tman ẍne'l; ex kyi'j qe tal tman ẍne'l noq nik'pun kyaj txi kyq'o'n. Ti'j kyaje alm triw kxel q'ot ox litro tuk'il mey chib'j aseyt.

12Ok t-xi tq'o'n kawil jun oyaj te Qman, aju patun in kub', ex qa jun chojb'il te mojb'ab'l tib'il, kjaqetel tlamel twitz, aju tkub' tuj tjawitz q'ij, ex kxel tq'on toyaj aju patun in kub' tuk'ix ju chojb'il te mojb'ab'l tib'il. Ikx ktelb'a ik tza'nx in b'ant tuj q'ij te ojlab'l. Oktzun tetz, b'i'x klametel tlamel.

Aju oyaj in xi q'ot kykyaqil q'ij

13Tkyaqil prim te junjun q'ij kxel q'ot jun tal tman ẍne'l te jun ab'q'i ex minti' tpaltil, tu'ntzun tkub' patit te chojb'il twitz Qman.

14Ax ikx tkyaqil prim kxel q'ot kyaje libr arin te jun oyaj te Qman, ex jun litro chib'j aseyt tu'n tb'aj xyoq'it tuk'il arin. Aju costumr lu ilxix ti'j kukx tu'n tb'inchet te jumajx.

15Tkyaqil prim il ti'j tu'n t-xi q'ot tal tman ẍne'l te jun oyaj patun in kub' tuk'ix arin ex chib'j aseyt.

Aju ley ti'j ttx'otx' kawil

16Aqine Dios in xi nma'ne jlu: Qa ma txi tq'o'n kawil ch'in ttx'otx' te jun tky'ajal, aju tx'otx' lu b'i'x k'okel te tetzb'il tky'ajal.

17Ex qa ma txi tq'o'n kawil ch'in ttx'otx' te jun tmajen, o'kx k'ajb'el tu'n majen okxi tul kanun aju ab'q'i te tzoqpib'l, k'okeltzun juntl maj te tetzb'il kawil ex kyjel ten te kyetzb'il qe tky'ajal.

18Minti' toklen kawil tu'n tel ti'n ttx'otx' jun xjal. Ok t-xi tq'o'n kyetzb'il qe tky'ajal, kxel tq'o'n ti'j tex ttx'otx'; tu'ntzun mi'n tel q'it kytx'otx' qe xjal etzan wu'ne, chi Dios.

Qe ja te tja Dios jatum in tzq'aj chib'j

19Te tib'ajxi inx q'i'ne tu'n xinaq ttzi ja tkub' ttxlaj tlamel, ex in okx q'i'ne tu'n jatum ate' qe cuart kyja' xi'yni kywitz tuj tumlal tb'anq'ab' q'ij, aqeju pa'nmaj tu'n kyajb'en o'kx kye pal. Ti'jxi kycuart qe pal tzaj tyek'un jun lugar tkub' tuj tumlal telex q'ij,

20ex tzaj tma'n weye kyja': Tujtzun lugar lu kb'ajel kytzq'ajsa'n pal kychib'jal qe alumaj otoq che'x q'o'n te chojb'il il ex te chojb'il kypaltil xjal, ex ax che tzq'ajel qe oyaj twitz awal, tu'n mi'n tetz kyi'n qe chojb'il lu tuj tnejel ttxa'n pe'n ex tu'n mi'n tok kymako'n xjal qe ti'xti xjan.

21Ex in etz q'i'ne tu'n tuj tkab'in ttxa'n pe'n, tu'n we'lile tuj tnejel ttxa'n pe'n; ex inx uk'ine tu'n tuj kykyajil tb'utx'. O wile tuj junjun tb'utx' attoq jun ttxa'n pe'n ch'in.

22Junx ta' echb'in kye qe ttxa'n pe'n ch'in, aqeju kykub' kyuj kykyajil tb'utx' tnejel ttxa'n pe'n, winqin metro tnuqb'il ex olaj metro twitz.

23Ex kyi'jele jlu attoq jun muro ab'j, ex t-xe'yile muro, lu tkub'sa'ntoq junjun tkub'il q'aq'.

24Tzaj tma'n xinaq weye kyja': Atzun qe ja lu kye qeju in che ajb'en tuj tja Dios, jatum tu'n kytzq'aj qe alumaj in xi kyq'o'n xjal te chojb'il.