2 Reyes 9 - Mam Huehuetenango New Ortography

Tej tok Jehú te rey kye aj Israel

1Tzaj ttxko'n Eliseo aju t-sanjel Dios jun ku'xun kyxol jun k'loj t-sanjel Dios, ex xi tma'n te:

—B'incham ttena. Q'inxa tkub'il aseyt lu ex txi'ya tuj tnam Ramot aju at tuj Galaad;

2oktzun tpona ma chixin, b'ix txi'ya jyolte Jehú aju tky'ajal Josafat ex tal tchman Nimsi. B'ix tz'okxa jatum ta', ex k'elel tpa'na kyi'j qe tuk'il ex kxel ti'na tuj juntl ja;

3b'ixtzun tzaj ttzyu'na tkub'il aseyt ex jax tqo'na tuj twi', ex q'manxa te kyja': Chi Qman in tma'n: Aqine chin okel q'onte teya te rey kye aj Israel. B'ixtzun jaqet naj tlamel ja tu'na, b'ix tz'el oqa ex mi'n we'ya.

4Xi'tzun te ku'xun aju t-sanjel Dios max tuj tnam Ramot aju at tuj Galaad,

5ex tejtzun tpon ma chixin, lutoq qe nejenel kye soldad kychmon kyib'. Xitzun tma'n:

—Aya nejenel, at jun nyole teya.

—¿Alkye jun qxole qkyaqile? Chi Jehú xi ttzaq'we'n.

—Te teya, aya nejenel, chi t-sanjel Dios xi tma'n.

6Jawtzun we' Jehú ex okx tuj ja. Jax qo'n aseyt tuj twi' tu'n t-sanjel Dios ex xi tma'n te kyja':

—Ate Qman aju Kydios aj Israel in tma'n kyja': Aya k'okel nq'o'ne te rey kye aj Israel aju tnam etzan wu'ne.

7Tu'na che najel kykyaqil qe tiyjil Acab aju tpatrona, ex kyja'tzun tten kxelil wu'ne aju kychk'el qe nsanjele ex kykyaqil qe nmajene, aju o tz'el chitj tu'n Jezabel.

8Kykyaqil qe tiyjil Acab che najel; wu'ne che najel kykyaqil qe xinaq tiyjil Acab kyxol aj Israel, ex mi jun kyjel anq'in.

9Ikx kb'antel wu'ne kyi'j tiyjil Acab ik tza'n o nb'inchaye kyi'j tiyjil Jeroboam aju tky'ajal Nabat, ex ik tza'n o nb'inchaye kyi'j tiyjil Baasa aju tky'ajal Ahías.

10Atzunte Jezabel, kxel chyo'n kyu'n tx'yan tuj tkojb'il Jezreel, ex mi a'l jun kb'elex maqunte te, chi Qman, chi t-sanjel Dios.

Tej tb'aj tma'n jlu, okxtzun tjaqo'n t-sanjel Dios tlamel ja ex el oq.

11Ex tej tpon meltz'aj Jehú kyxol qeju at kyoklen ttxlaj tpatrón, xi kyqanin qe jlu te:

—¿Ti ma b'aj? ¿Ti ma tzul aj tzkaj xjal lolte tuk'ila? Che chi.

—Ojtzqi'n xjal lu kyu'ne, ax ikx b'a'n kyu'ne tza'n yolin, chi Jehú.

12—Mi'n qo kub' t-sb'u'na, chux q'mantza qeye tkyaqil aju ma tma teya, che chi xi kytzaq'we'n.

Xitzun ttzaq'we'n Jehú:

—Atzun jlu ma tzaj tma'n weye: Chi Qman in tma'n: Aya k'okel nq'o'ne te rey kye aj Israel, chi Jehú.

13Tujxtzunju or lu, teyle junjun kye tzaj kyi'n kyẍjo'w ex kub' kylik'un kyib'aj qe grad tu'n tkub' we' Jehú tib'aj. Jurattzun ok kyq'ajtza'n tkach ẍne'l ex e jaw sch'in kyja': Ate Jehú rey.

