Ezequiel 26 - Mam Huehuetenango New Ortography

Kb'el kycastiw aj Tiro

1Tuj tnejel q'ij te xjaw te tjunlajin ab'q'i, tzaj yolin Qman wuk'ile ex tma kyja':

2Qe xjal te tnam Tiro o kyma ti'j tnam Jerusalén kyja':

Aju tlamel ja te k'ayb'il kyxol qe nasyon ma b'aj b'uchj. Atzun weye ma chin kamb'ane ja'lo. Ktel nimxix nq'inumab'le, atzunte tnam Jerusalén ma kub' xitj, che chi.

3Kyja'tzun aqine Dios in xi nma'ne jlu: Aqeye aj Tiro, chin okele aj q'oj kyi'je. Che tzajel wi'ne nimku nasyon tu'n kyq'ojin kyi'je, ik tza'n in jaw xtulq'in mar,

4kb'el kyxitun qe muro tok ti'jele kytanmiye, ax ikx qe ja ma' kywa'l te kykolb'il kyib'e. Tuk'ixpe tx'otx' kb'ajel ntz'iso'ne, ex junx te pik kyjel ten minti' tx'otx' tib'aj.

5Tuj tmijil mar k'okel te tzqijsab'l kye xyub' tzuyb'il kyiẍ. Aqine Dios in chin q'mante jlu. K'elex kyelq'a'n qe nasyon tkyaqilju at tuj tnam Tiro.

6Qe xjal najlqe kyuj qe aldey te tnam Tiro che b'el b'yo'n tu'n spad. K'eleltzun kynik' ti'j, aqine Dios.

7Aqine Dios in xi nma'ne jlu: Ktzajel nsama'ne Nabucodonosor aju rey te tnam Babilonia, at tuj tx'otx' tuj tb'anq'ab' q'ij, aju rey at nimxix tipun kywitz kykyaqil rey, k'okeltzun tzoqpaj ti'j tnam Tiro. Tzul kyuk'il chej kyuk'ix carwaj, kyuk'ix qe xjal q'ojlel kyjax kyib'aj chej, ex kyuk'il nim soldad.

8Che b'el b'yo'n tu'n spad qe xjal najlqe tuj aldey te tnam Tiro; kjawil tb'incha'n rey jun muro ti'jele tnam, kjawil tb'incha'n t-xwe'tzb'il tu'n tok tzoqpaj ti'j ex che okel tzoqpaj qe soldad ti'j, b'anin kyten tuk'il kymaqb'il.

9Che okel tzoqpaj ti'j tnam tuk'il máquina in ajb'en te xitb'il muro, ex tu'n barret kb'el kyxitun qe ja ma' kywa'l te kykolb'il kyib'.

10Oktzun tokx rey te Babilonia ttzi tlamel tnam, k'okex ik tza'n in che okx qe xjal tuj jun tnam otoq kub' ti'j, che okextzun nim chej, ex kb'ajel noj tuj tnam tu'n quq ok tjaw tu'n kyqan; che tzajel lu'lun qe muro tu'n kyq'ajq'ajel qe carwaj ex tq'ajq'ajel kyqan chej kyjax qe q'ojlel kyib'aj.

11Kb'ajel kywab'an qe chej kyuj kykyaqil cay. Kb'el tb'yo'n rey kykyaqil qe xjal tu'n spad, ex che ik'el tz'aq qe tqan ja, aqeju kyuwxix kyten.

12K'elel q'i'n kyq'inumab'le kyu'n, kxel kyelq'a'n kyk'a'ẍe, kb'el kyxitun qe muro tok ti'jele tnam; ax ikx qe ja tb'anilxix che ke'yin, qe viga, qe ab'j, qe ttx'aqan tze' ex qe ttx'aqan ja otoq che kub' xitj che xel kyxo'n tuj mar.

13Kyja'tzun b'i'x kweb'el tq'ajq'ajel kyb'itze wu'ne, ex mlay b'injtz juntl maj tq'ajq'ajel twi' kychinb'e arpa.

14K'okel kytanmiye wu'ne te jun pik minti' tx'otx' tib'aj, k'okel te tzqijsab'l kye xyub' tzuyb'il kyiẍ, ex mlayx jaw b'incha'n juntl maj. Aqine Dios in chin q'mante jlu.

15Aqine Dios in xi nma'ne jlu ti'j ju tnam Tiro: Qe tnam ate' ttzi'yile mar che tzajel lu'lun ok kyb'inte tq'ajq'ajel ok tkub' xitj tnam Tiro, ok kyjaw ayayan qeju otoq che k'ixb'i ex ok kyb'yet qe xjal najlqe tuj.

16Kykyaqil qe rey in che kawin kyuj qe tnam ate' ttzi'yile mar che b'eletz tuj kyq'uqb'il, k'elel kyi'n kyẍjo'w, ikx kyxb'alun tb'anilxix ke'yin; ex tu'n kyxob'il che b'el qe' twitz tx'otx' ex che tzajel lu'lun tkyaqil or tu'n kyxob'il ok kylonte aju otoq b'aj ti'j tnam Tiro.

17Kxe'ltzun kyb'itzan ju b'itz lu te b'is ti'j tnam Tiro:

Tza'n tten ma kub' xitja, aya tnam najlqe xjal tuja, aqeju in che aq'nan tuj mar, aya tnam tb'anilxix yolb'il teya. Aya, kyuk'ix qe xjal najlqe tuja e oke nimxix kyipune kywitz qe txqantl tnam ate' ttzi'yile mar, ex qe txqantl tnam tzaj kyxob'il kyu'ne.

18Atzun ja'lo, tu'nju ma kub' xitja in che lu'lun tu'n kyxob'il qe tnam ate' ttzi'yile mar. Ja'lo tu'nju ma kub' naja, ma che jaw sek'paj qe tnam ate' ttzi'yile mar.

19Atzun jlu in xi nma'ne, aqine Dios: B'i'x kb'el xitja wu'ne ik tza'n qe tnam jatum mi jun xjal najl tuj. Ex kyjel mulq'aja wu'ne tjaq' mar ma' t-xe';

20max kpola tuj kynajb'il kyimni, jatum ate' qe xjal e anq'in tuj tq'ijlalil ojtxi. Kb'elex nxo'ne max t-xe'pun tx'otx' jatum ate' qe tnam o che kub' xitj te jumajx, ex knajala kyxol qeju o che kyim. Mlayx che najan juntl maj qe xjal tuja, ex mlayx jaw b'incha'na juntl maj kyxol qe xjal itz'x qe twitz tx'otx'.

21Ok kylonte xjal jlu b'i'x che jawil sek'paj ti'ja ex b'i'x knajela. Che jyol qe xjal ti'ja ex mlay kneta kyu'n. Aqine Dios in chin q'mante jlu.