Romanos 4 - Mam Huehuetenango New Ortography

Jun yek'b'il te qe ti'j Abraham

1¿Ti ok qma'? ¿Ti o tkamb'a qxe'chel Abraham jatum elni qo' ti'j?

2Noqwit tu'n taq'unb'en Abraham o tz'ok q'o'n te tz'aqlxix tu'n Dios, atwitlo tumel tu'n tjaw tniman tib' kywitz xjal, ex mya twitz Dios.

3Chi in tma'n tuj Tu'jil: Xi toksla'n Abraham tyol Dios; kyja'tzun ok q'o'n te tz'aqlxix tu'n Dios noq tu'n tokslab'l, chi tuj Tu'jil.

4Ex aju in aq'nan, mlay qma qa noq jun oyaj aju twi tk'u'j, a jlu chojb'il te.

5Atzun teju minti' nno'k qe' tk'u'j ti'j tb'inchb'en, noq o'kx nno'k qe' tk'u'j ti'j Dios aju nno'k q'onte kye xjal aj il te tz'aqlxix, atzunju nno'k q'o'n te tz'aqlxix tu'n Dios noq tu'n tokslab'l.

6Ik tza'n in tma'n David, at tzalajb'il te xjal aju nno'k q'o'n te tz'aqlxix tu'n Dios mya tu'n taq'unb'en.

7Porke chi David:

At tzalajb'il kye xjal in kub' najsa'n kyil, ex in kub' maqsi'n kyil.

8At tzalajb'il te xjal aju mlay tzaj na'ntl til tu'n Qman, chi tuj Tu'jil.

9¿Alkyetzun qe xjal tu'n tten tzalajb'il kye? ¿O'kxpe qeju sircunsidarimaj qe, ex qa ikx qeju mya sircunsidarimaj qe? Porke ma qmaye, o tz'ok q'o'n Abraham te tz'aqlxix tu'n Dios noq tu'n tokslab'l.

10Qatzun ikju, ¿alkyetzun q'ij tok q'o'n Abraham te tz'aqlxix? ¿Otoqpe sircunsidarinjtz, ex qa na'nxtoq? Na'nxtoq t-sircunsidarinjtz.

11Te tib'ajxi o sircunsidarinjtz Abraham tu'n tok te jun techal qa otoq tz'ok q'o'n te tz'aqlxix tu'n Dios, noq tu'n tokslab'l tej na'nxtoq t-sircunsidarinjtz; kyja'tzun ma tz'ok te mamb'aj kye kykyaqil okslal mya sircunsidarimaj qe, ax ikx kye tu'n kyok te tz'aqlxix tu'n Dios noq tu'n kyokslab'l.

12Ax ikx ok Abraham te mamb'aj kye qeju sircunsidarimaj qe, ex mya o'kx sircunsidarimaj qe, ax ikx at kyokslab'l, ik tza'n tokslab'l qxe'chel Abraham tej na'nxtoq t-sircunsidarinjtz.

Tu'n tokslab'l Abraham o tk'am aju tziyimaj tu'n Dios

13Ex tzaj ttziyan Dios te Abraham ex kye tiyjil tu'n kyok te etzal te tkyaqil twitz tx'otx', mya tu'nju otoq txi tniman Abraham ju ley tzaj ttziyan Dios jlu, noq o'kx tu'nju otoq tz'okslan Abraham; kyja'tzun ok q'o'n Abraham te tz'aqlxix tu'n Dios noq tu'n tokslab'l.

14Porke qa o'kx qe xjal in xi kyniman ju ley at kyoklen ti'j ju etzb'il, qa ikju noqxlo gan tu'n qokslan ti'j Jesucrist, ex aju yol tzaj ttziyan Dios, minti'wtlo tajb'en.

15Porke ate ley at castiw tu'n; qatzun minti' jun ley, ax mlay kub' kycastiw xjal, ex mlay tz'el qnik' ti'j qa otoq che ik' xjal tib'aj ley.

16Kyja'tzun, noq tu'nju at tokslab'l Abraham tzaj ttziyan Dios jun tyol te, tu'n tok te jun xtalb'il, tu'ntzun tkyuwsanjtz ju yol tzaj ttziyan Dios kye kykyaqil tiyjil Abraham. Mya o'kx kye qeju in xi kyniman ju ley tzaj ttziyan Dios ju yol lu, ax ikx kye qeju in che okslan ik tza'n te Abraham okslan; kyja'tzun ma tz'ok Abraham te mamb'aj qe qkyaqil,

17ik tza'n in tma'n tuj Tu'jil: Ma tz'ok nq'o'ne te mamb'aj kye nimku nasyon, chi tuj Tu'jil. Ate Abraham qman twitz Dios, porke xi toksla'n tyol Dios, aju Dios in che jatz anq'in kyimni tu'n, ex ok tyolin Dios in b'ant aju minti'toq at nej.

18Maske minti' tumel tuj twitz Abraham tu'n titz'j jun tk'wa'l, pero xi toksla'n tyol Dios ex kub' tyo'n ex o qe'xix tk'u'j ti'j tu'n tok te mamb'aj kye nimku xjal, ik tza'nx o tma Dios te: Iktzun k'okel kyajlal tiyjila, chi Dios.

19Ex minti' kub' numj Abraham tuj tokslab'l, minti' kub' t-ximan qa otoq tijin t-ximlal, porke ch'ixtoq tjapun jun syent ab'q'i tu'n, ex minti' kub' t-ximan qa mib'an alin Sara.

20Ex minti' jolpaje' tk'u'j ti'j ju yol tzaj ttziyan Dios te; o'kx tkyuwsa tib' tuj tokslab'l ex xi tq'o'n chjonte te Dios.

21O qe'xix tk'u'j ti'j qa at tipumal Dios tu'n tb'inchante tkyaqilju otoq tzaj ttziyan Dios te.

22Kyja'tzun ok q'o'n te tz'aqlxix tu'n Dios noq tu'nju tokslab'l.

23Ex mya noq o'kx ti'j Abraham o tz'ib'anjtz qa otoq tz'ok q'o'n te tz'aqlxix tu'n Dios,

24ax ikx o tz'ib'anjtz qi'j, porke ikx qe in qo ok q'o'n te tz'aqlxix tu'n Dios noq tu'n qokslab'l, aqo' in qo okslan ti'j Dios aju jatz anq'in Qajaw Jesús tu'n kyxol kyimni.

25Ate Jesús xi q'o'n tuj kyq'ab' xjal tu'n tkyim tu'n tlaj qil, ex jatz anq'in tu'n qok te tz'aqlxix twitz Dios.