2 Crónicas 21 - Mam Huehuetenango New Ortography

Tej tkawin Joram tuj Judá 2 Reyes 8.16-24

1Kyimtzun Josafat ex ku'x maqu'n tuj tnam tok tb'i Ttanmi David aju qtzan t-xe'chel, ex aju kyaj ten te rey te t-xel, atzun Joram aju tky'ajal.

2Qe terman Joram, aqeju ax tky'ajal Josafat qe, atzun qe jlu: Azarías, Jehiel, Zacarías, Azarías, Micael ex Sefatías. Kykyaqil qe jlu tky'ajal Josafat qe, aju rey kye aj Judá.

3Otoq txi tq'o'n kyman nimku oyaj kye; xi tq'o'n q'an pwaq, saq pwaq ex txqantl ti'xti wi'yilxix, ax ikx xi tq'o'n junjun tnam kye, aqeju tok muro kyi'j ate' tuj Judá, ex aju kawb'il xi tq'o'n te Joram ex atzun nej tky'ajal.

4Tejtzun tkyuwset Joram tuj tkawb'il e kub' tb'yo'n kykyaqil qe terman tu'n spad, kyuk'ix junjun nejenel kye aj Israel.

5Toktoq twi' 32 ab'q'i tej ttzyet tkawin ex o kawin wajxaq ab'q'i tuj Jerusalén.

6Ok lpe' ti'j kyb'inchb'en qe rey kye aj Israel ex ti'j tb'inchb'en rey Acab ex qe tiyjil, porke o moje' tuk'il jun tme'jel Acab, kyja'tzun mya b'a'n e ela qe tb'inchb'en Joram tuj twitz Qman.

7Ex minti' o tajb'e Qman tu'n kynaj qe tiyjil David, tu'n tlaj ju yol otoq tzaj ttziyan te David tu'n kukx tu'n kyjaw sk'et qe tiyjil tu'n kyok te rey.

8Tuj tq'ijlalil tej tkawin Joram jaw kyi'n kyib' aj Edom kyi'j aj Judá, el kypa'n kyib' ex ok kyq'o'n jun kyex kyrey.

9Atzunte Joram xi' kyuk'il tcapitán ex kyuk'ix kykyaqil qe tcarwaj in che ajb'en tuj q'oj, ex b'aj kytxolb'an kyib' aj Edom kyi'jele ex tujxtzunju qonik'an lu jaw we' Joram kyuk'ix qe capitán kye tcarwaj, e oktzun tzoqpaj kyi'j aj Edom ex kub' kyi'j kyu'n.

10Maske ikju, pero e etz aj Edom tjaq' tkawb'il Judá, ex kytenx ja'lo. Ex tujx tq'ijlalil lu etz tnam Libna tjaq' tkawb'il Judá, tu'nju otoq kyaj tkolin Joram Qman aju Kydios qtzan t-xe'chel.

11Ax ikx e jaw tb'incha'n Joram qe lugar kywi' qe witz tuj Judá jatum tu'n kyk'ulun qe xjal kywitz qe tilb'ilal, ex tu'ntzun jlu el kypa'n kyib' aj Jerusalén ex aj Judá ti'j Qman.

12Tk'amtzun Joram jun u'j tu'n Elías aju t-sanjel Dios, ex chi u'j in tma'n: Ate Qman aju Tdios David aju qtzan t-xe'chela in tma'n teya kyja': Minti' ma tz'ok lpe'ya ti'j tb'inchb'en Josafat aju qtzan tmana ex ti'j tb'inchb'en rey Asa aju qtzan tchmana,

13noq o'kx ma tz'el tkano'na ti'j kyb'inchb'en qe rey kye aj Israel, ex tu'n tlaja ma tz'el kypa'n kyib' qe xjal aj Judá ex aj Jerusalén ti'j Qman, ik tza'n o tb'incha Acab ex qe tiyjil. Ax ikx o che kub' tb'yo'na qe termaniya, aqeju mas b'a'n kymod twitza.

14Kyja'tzun kb'el tq'o'n Qman jun nintz k'ixb'isab'l kyib'aj qe t-xjalila, kyib'aj qe tk'wa'la, kyib'aj qe t-xu'jila ex tib'aj tkyaqilju at teya.

15Ex atzun teya ktzajel jun yab'il ti'ja minti' q'anb'il ti'j. K-yab'tela tu'n tk'u'ja ex ok che b'ajel q'ay qe t-xq'iltxa'ya, chi Elías tuj tu'j.

16Tu'n Qman tzaj kyq'oj aj Filisteo ex aj Arabia ti'j Joram, aqe jlu kyvesin kyib' kyuk'il aj Etiopía;

17kub'tzun b'e kyu'n ex e ok tzoqpaj kyi'j aj Judá, xi kyi'n tkyaqil q'inumab'l knet kyu'n tuj tja rey, xi kyi'n qe tk'wa'l ex qe t-xu'jil. O'kxku jun tk'wa'l kyaj klet, Ocozías tb'i, aju ch'i'p.

18Te tib'ajxi tkyaqil jlu kub' tq'o'n Qman tcastiw Joram, o yab't tu'n tk'u'j, minti' q'anb'il ti'j.

19Eltzun q'ij ex tej tb'ant kab' ab'q'i ttzyetlen tu'n yab'il, e b'aj q'ay qe t-xq'iltxa' tu'n yab'il ex kyimtzun tuk'il nimxix ta'w. Qe t-xjalil minti' kub' kyq'o'n jun nintz q'aq' te nimb'ilte ik tza'n otoq kyb'incha kyi'j qtzan t-xe'chel.

20Toktoq twi' 32 ab'q'i tej ttzyet tkawin ex o kawin wajxaq ab'q'i tuj Jerusalén. Tej tkyim mi jun o b'isun ti'j. Ku'xtzun maqu'n tuj tnam tok tb'i Ttanmi David, ex minti' okx q'o'n tuj kypantyón qe rey.