Isaías 43 - Mam Huehuetenango New Ortography

O'kxku Qman Klol kye aj Israel

1Atzun ja'lo, aqeye aj Israel tiyjil Jacob, ate Qman aju b'inchante kyeye chi kyja': Mi'n che xob'e porke ma che kolpete wu'ne; ti'j kyb'iye e tzaj ntxko'ne porke etzan qeye wu'ne.

2Qa il ti'j tu'n kyik'xe tuj a', aqine chin tele kyuk'ile, qa il ti'j tu'n kyik'xe kyuj nima, mlay che'x mulq'aje tjaq' a', ex qa il ti'j tu'n kyokx q'o'ne tuj q'aq', mlay che tz'e'ye ex mlay jaw julin q'aq' kyi'je.

3Porke aqine Dios aju Kymane, aju klol kyeye, ex aqine Dios Xjan kye aj Israel. Ma che'x nq'o'ne qe aj Egipto, qe aj Etiopía ex qe aj Sabá, tu'n tkub' kyi'j te kyxele tu'ntzun kykolpete.

4Ex nimxix nk'u'je kyi'je, ma' kyoklene tuj nwitze ex k'ujla'n qeye wu'ne. Noq tu'n kytene wuk'ile ex tu'n kykyaj anq'ine, ma che'x nq'o'ne qe xjal ex qe nasyon tu'n tkub' kyi'j te kyxele.

5Mi'n che xob'e porke lu qine atine kyuk'ile. Max tuj tx'otx' tuj tjawitz q'ij ex max jatum nne'x b'aj, che ajetz nchmo'ne qe kyxjalile tu'n kytene juntl maj junx.

6Kxel nma'ne teju lugar at tuj tb'anq'ab' q'ij kyja': Che tq'o'n ajtze, ex kxel nma'ne teju lugar at tuj tnayaj q'ij kyja': Mi'n che kyaj ttzyu'ne. Kyi'n ajtze qe nky'ajale ex qe nme'jele max ttxa'npun tx'otx' najchaq.

7Kykyaqil qeju tok nb'iye kyi'j, aqeju wu'ne, e b'ant tu'n tjaw kynimsa'n nb'iye.

8Kyi'ntze qe xjal etzan wu'ne, aqeju at tb'aq' kywitz pero moẍ qe, ex at kyẍkyin pero chkyin kywi'.

9B'a'n tu'n tok kychmon kyib' kykyaqil tnam ex kykyaqil nasyon tu'n kyok tuj xjel. ¿Alkye jun kyxol qe tnam lu otoq tma jlu ojtxi, ex qa otoq tzaj tq'o'n naj tqanil ti'j ju o b'aj te ojtxi? B'a'n tu'n ttzaj kyi'n testiw ti'j tu'n kymante qa ik tten jlu ex tu'n qb'inte ex tu'n tel qnik' ti'j qa ax tok kyyol.

10Chi Qman kyja': Aqeye testiw wi'je, ex aqeye nmajene e jaw nsk'o'ne tu'n wojtzqinjtze kyu'ne, tu'n tok qe' kyk'u'je wi'je ex tu'n tel kynik'e alkye qine. Mi a'l juntl dios o ten nej nwitze ex mi a'l juntl ktel te tib'ajxi.

11O'kx qine Dios aju Kymane, mi a'l juntl jaku che klete tu'n.

12A qine in q'onte tqanil ex aqine in pakb'ante: Ma che klete wu'ne ex mya tu'n juntl dios, ax qeye testiw wi'je.

13Aqine Dios atxix ojtxi ex kukx ntene ja'lo. Mi a'l jun jaku tzoqpaj tuj nq'ab'e. Mi a'l jun jaku kub' q'uchinte ju in b'ant wu'ne.

14Ate Qman aju Dios Xjan kye aj Israel, ex aju tzoqpil kyeye chi kyja': Noq tu'nju at nk'ujlalile kyi'je, kxel nsama'ne txqan soldad tu'n kypon tuj Babilonia ex kykyaqil qe aj Caldeo che elel oq kyuj kybarc, aqeju nim in che tzalaj kyi'j.

15Aqine Dios aju Kymane, aju b'inchante kye aj Israel, aju Dios Xjan ex kyreye, chi Dios.

16Jaqet jun b'e ojtxi tu'n Qman tuj mar, jun b'e nno'kx tuj tmij a' in yukch wen,

17ex e je'tz ti'n txqan soldad nim kyipun, tuk'ix kycarwaj ex kychej, tu'ntzun kynaj tu'n. Kukx e kyaj pale' ex minti'tl o che jaw we', b'i'x e kub' b'aj ik tza'n jun mech in kub' yupj.

18Atzun ja'lo, chi Qman kye qe xjal etzan tu'n: Mi'n tzaj kyna'ntle aju o b'aj kyi'je ex mi'n che ximantle ti'j ju o b'aj ojtxi.

19Ex ok nb'incha'ye jun ti'xti ak'aj ex ok kyila'ye b'i'x ja'lo kb'antel. Kjaqetel jun b'e wu'ne tuj ju lugar minti' kynajb'il xjal tuj, ex che jawil jlet qe nima tuj tzqij tx'otx'.

20Chin jawil nimsa'ne kyu'n qe jil te tjaq' k'ul, ik tza'n qe wech ex qe chyu'j avestrúz, ex kjawil jlet nim a' wu'ne tuj lugar minti' kynajb'il xjal tuj, ex che jawil jlet qe nima tuj tzqij tx'otx', tu'ntzun t-xi nq'o'ne te kyk'a' qe xjal etzan wu'ne ex sk'o'maj qe wu'ne.

21O nb'inchaye qe xjal lu tu'n tjaw kynimsa'n nb'iye tu'n kyb'itz.

22Atzun kyeye aj Israel tiyjil Jacob, minti' e kub'sane nwitze, noq o'kx ma b'aj kyganiye wi'je.

23Minti' ẍe kub' kyb'yo'ne qe ẍne'l tu'n tkub' kypatune tib'aj altar te jun oyaj te weye, ex minti' ẍin jaw kynimsa'ne kyu'n qeju chojb'il. Mya tu'nju in chin qanine oyaj kyeye ma che sikte, ex minti' ẍin q'ajte kyi'je tu'n tkub' kypatune storak.

24Minti' ma che laq'one ti'j jun wiq ajlaj at tk'ok'jal tu'n ttzaj kyi'ne weye te kyoyaje, ex minti' tzaj kyq'o'ne t-sebyil alumaj weye te jun chojb'il tu'n ntzalaje ti'j. Noqpe ma chin yajlanjtze tu'n tlaj ju il in b'ant kyu'ne ex ma chin sikte tu'nju mya b'a'n in b'ant kyu'ne.

25Pero noq tu'nju aqine Kydiose ma kub' nnajsa'ne kyile, tu'nju ma che ik'e tib'aj nleye, ex mlay tzaj nna'ntle.

26Qa at jun wile tuj kywitze, b'a'n tu'n tok kyma'ne weye, tu'n qyolin ti'j ex tu'n tel nik'b'aj ti'j alkye at til. Kymantze qa jaku che ele twitz ex qa ax tok minti' kyile.

27Aju tnejel kyxe'chele o b'inchan il, ex qe xnaq'tzal kyeye jaw kyi'n kyib' tu'n kyq'ojin wi'je.

28Kyja'tzun kb'el nq'o'ne kych'ixwi qe nejenel in che ajb'en tuj njaye, ex kxel nq'o'ne amb'il tu'n kynaj ex tu'n kyok xmayin qe aj Israel, aqeju tiyjil Jacob.