Oseas 9 - Mam Huehuetenango New Ortography

Aju kycastiw aj Israel o q'manjtz tu'n Oseas

1Mi'n che tzalaje aqeye aj Israel, mi'n che jaw t'ikpaje tu'n tzalajb'il ik tza'n kye txqantl tnam, porke ma kyaj kykoline aju Kydiose tu'n kyk'ulune kywitz tilb'ilal. Kyuj qe lugar jatum nne'l ttxk'omil triw, atzun kyganiye tu'n ttzaj kyk'mo'ne aju twi kyk'u'je ti'j ju kyyaẍb'ile.

2Mlay kanun triw te kywa xjal ex mi ta'l twitz uva, ex aju ak'aj ta'l twitz uva noq kb'el naj.

3Che ajel meltz'aj qe aj Efraín tuj Egipto ex che chyo'l kyi'j qe chib'j tuj Asiria, aqeju mayo'n tu'n tley Dios. Mlay che najantl tuj tx'otx' etzan tu'n Qman;

4mlay kub' kyqo'ntl ta'l twitz uva tib'aj altar te jun oyaj te Qman, ex mlay txi kyq'o'n qe chojb'il ma chixin. Aju pan kxel kywa'n ik tten ik tza'n pan te b'is ti'j jun kyimni, ex alkye ok t-xi wa'nte, b'i'x ktz'ilixtel. Ax qe che wa'l ti'j pan lu, ex mlay txi kyi'n tuj tja Qman.

5¿Ti ok kyb'incha'ye ok tul kanun ninq'ij, aju ninq'ij ma' toklen te Qman?

6Ma che el oq twitz ju xitb'il, che okel chmo'n kyu'n aj Egipto ex atzun che b'elex maqu'n tuj tnam Menfis. Aju kyq'inumab'l aju saq pwaq knajel tu'n ch'i'x k'ul, ex tuj lugar jatum otoq che kub' ten ktzajel ch'iy ch'i'x.

7Ma pon tq'ijlalil tu'n ttzaj kycastiw. Ma pon tq'ijlalil tu'n tkub' q'ot kycastiw ti'j kyb'inchb'en. K'elel kynik' aj Israel ti'j ok tul kanun jlu. Atzun kyeye in kyma'ne: Minti' tnab'l t-sanjel Dios, ex aju xinaq in yolin ti'j ju in tzaj tma'n Dios, tzkajte, che chiye. In kyma'ne ikju tu'nju nimxix kyb'inchb'ene mya b'a'n ex nimxix in che ik'une kyi'j.

8Ma kub' tq'o'n Dios t-sanjel te xq'uqil kye aj Efraín, atzun kyeye in kub' kyq'o'ne k'ob'il tuj tb'e, ax ikx in che ik'une ti'j ok tokx tuj tja Dios.

9Ma che naj aj Efraín te jumajx, ik tza'n tuj kyq'ijlalil qe aj Gabaa. Ktzajel tna'n Qman aju kyb'inchb'en mya b'a'n ex kb'el kycastiw tu'n tlaj kyil.

Kb'el kycastiw aj Israel tu'n tlaj kyil

10Chi Qman in tma'n: Tej kyknet aj Israel wu'ne in jaw tzalaje kyi'j mer ik tza'n jun xjal in knet twitz uva tu'n tuj lugar tzqij tx'otx'. Qe kyxe'chele ik e ela tuj nwitze ik tza'n qe tnejel twitz higo. Ex tej kypon tuj lugar Baal-peor, xi kyq'on kyib' te juntl dios ch'ixb'ajilxix, ex e ok te ik'b'ilxix ik tza'nx ju tilb'ilal k'ujla'nxix kyu'n.

11Aju kyajwalil qe aj Efraín kb'el naj ik tza'n jun chyu'j in xi lipan ex in kub' naj. Mlay che itz'j txqantl k'wa'l, ex mlay tz'ok tentl kyal qe xu'j.

12Ex maske che ch'iy qe kyk'wa'l, pero aqine chin elel q'inte kye ex mi jun kyjel nq'o'ne. Ay b'ek'b'il kywitz qe xjal lu ok tel npa'n wib'e kyi'j.

13Qe aj Efraín ik tza'nx in wile ik kyten ik tza'n tnam Tiro tkub'san tuj jun chq'ajlaj tb'anilxix, ex k'eletz kyi'n kyk'wa'l tu'n kykub' b'yo'n.

14Nman, q'onxa aju at tu'n t-xi tq'o'na kye. B'inchama tu'n mi'n ttzaj kyal qe xu'j ex tu'n mi'n tten ta'l kyim.

Aju tq'oj Qman kyi'j aj Efraín

15Chi Qman in tma'n: Tuj Gilgal kyb'incha tkyaqil mya b'a'n, ex atzun tzaj qe' tu'n ttzyet wik'une kyi'j. Tu'nju kyb'inchb'en mya b'a'n che elex wi'ne tuj njaye; mlay che ok nk'ujla'ntle, ex kykyaqil qe nejenel kyxol mib'an che niman.

16Qe aj Efraín at ẍil kyi'j, ik kyten ik tza'n jun wi' tze' tzqij tlok' ex minti'tl twitz nno'k. Maske tzaj kyk'wa'l, pero che najel wu'ne.

17Qe xjal lu kyk'i' tu'n t-xi kyniman tyol Ndiose; kyja'tzun che elel ik'un tu'n, ex noq che b'etjeb'el kyuj txqantl nasyon.