Deuteronomio 25 - Mam Huehuetenango New Ortography

1Qa ma tzaj q'oj kyxol kab'e xjal, ex qa ma che pon tuj jusgad tu'n t-xi b'incha'n kyi'j kyu'n qe jwes, atzun qe jwes che q'malte alkye minti' til, ex kb'el kyq'o'n t-sentens aju at til.

2Qa at tu'n tb'aj asyalit aju at til, kxel tma'n jwes te tu'n tkub' mutze' twitz tx'otx', ex twitzx jwes kxel jato'n asyal ti'j, ik tza'nx til otoq b'ant.

3Pero mlay tzik' tib'aj 40 asyal tu'n t-xi' ti'j, porke qa nimxix tcastiw kyermaniye ma kub', jaku tzaj t-ximb'etz qa minti'x tajb'en tuj kywitze.

4Mi'n tz'ok kyk'alo'ne ttzi' boys in b'et tib'aj triw tu'n tel ttxk'omal.

Ley tu'n mi'n tnaj tb'i jun xinaq otoq kyim

5Qa at kab'e xinaq kyitz'in kyib' ex junx najl qe, qa ma kyim jun kye ex minti' jun tky'ajal ma kyaj, mlay moje' t-xu'jil kyimni tuk'il juntl xinaq te ti'jxi; ax terman qtzan tchmil kjawil xu'jilante te, tu'ntzun ttzaj tiyjil qtzan terman tu'n.

6Aju tnejel tal xu'j q'a tzul itz'j, ax tb'i k'okel ik tza'n tb'i qtzan tchmil tu'ntzun mi'n tkub' naj tb'i qtzan tchmil kyxol aj Israel.

7Qatzun tk'i' xinaq jaw t-xu'jla'n t-xu'jil qtzan terman, kxe'ltzun xu'j tuj jusgad ex kxel tma'n kye tij xjal te tnam kyja': Tk'i' nxna'ne tu'n tkyaj ten tb'i qtzan terman kyxol aj Israel, ex tk'i' jaw moje' wuk'ile.

8Ktzajeltzun kytxko'n qe tij xjal te tnam aju xinaq lu, ex kxel kyqanin te qatzun kukx ma kub' t-xk'ayin tib' tu'n tmoje' tuk'il t-xu'jil qtzan terman, ex qa ma tma: Mlayx chin moje'ye tuk'il xu'j lu, qa chi,

9kxe'ltzun laq'e' t-xu'jil qtzan terman ti'j, ex kywitz qe tij xjal, k'elel ti'n xu'j t-xajab' xinaq, k'okex ttzub'an xu'j tuj twitz, ex kxel tma'n te kyja': Atzun in b'ant ti'j ju xinaq tk'i' moje' tuk'il t-xu'jil qtzan terman tu'n ttzaj tiyjil tu'n, chi xu'j kxel tma'n.

10Kyxol aj Israel b'i'x k'okel b'ya'n tb'i xinaq lu kyuk'ix qe tiyjil: Qe tiyjil xjal minti' t-xajab' tok.

Txqantl ley

11Qa in che q'ojin kab'e xinaq, qa ma pon laq'e' t-xu'jil jun kye tu'n tkolin ti'j tchmil, ex qa ma che tzaj ttzyu'n qe tb'aq' aju nno'k k'ixb'isante te tchmil,

12k'eleltzun kytx'emine tq'ab' xu'j lu, ex mi'n tzaj tz'e'y kyk'u'je ti'j.

13Mi'n tz'ajb'en kab'e mark kyu'ne, jun al ex juntl mya al;

14ex mi'n tz'ajb'en kab'e malb'il kyu'ne, jun matij ex juntl mya matij.

15Noq o'kx tu'n tajb'en mark cabalxix kyu'ne ex malb'il tz'aqlxix, tu'ntzun kyanq'ine nim ab'q'i tuj tx'otx' ktzajel tq'o'n Qman Dios kyeye.

16Porke kykyaqil qe jlu ik'un tu'n Qman ex qeju in kyb'incha'n aju mya tz'aqlxix.

Aju orden tu'n kykub' b'aj qe aj Amalec

17Kyna'ntze aju kyb'incha aj Amalec kyi'je tej ate'toqe tuj b'e, kyetzlenxiye tuj Egipto:

18E ok tzoqpaj kyi'je tuj b'e, ex tk'ulb'aku sikni qeye ex minti'tl kyipune, ex e ok tzoqpaj kyi'j qeju lepchix kytzaj; minti' e xob' twitz Dios.

19Kyja'tzun, ok kyklete tu'n Qman Dios kywitz kykyaqil aj q'oj txolin kyten kyi'je, tuj tx'otx' ktzajel tq'o'n tu'n tok te kyeye, che najel qe aj Amalec kyu'ne, tu'n mi'n kytzaj na'ntl tzalu twitz tx'otx'. Mi'n tzik' tna'njtz jlu kyu'ne.