1Nman Dios, chin tkwentin oka porke ti'ja ma tz'ok nklon wib'e.
2O txi nma'ne teya: Aya Nmane, noq tu'na in chin tene tuj txub'txaj, mi jun jaku pon ik tza'n aya.
3Qeju b'a'n che niman Dios ex qeju tz'aqlxix ate' twitz tx'otx', nim in chin tzalaje kyi'j,
4atzun qeju in che ajb'en kye junxitl dios, tzul nimxix b'is kyi'j. Mlay chin tene kyuk'il ok t-xi kyq'o'n chik' te jun chojb'il te kydios, mlay txi nma'ne aju kyb'i qe kydios.
5Nman, o'kxku aya wetzb'ile; nim in tq'o'na weye, ex tuj tq'ab'a ta' nchwinqlale.
6Tb'anilxix ju tx'otx' ma nk'ulb'aye, mejorxix aju wetzb'ile ma tzaj q'o'n.
7Kxel nq'o'ne chjonte te Qman porke a in tzaj q'onte nnab'le, ex a in tzaj q'onte xnaq'tzb'il tuj wanmiye te qonik'an.
8At Qman wuk'ile tkyaqil maj, ex tu'nju at ntxlaje tuj nb'anq'ab'e, mlay chin yukche.
9Kyja'tzun at nim tzalajb'il tuj wanmiye; tkyaqil nximlale k'okel kwentin tu'n mi'n tnaj,
10ex mlay kyaj tq'o'na wanmiye tuj kynajb'il kyimni ex mlay chin kyaj tq'o'na tu'n ttzuwix nximlale, aqine nimal teya.
11Tzul tyek'una weye aju tb'eyil chwinqlal. At nim tzalajb'il tu'n ntene tuk'ila, at nim achb'il tuk'ila te jumajx.
Who We AreWhat We EelieveWhat We Do
2025 by iamachristian.org,Inc All rights reserved.
