Zacarías 14 - Mam Huehuetenango New Ortography

Aju yol ti'j tnam Jerusalén ex kyi'j txqantl nasyon

1Aya tnam Jerusalén, lu tzul tq'ijlalil castiw tu'n Qman, tujx tmija che b'el sipan qe ti'xti otoq che el q'i'n teya.

2Tuj tq'ijlalil tzul che okel tchmo'n Qman kykyaqil nasyon tu'ntzun kyq'ojin ti'j tnam Jerusalén. Che okel tzoqpaj ti'j tnam, k'elex kyelq'a'n tkyaqilju at tuj kyja aj Jerusalén, kb'el kyxo'n qe xu'j tu'n kyok ten kyi'j ex kxel kyi'n pres mijku kyb'aj aj Jerusalén. O'kx qeju ch'intl che kyjel ten, che tel tuj.

3Atzunte Qman jurat tzul q'ojlel kyi'j qe nasyon lu ik tza'n o q'ojin tuj tq'ijlalil ojtxi.

4Tuj q'ij lu kb'el we' Qman twi witz Olivos, aju tkub' twitz tnam Jerusalén tuj tumlal tjawitz q'ij. Ate witz Olivos kb'el pax tuj tmij, ktzajel tpa'xil tuj tumlal tjawitz q'ij ex kxe'l tumlal telex q'ij, ex kyjel ten jun matij chq'ajlaj tuj tmij. Mij witz k'ajel jawni ex atzun mijtl k'ajel kub'ni.

5Atzun kyeye che elex oqe tuj chq'ajlaj lu, aju kyjel ten kyxol qe witz, aju kpol b'aj max tuj lugar Azal tb'i. Che elex oqe tuj, ik tza'n e ex oq qtzan kyxe'chele ojtxi tu'n tlaj kyaqnajnab' tzaj tej in kawintoq rey Uzías tuj Judá. Tzul Qman aju Ndiose kyuk'ix kykyaqil qeju xjan qe.

6Tuj q'ij lu minti' spik'un clarxix ex mya qloljxix.

7O'kxte Qman ojtzqilte aju q'ij lu ex minti' juntl q'ij ikju. Minti' pab'l tib' q'ij ti'j qonik'an, ex ok tok qonik'an kukx ttenx spik'un.

8Kjawitz jlet jun twi a' tuj Jerusalén ex kb'etel tuj jb'alil ex tuj koresma; mij a' lu kyja' kxe'l tuj tumlal tjawitz q'ij tuj Mar at nim Atz'an tuj, atzun mijtl kyja' kxe'l tuj tumlal telex q'ij tuj Nintz Mar.

9Atzun q'ij lu, kkawil Qman tuj tkyaqil twitz tx'otx'. O'kx twitz che k'ulul xjal, ex o'kx te tb'i ktzajel kyna'n xjal ok kykub'san twitz.

10Tkyaqil tx'otx' k'okel te jun chq'ajlaj, kxelx qe' tuj tnam Geba ex kpol b'aj max tuj tnam Rimón aju tkub' tuj tx'otx' te kub'ni tjaq'xi Jerusalén. Aju tnam Jerusalén kjawil ten najchaq ex che najal xjal tuj, kxelx qe' ttzi tlamel tnam Benjamín tb'i ex kpol b'aj max ttzi tnejel tlamel (jatum ten ju Ojtxi Tlamel nej), ex kxel qe' jatum tkub' ju ja ma' twa'l te Hananeel ex kpol b'aj max jatum nne'l yatz'et ta'l twitz uva te rey.

11Ax tok che najal xjal tuj Jerusalén ex mlay kub' xitun juntl maj. Qe xjal che najal tuj, segurxix che anq'il.

12Atzun qe nasyon otoq che q'ojin ti'j tnam Jerusalén kb'el kycastiw tu'n Qman: Itz'xqe ok tel q'ay kychib'jal; kjawitz q'ay tb'aq' kywitz, ax ikx k'eletz q'ay kyaq' tuj kytzi'.

13Tuj q'ij lu ktzajel nimxix kyxob'il tu'n Qman. Teylex te junjun ktzajel ttzyu'n tq'ab' tuk'il ex che okel tzoqpaj kyi'j kyxolx.

14Ax ikxtzun qe aj Judá che q'ojlel tuj Jerusalén, k'elel kyi'n nimxix kyq'inumab'l qe nasyon kyvesin kyib' kyuk'il, k'elel kyi'n saq pwaq, q'an pwaq ex xb'alun.

15Aju castiw ktzajel kyib'aj qe xjal, axtzunju ktzajel kyib'aj qe chej cabay, qe mul, qe chej camey, qe bur ex kyib'aj kykyaqil qe alumaj ate' tuj kycampament aj q'oj.

16Tb'ajlenxi jlu, kykyaqil qe xjal che kyjel anq'in kyuj qe tnam e q'ojin ti'j Jerusalén, kykyaqil ab'q'i che xe'l k'ulul twitz Rey, aju Qman Tajaw Tkyaqil, ex kykyaqil ab'q'i che xe'l ik'sal ninq'ij kyi'j qe tal ja t-xaq tze'yin kywi'.

17Qa at jun nasyon tuj tkyaqil twitz tx'otx' minti' ma che'x xjal tuj Jerusalén k'ulul twitz Rey, aju Qman Tajaw Tkyaqil, mlay tzajtl jb'al tib'aj kytx'otx' xjal lu.

18Qa minti' ma che'x qe aj Egipto, mi'n tzajtl jb'al tib'aj kytx'otx', ax castiw ktzajel kyi'j ik tza'n kyi'j txqantl nasyon qa minti' ma che'x ik'sal ninq'ij kyi'j qe tal ja t-xaq tze'yin kywi'.

19Atzun castiw ktzajel kyi'j aj Egipto ex kyi'j kykyaqil nasyon mi'n che'x ik'sal ninq'ij kyi'j qe tal ja t-xaq tze'yin kywi'.

20Tuj q'ij lu k'okel tz'ib'et ti'j kycampan chej jun yol kyja': XJANSAMAJ TE JLU TE QMAN, ex qe k'il in che ajb'en tuj tja Qman che okel xjan, ik tza'n qe laq nmaq ate' twitz altar.

21Kykyaqil qe k'il ate' tuj Jerusalén ex tuj Judá che xjansetel tu'n kyajb'en te Qman aju Tajaw Tkyaqil. Qe xjal che xe'l q'olte chojb'il che ajb'el qe k'il lu kyu'n, ex kyuj kjawix kytzq'ajsa'n kychib'jal qe alumaj, aqeju otoq che'x q'o'n te chojb'il. Tuj q'ij lu mi'n che pontl qe comersyant k'ayil tuj tja Qman aju Tajaw Tkyaqil.