Deuteronomio 32 - Mam Huehuetenango New Ortography

1B'intza kya'j, chin yolile; ex aya tx'otx', q'ontz twi'ya ti'j nyole.

2Kb'el chitj nxnaq'tzb'ile ik tza'n jb'al; ik k'okel nyole ik tza'n tq'ab' che'w, ik tza'n xmu's in kub' tib'aj ch'im, ex ik tza'n tqan jb'al in kub' tib'aj k'ul.

3Chin yolile ti'j tb'i Qman; kynimsa'nktze tb'i Qdios.

4Ate Kolol ik tza'n jun pik; tz'aqlxix qe tb'inchb'en, tuj tumelxix tkyaqilju in tb'incha'n. Ate Dios axix tok tyol, minti' jun mya b'a'n in tb'incha'n; tz'aqlxix te ex jiqun ti'j tmod.

5Aqeye xjal mya b'a'n qeye ex mib'an che b'ine; o kyb'inchaye mya b'a'n twitz Dios, ex mya b'a'n qeye tu'n kyoke te tk'wa'l.

6¿Maj kyja'tzun tten in chjet kyu'ne te Qman, aqeye xjal mib'an che b'ine ex minti' kynab'le? ¿Myapetzun ate Kymane poq'salte kyeye? Tu'n o che kub' b'incha'ne, ex tu'n o che oke te jun nasyon.

7Kyna'ntze qe tq'ijlalil ojtxi, che ximane kyi'j qe ab'q'i o che ex; kyqaninxe te kymane ex ktzajel tma'n kyeye, kyqaninxe kye tij xjal ex ktzajel kytx'olb'a'n kyeye.

8Tej tb'aj pa'n tx'otx' kyxol xjal tu'n Dios ma'xix toklen, tej tkyaj techan aju tmojonil ttx'otx' junjun k'loj xjal, b'i'xtzun el tpa'n Dios aju tx'otx' jatum tu'n kyten qe tiyjil Israel ik tza'nx kyajlal.

9Aju tetzb'il Qman, atzun qe xjal etzan tu'n, aqeju tiyjil Jacob.

10E knet tu'n tuj tzqij tx'otx', tuj tx'otx' jumajx tzqij, jatum in jumin nim kyq'iq'; e tzaj tchle'n tuj tq'ab', e b'aj t-xnaq'tza'n, ex e ok tkwentin ik tza'n t-santil tb'aq' twitz.

11Ik tza'n jun ttxu' t'iw in putin kyib'aj qe tal ate' tuj kyq'u', ex in xmoxin kyi'j tu'n tb'ant kylipan, in che el tlik'un t-xik', in che tzaj ti'n tal ex in che'x ti'n kyib'aj t-xik',

12ax ikxtzun te Qman, o'kx te xi ẍaqlunte kye ex mi a'l juntl; mi jun dios nno'k kydiosin xjal o onin te.

13E je'x ti'n twi witz, e ok tk'a'chin tu'n twitz awal tuj kojb'il, tzaj tq'o'n kylo' ta'l kab' etz tuj toy' pik, ex tzaj tq'o'n kychi' aseyt kyi'j qe tze' in che ch'iy kyxol ab'j kyuwxix.

14Tzaj tq'o'n kyk'a lech ex kychi' ques el kyi'j vac ex kyi'j kytxu chip in che tzaj tuj tx'otx' Basán. Tzaj tq'o'n kywa triw tb'anilxix, ex tzaj tq'o'n kyk'a ta'l twitz uva kyaq ke'yin.

15Ex tejtzun kygordyix aj Israel ok kyxajo'n Kyajaw, o che gordyix wen ex puro q'ib'an ok kyi'j; kyajtzun kykolin Kydios aju b'inchal kye, ex el kyik'un aju Kwentil kye ex Klol kye.

16Tzaj tlo'ch tk'u'j Dios kyu'n, ex tzaj tq'oj kyi'j tej kyok ten k'ulul kywitz tilb'ilal ik'un tu'n, aqeju nno'k kydiosin xjal kyuj txqantl nasyon.

17Xi kyq'o'n chojb'il kywitz ju'ẍ ex mya twitz Dios, kywitz qe dios minti'toq ojtzqi'n kyu'n; ak'aj dios qe jlu, ak'aj kyponlen q'i'n, ex minti' o che k'ulun kyman kywitz.

