Éxodo 19 - Mam Huehuetenango New Ortography

E pon aj Israel t-xe witz Sinaí

1Tuj tnejel q'ij te toxin xjaw kyetzlen aj Israel tuj tx'otx' Egipto, e ul tuj tzqij tx'otx' Sinaí.

2Tej kyik' tuj Refidim, e ul tuj tzqij tx'otx' Sinaí; axtzun e kub' ten tuj tzqij tx'otx' lu ex kub' kyq'o'n kyja t-xe witz.

3Jax Moisés tuk'il Qman Dios, o txokli Moisés tu'n max twi witz ex tzaj tma'n te: Kxel ttx'olb'a'na kye tiyjil Jacob, aqeju aj Israel, kyja':

4—O kyile aju o b'ant wu'ne kyi'j aj Egipto ex tza'n tten ma che ul wi'ne wuk'ile tzalu, mer ik tza'n kyib'aj t-xik' t'iw.

5Ja'lotzun, qa ma chinx kynimane tuj tkyaqil, ex qa ma japun kyu'ne aju yol kyaj b'ant ti'j wu'ne kyuk'ile, che okeltzune te jun k'loj xjal etzan wu'ne kyxol kykyaqil nasyon, porke weye tkyaqil twitz tx'otx'.

6Che okel nq'o'ne te pal tuj nkawb'ile, ex che okele te jun k'loj xjal pa'nmaj te weye. Atzun yol lu kxel tma'na kye aj Israel, chi Dios.

7Kub'iltzun Moisés, e tzaj ttxko'n qe tij xjal kyxol aj Israel, ex xi ttx'olb'a'n kye tkyaqil yol otoq tzaj tma'n Qman te.

8Xitzun kytzaq'we'n kykyaqil xjal junx:

—Tkyaqilju ma tma Qman kb'antel qu'ne, che chi.

Xi tma'n Moisés tkyaqil kyyol xjal te Qman.

9Tzajtzun tma'n Qman te Moisés:

—Chin pole tuk'ila tuj jun piẍ q'eq muj, tu'ntzun kyb'inte xjal ok nyoline tuk'ila ex tu'n t-xi nimana kyu'n te jumajx.

Xi tma'ntl Moisés kyyol xjal te Qman,

10ex tzaj tma'ntl Qman te kyja':

—Tku'xa kyuk'il xjal ex q'manxa kye tu'n tb'aj kyxjansan kyib' ja'lo ex nchi'j, ex tu'n tjatz kytx'jo'n ti'j kyxb'alun,

11tu'ntzun b'anin kyten ka'j, porke ka'j chin kub'ile twi witz Sinaí tu'n tkub' nyek'un wib'e kywitz, aqine Kymane.

12Q'on kub'a jun techal ti'jele witz, ex q'manxa kye kyja': Ten kykwente kyi'je, mi'n che jaxe twi witz, ex mi'n che pon laq'e'ye t-xe witz, ex alkye jun ma tz'ok makonte te, ax tok kymel.

13Alkye jun otoq tz'okx tujxi techal, mi'n txi jun xjal tzyulte te, noq o'kx ab'j ex qa plech kxel xo't ti'j tu'n tkyim; qa xjal ex qa alumaj, noq alkyex, mlay tz'anq'in. Ok tok q'ajtza'n chun nim tuj, maxitzun b'a'n kyjax twi witz, chi Dios.

14Ku'tz Moisés twi witz, kub'il jatum ate'toq qe xjal, e b'aj t-xjansa'n, ex qe xjal jatz kytx'jo'n ti'j kyxb'alun.

15Xi tma'n Moisés kye kyja':

—Kyb'incham kytene te ka'j. Mi'n kub' kymojb'an kyib'e tuk'il kyxu'jile, chi Moisés.

16Tej qsqix tuj toxin q'ij, kub' qoptz'aj tqan q'ankyoq, o julin wen ex kub' juke' q'eq muj twi witz. Tzajtzun q'ajt chun kyuw wen, ex tzaj nim t-xob'il kyi'j kykyaqil xjal ate' tuj campament.

17E jik'tzun tuk'in Moisés qe xjal tu'n kyxi' kanul ti'j Dios ex axtzun e kub' we' t-xe witz.

18Tkyaqil witz Sinaí in b'uqintoq wen tu'n sib', tu'nju otoq kub'il Qman twi' tuj tqan q'aq'. Aju sib' in b'uqintoq twi witz mer ik tza'n sib' tuj jorni, ex tkyaqil witz in lu'luntoq wen.

19Noq jawni jaw tq'ajq'ajel twi chun. Oktzun ten Moisés yolil tuk'il Dios, atzunte Dios in tzajxi ttzaq'we'ntoq tuk'il tq'ajq'ajel twi' kyuw.

20Kub'iltzun Qman twi witz Sinaí, ex jax txko'n Moisés tu'n, tu'n tjax twi witz. Jaxtzun Moisés twi witz,

21ex tzaj tma'n Qman te kyja':

—Tku'xa kyuk'il xjal, ex q'manxa kye tu'n mi'n kyoktz tujtzi techal ex tu'n mi'n kytzaj ke'yilte weye, ok che kymel nimku qa ma che oktz tujtzi techal.

22Ax ikx qe pal in che tzaj laq'e' ntxlaje, il ti'j tu'n kyxjansante kyib' tu'ntzun mi'n kynaj wu'ne.

23Xitzun tma'n Moisés te Qman:

—Mlay che jatz xjal twi witz Sinaí, porke o tzaj tma'na kyja': Q'on kub'a techal ti'jele witz, ex xjansama, chitzuna.

24Tzaj tma'n Qman te:

—Tku'xa ex b'ix ja'wila juntl maj tuk'ix Aarón tuk'ila. Atzun kye pal kyuk'ix qe xjal, mi'n che ik'tz tib'aj techal, ex mi'n che jatz ke'yilte weye, tu'ntzun mi'n kynaj wu'ne, chi Qman.

25Ku'tztzun Moisés ex kub'il kyuk'il xjal, ex xi tma'n yol lu kye.