Kub' b'yo'n Joram aju rey kye aj Israel tu'n Jehú

14Ate Jehú aju tky'ajal Josafat ex tal tchman Nimsi jaw ti'n tib' ti'j Joram. (Otoq ten Joram kyuk'il kykyaqil aj Israel, tu'n tklet tnam Ramot aju at tuj Galaad, tuj q'oj ok tu'n Hazael aju rey te Siria,

15ex otoq tz'ajtz meltz'aj Joram tu'n tpon tuj tnam Jezreel tu'n tq'anit ẍil ti'j, aju otoq tza'w kyu'n aj Siria tuj q'oj ok tuk'il Hazael.) Xitzun tma'n Jehú kye qe tuk'il: Qa axix tok kyaje tu'n woke te kyreye, mi'n txi kyq'o'ne amb'il tu'n tex jun xjal tuj tnam tu'n t-xi' q'malte tqanil tuj Jezreel.

16Jaxtzun Jehú tuj tcarwaj in ajb'en tuj q'oj, ex xi' tuj Jezreel jatum in q'ananjtztoq Joram. Ax ikx te Ocozías aju rey te Judá otoq pon ke'yilte Joram.

17Tjaxtoq jun xq'uqil twi ja ma' twa'l tuj Jezreel, o til kyja' ttzaj Jehú kyuk'ix jun k'loj xjal uk'in tu'n, ex jaw sch'in kyja':

—At txqan xjal che ul, chi xjal.

Xitzun tma'n Joram tu'n t-xi' jun xjal tib'aj chej kanul kyi'j, tu'n t-xi tqanin kye qa tqanil tzalajb'il q'i'n kyu'n.

18Xi'tzun xjal tjax tib'aj chej kanul ti'j Jehú, ex xi tma'n te kyja':

—Tajb'il rey tu'n tb'inte qa tqanil tzalajb'il q'i'n kyu'ne.

Xi ttzaq'we'n Jehú:

—A jlu minti' toklena ti'j. Chux lpetza wi'je.

Xitzun tma'n ju xq'uqil te Joram:

—Aju sanjel ma pon max jatum ate' qe, ex na'nx tajtz meltz'aj.

19Xi t-sama'n rey juntl xjal tib'aj chej, ex pon max jatum ate' qe, ex xi tma'n:

—Tajb'il rey tu'n tb'inte qa tqanil tzalajb'il q'i'n kyu'ne, chi xjal.

Xi ttzaq'we'n Jehú:

—A jlu minti' toklena ti'j. Chux lpetza wi'je.

20Xi tma'n xq'uqil juntl maj:

—Ax ikx ma pon juntl max jatum ate' qe, ex na'nx tajtz meltz'aj. Ex aju yukulte carwaj mer ik tza'n a Jehú aju tal tchman Nimsi, ex kyuwxix in b'et carwaj tu'n, ik tza'nx tmod.

21Xitzun tma'n Joram:

—Kyb'inchame tten ncarwaje aju in ajb'en tuj q'oj.

B'anttzun tten tcarwaj kyu'n, atzunte Joram aju rey kye aj Israel, tuk'ix Ocozías aju rey kye aj Judá, teylex te junjun okx tuj tex tcarwaj, ex e je'xtzun kanul ti'j Jehú. Atzun ok kyk'ulb'an kyib' tuk'il tuj tx'otx' etzantoq tu'n qtzan Nabot aju aj Jezreel.

22Tejtzun ttil Joram qa a Jehú, xitzun tma'n te:

—¿Tqanil tzalajb'ilpe q'i'n tu'na, Jehú?

Xi ttzaq'we'n Jehú:

—¿Tza'n tten tu'n tten tzalajb'il qa kukx tk'ulun Jezabel aju ttxu'ya kywitz qe tilb'ilal ex kukx tky'a'n?

23Q'ontzun Joram welt ex el oq in sch'intoq ex in tma'n:

—Ocozías, ma jaw ti'n tib' Jehú tu'n tq'ojin qi'j.

24Tzaj ti'n Jehú xob'l tplech, xi t-xo'n jun plech ti'j Joram. Aju plech kyja' xi' ttzal ti'j, exku tuj tanmi, axtzun kub' tz'aq Joram tuj tcarwaj ex kyim.