18O tzik' tna'l Dios kyu'n, aju Poq'sal kye ex Kolol kyi'j; o tzik' tna'l Dios kyu'n, aju b'inchal kye.

19Tzajtzun tq'oj Qman tej ttil jlu, tu'nju el ik'un kyu'n qe tky'ajal ex qe tme'jel;

20ex tma kyja': K'elel wewan wib'e kywitz, jaku kyil ti che okel; axix tok mya b'a'n qe xjal lu; k'wa'lb'aj qe, minti' in pon Kyman ti'j kyk'u'j.

21Tzaj tlo'ch nk'u'je kyi'j tu'nju e k'ulun twitz jun dios mya Dios; tzaj nq'oje kyu'n tu'n kylaj qe tilb'ilal minti' kyajb'en. Ax ikx kye ktzajel tlo'ch kyk'u'j wu'ne tu'n tlaj juntl tnam aju in kyma'n ti'j qa minti' tajb'en, ex che jawil q'ojl wu'ne tu'n tlaj jun tnam minti' tnab'l.

22Ma tzaj nq'oje mer ik tza'n q'aq' ex max kpol k'ant tuj kynajb'il kyimni; kb'ajel tz'e'y twitz tx'otx' ex twitz awal tu'n, ex che b'ajel patun qe kyq'uqb'il nmaq witz tu'n.

23Ktzajel nq'o'ne nim mya b'a'n kyib'aj, che xe'l nxo'ne kykyaqil npleche kyi'j;

24che kymel tu'n we'yaj ex tu'n kyaq ok ttzaj kyi'j; che najel tu'n tx'u'j yab'il nim ta'w; che xe'l nsama'ne qe txkup te tjaq' k'ul kyi'j te chyo'lte kye, kyuk'ix qe lob'aj jurat in che kyim xjal kyu'n.

25Tuj cay che kymel xjal tu'n spad, ex tuj kyja ktel nim t-xob'lal. Che kymel qe ku'xun ex qe q'apoj, ax ikx qe tij xjal ex qe tal ne' kukx kych'u'n.

26Otoq kub' nximane tu'n kyb'aj nsputine najchaq, ex tu'n tkub' naj kyb'i kyxol xjal tu'n mi'n kytzaj na'ntl,

27ex minti' kub' tuj nwitze tu'n wok xmayine kyu'n aj q'oj kyi'j; minti' wajb'eye tu'n tjaw kyniman kyib' qeju in che q'ojin kyi'j, ex tu'n mi'n kymante kyja': Tu'nx qipumal o b'ant tkyaqil jlu; mya ate Dios b'inchante, jakulo che chi.

28Qe aj Israel jun k'loj xjal o tz'el tzpet kynab'l, ex jumajx minti' kynab'l.

29Noqwit at kynab'l mawtlo che ximan ti'j jlu, ex mawtlo tz'el kynik' ti'j alkye tu'n ttzaj kyib'aj te b'ajsb'il.

30¿Tza'n tten jlu: Noq tu'n jun xjal e je'l oq jun mil, ex noq tu'n kab'e xjal e ik' lajo'n laj mil? O b'ant jlu noq tu'nju ate Qman, aju Klol qe, xi tq'o'n qo' tuj kyq'ab' qe aj q'oj qi'j.

31Ax tok b'i'n kyu'n qe aj q'oj qi'j, aju kye klol kye mlay pon tipumal ik tza'n qe Klol qe.

32Ex kye, ik kyten ik tza'n tqan uva mya b'a'n, ax kyiyjil ik tza'n qe xjal e ten tuj Sodoma ex Gomorra; qe xjal lu ik kyten ik tza'n tqan uva k'a twitz ex in che kyim xjal tu'n;

33aju ta'l twitz puro mya b'a'n ik tten ik tza'n ttx'ab'en q'anti'; qa ma txi tk'a'n jun xjal jaku jurat kyim tu'n, mer ik tza'n otoq tz'ok tx'a'n tu'n lob'aj.

34Kykyaqil kyb'inchb'en mya b'a'n k'u'n qe wu'ne; k'u'n qe wu'ne tuj nk'ub'le.

35Wu'ne k'ajel t-xel; aqine chin b'el q'onte castiw ok tpon tq'ijlalil tu'n kykub' tz'aq. Ma tzul laq'e' tq'ijlalil tu'n kynaj, ch'ix tpon tq'ijlalil tu'n tkub' kycastiw, aju b'animaj ti'j.