25Xitzun tma'n Jehú te Bidcar aju onil te:

—Q'i'n etza ex xo'n ku'xa tuj tkojb'il qtzan Nabot aju aj Jezreel, tu'nju na'nx wu'ne, tej lepchix qxi' ti'j Acab aju qtzan tman, atzun tzaj tma'n Qman aju sentens lu ti'j, chi kyja':

26Ik tza'n o wile ew aju tchk'el Nabot tuk'ix kychk'el qe tk'wa'l, ikxtzun kb'ajel ti'ja wu'ne tujx tx'otx' lu, tu'ntzun t-xelin aju tkamik Nabot. Aqine Kymane in chin q'mante jlu, chi Dios tma. Kyja'tzun q'inxa ex xo'n ku'xa tuj tkojb'il Nabot ik tza'n o tma Qman.

Kub' b'yo'n Ocozías tu'n Jehú 2 Crónicas 22.7-9

27Tejtzun ttil Ocozías aju rey te Judá aju otoq b'aj, xitzun oq tuj Bet-hagán. Atzunte Jehú ok lpe' ti'j, ex xi tma'n kye qe tuk'il:

—Ax ikx kyb'yo'nkuye jlu.

B'aj kyk'ixb'isa'n tu'n plech tuj tcarwaj max twitz jawl Gur tb'i, tkub' jatum ta' tnam Ibleam, ex el oq Ocozías ex pon max tuj tnam Meguido, ex atzun kyim ma chixin.

28Te tib'ajxi, xi q'i'n t-ximlal Ocozías tuj jun carwaj kyu'n qe tmajen tu'n tpon tuj Jerusalén, ex atzun okx kymaqu'n tuj jun pantyón ttxlaj kypantyón qtzan t-xe'chel, tuj tnam Ttanmi David tb'i.

29Tzyettzun tkawin Ocozías tuj Judá tuj tjunlajin ab'q'i ttzyetlen tkawin Joram aju tky'ajal Acab.

Tej tkyim Jezabel

30Xi' Jehú tuj tnam Jezreel. Tej tb'inte Jezabel jlu, ok tq'o'n tk'a' ttxo'w twitz, ex b'aj tb'incha'n tten tzmal twi', ex etztzun tke'yin ttzi ventan.

31Tej tpon Jehú ttzi tlamel tnam, xi tma'n Jezabel te:

—¿B'a'npe ta'ya Zimri, aya b'yolte tpatrona?

32Jaxtzun tke'yin Jehú jatum ta' ventan ex tma:

—¿Alkye tq'on tib' wuk'ile?

Kab' ex qa ox xjal at kyoklen tuj tja rey etz kyke'yin ttzi ventan,

33ex xi tma'n Jehú kye:

—Kyxo'n ku'tze xu'j.

Ku'tztzun kyxo'n, ex at tchk'el ok tx'itl twitz ja ex kyi'j chej, ex b'aj kywab'an chej t-ximlal Jezabel.

34Xi'tzun Jehú wa'l ex k'al.

Mas yajxi, xi tma'n kye qe tuk'il:

—Tuj kykwente kyjel ten t-ximlal xu'j mya b'a'n lu, ex kymaqun ku'xe ex tme'jel jun rey jlu, chi Jehú.

35Tejtzun kyxi' maqulte te, o'kx tb'aqil twi' knet kyu'n, kyuk'ix qe tqan ex qe tq'ab'.

36E ajtzun meltz'aj q'malte te Jehú, ex xi tma'n Jehú kye:

—A jlu ojtxi tma Qman, ik tza'nx o tma Elías aju tmajen, aju aj Tisbe, qa tx'yan tu'n kyxi chyo'nte tchib'jal Jezabel tuj kojb'il tuj tnam Jezreel,

37ex aju t-ximlal tu'n tb'aj sputj ik tza'n kytxa' alumaj tuj kojb'il tuj tnam Jezreel, okxi tkub' naj, ex ya mi jun tu'n tel tnik' ti'j qa a t-ximlal Jezabel jlu, chi Jehú.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help