36Tzul Qman kolol kyi'j xjal etzan tu'n ok tke'yinte minti'tl kyipun; ktzajel q'aq'an tk'u'j Qman kyi'j qe tmajen ok tke'yinte mi jun xjal kyjel ten, mi qe xjal majen ex mi qe xjal mya majen.

37Ktzajeltzun tma'n Qman: ¿Jatumtzun ate' qe kydiose, qe klol kyeye, aqeju ok qe' kyk'u'je kyi'j,

38aqeju e je'x chyo'nte t-sebyil kyoyaje patun in che kub', aqeju e je'x k'ante ta'l twitz uva xi kyoyine kye? Etzun kyjaw we' tu'n kyonin kyi'je. E kytzaj tu'n kykolin kyi'je.

39O'kx aqine Dios, minti' juntl Dios, o'kx aqine. Wu'ne in tzaj kamik ex wu'ne in tzaj anq'ib'l; wu'ne in che k'ixb'i xjal ex wu'ne in che b'anix. Mlay kolpaj jun xjal tuj nq'ab'e tu'n juntl.

40In jaw nq'o'ne nq'ab'e twitz kya'j te kyuwsab'l nyole, ex in xi nma'ne kyja': Axix tok itz' qine te jumajx,

41ok tb'aj njaqu'ne ttzi nspadiye in qoptz'aj wen, ex ok kyok xjal tuj xjel wu'ne, k'ajel nq'o'ne t-xel kyb'inchb'en aj q'oj wi'je, kb'el nq'o'ne castiw kyib'aj qeju in che el ik'unte weye.

42Knojel kyi'j npleche tu'n kychk'el xjal ex che najel kykyaqil tu'n nspadiye; qeju otoq che kyim ex qeju otoq che'x q'i'n pres nim kychk'el k'elel, ex k'elel q'i'n kywi' qe nejenel kyxol aj q'oj, aqeju matij ttzmal kywi'.

43Aqeye txqantl xjal kyuj txqantl nasyon, che tzalajxe junx tuk'il ju tnam etzan tu'n Dios, porke kb'el tq'o'n kycastiw qeju e kub' b'yonte kye tmajen; k'ajel tq'o'n t-xel kyb'inchb'en aj q'oj ti'j, kb'ajel t-saqsa'n ttx'otx', ex kb'el tnajsa'n kyil qe xjal etzan tu'n.

44B'ajtzun tma'n Moisés aju b'itz lu wa'ltoq kywitz kykyaqil aj Israel, junx tuk'il Josué aju tky'ajal Nun.

Aju mankb'il tyol Moisés

45Tej tb'aj tma'n Moisés jlu kye aj Israel,

46xi tma'n kye kyja': Che ximane ti'j tkyaqil yol ma txi nma'ne kyeye ja'lo, ex kymanxe kye kyk'wa'le, tu'n tjapun tkyaqil ley lu kyu'n,

47porke aju ley lu mya noq ch'in t-xilen te kyeye; aju ley lu q'ol kychwinqlale, ex tu'ntzun ley lu che tele nim tyemp twitz tx'otx' jlajxi nima Jordán, aju ktzyetel kyu'ne te kyetzb'ile.

Xi tq'o'n Dios amb'il te Moisés tu'n t-xi tke'yin aju tx'otx' tziyimaj

48Ax q'ij lu xi tma'n Qman te Moisés kyja':

49Txi'ya kywi witz Abarim ex tjaxa twi witz Nebo, aju tkub' tuj kytx'otx' aj Moab, twitz Jericó, ex axtzun ke'yinxa tx'otx' Canaán aju kxel nq'o'ne te kyetzb'il aj Israel.

50Twi'tzun witz lu, aju kjawixa twi', axtzun kymela ex kpola kyuk'il qtzan t-xe'chela, ik tza'nx qtzan ttzika Aarón, aju kyim twi witz Hor ex o pon kyuk'il qtzan t-xe'chel,

51ex kykab'ile e b'inchane il nwitze, tu'nju minti' ok kyq'o'ne qine te nim woklene kywitz aj Israel tej ate'toq ttzi a' Meriba-cades tuj tzqij tx'otx' Zin.

52Tu'ntzun jlu, noq kxel tke'yina najchaq aju tx'otx' kxel nq'o'ne kye aj Israel, ex mlay pona tuj, chi Dios te Moisés.