1 Samuel 10 - Mam Huehuetenango New Ortography

Ok q'o'n toklen Saúl tu'n Samuel te rey kye aj Israel

1Tzajtzun ti'n Samuel jun tal botey aseyt ex jax tqo'n tuj twi Saúl, el ttz'ub'an Samuel twitz Saúl ex tma:

—A Qman ma jaw sk'onte teya tu'n toka te kawil kyib'aj aj Israel, aqeju etzan tu'n.

2Atzun ja'lo, ok tb'aj qpa'n qib', che okel noj kab'e xinaq twitza, niqayin ttxlaj tpantyón Raquel tuj lugar Selsa tb'i, tuj kytx'otx' tiyjil Benjamín. Atzun qe che tzajel q'mante teya qa ma che knet qe ttxu bur, aqeju in jyona kyi'j, ex minti'tl in b'isun tmana kyi'j, noq o'kx in b'isun kyi'je, ex in tma'n: ¿Ti k'okel ti'j nky'ajale? Chi tmana.

3Ok t-xi laq'e' ch'intla, ok tpona t-xe' jun tze' k'ol tuj lugar Tabor, k'okel tk'ulb'an tib'a kyuk'il ox xinaq kyja' kyjax tuj Betel tu'n kyk'ulun te Dios. Jun q'i'n ox chip tu'n, juntl q'i'n ox pan tu'n, ex atzunju toxin q'i'n jun bols tz'u'm tu'n, nojni tu'n ta'l twitz uva.

4Ktzajel q'olb'e'na kyu'n, ex ktzajel kyq'o'n kab'e pan teya. B'ix tzaj tk'mo'na.

5Te tib'ajxi jlu kpola tuj tnam Gabaa twi jun tal witz jatum in xi q'ot chojb'il te Dios, jatum kykub'sa'n txqan soldad te xq'uqil kyu'n aj Filisteo. Oktzun tokxa tuj tnam, k'okel tk'ulb'an tib'a kyuk'il jun k'loj t-sanjel Dios in che yolin ti'j yol in tzaj tma'n Dios kye, kyja' kyku'tz tuj lugar te k'ulb'il, nejniqe xjal kywitz tuk'il kitar ex tal tampor ex tuk'ix xux ex tuk'ix arpa nno'k kyu'n.

6Knojela tu'n T-xew Qman, ex k'okel tena yolil ti'j ju yol ktzajel tma'n Dios teya ik tza'n kye t-sanjel Dios, ex b'i'x kch'expetela.

7Oktzun tjapun tkyaqilju techal lu, b'inchama noq alkye taja tu'n tb'ant porke ate Dios ktel tuk'ila.

8Ex txi neja nwitze tuj Gilgal, jatum tu'n ntene junx tuk'ila mas yajxi, tu'ntzun kykub' patit qe alumaj te chojb'il te Dios, ex tu'n kyxi q'ot qe oyaj te mojb'ab'l tib'il. B'ix ayona wuq q'ij ma chixin okxi npone, maxitzun kxel nma'ne teya aju kb'antel tu'na, chi Samuel.

9Tej tb'aj kyq'olb'en kyib' Saúl tuk'il Samuel, o ch'expet naj tanmi Saúl tu'n Dios, ex tujx q'ij lu o japun tkyaqil techal aju o tma Samuel te.

10Te tib'ajxi jlu, tej kypon Saúl tuk'ix tmajen tuj Gabaa, e b'je'tz txqan t-sanjel Dios kanul ti'j. O nojtzun Saúl tu'n T-xew Dios, ex ok ten yolil ti'j ju yol in tzaj tma'n Dios te ik tza'nx kye t-sanjel Dios.

11Kykyaqil qe xjal ojtzqi'maj Saúl kyu'n, tej kyke'yinte ajun Saúl in yolin ti'j ju yol in tzaj tma'n Dios te, junx kyuk'il t-sanjel Dios, kyma kyxolx: ¿Ti ma b'aj ti'j tky'ajal Cis? ¿Maj tuk'ix Saúl tok te t-sanjel Dios?

12Ax jun kyxol qe xjal q'mante juntl yol: ¿Alkyetzun nejenel kye jlu?. Atzun tzaj jlet ju tal twitz yol lu: ¿Maj tuk'ix Saúl tok te t-sanjel Dios?

13Tb'ajlenxitzun yolin Saúl ti'j ju yol in tzaj tma'n Dios te, aj ex pon tuj lugar te k'ulb'il twi witz.

14Atzunte terman tman Saúl ok ten qanil te ex teju tmajen:

—¿Jatum ẍe'x aje?

Atzunte Saúl xi ttzaq'we'n:

—Xqo'x aje jyolte qe ttxu bur. Ex tu'nju minti' e knet qu'ne, txuk o'xe tuk'il Samuel.

15Atzunte terman tman Saúl xi ttzaq'we'n:

—¿Titzun o tma Samuel? B'inchama xtalb'il, q'mantza weye.

16Atzunte Saúl xi ttzaq'we'n te terman tman:

—Clarxix tzaj tma'n qeye qa otoq che knet qe ttxu bur.

Ex minti' xi tma'n Saúl qa attoq tokel te rey, aju otoq yolin Samuel ti'j.

17Te tib'ajxi e tzaj ttxko'n Samuel qe aj Israel tu'n kypon tuj lugar Mizpa, tu'ntzun kyb'inte aju attoq ttzajel tma'n Qman kye,

18ex atzun xi tma'n kye aj Israel:

—Ate Qman aju Qdios aj Israel qo' chi kyja': Aqine in etz q'inte kyeye tuj Egipto, aqeye aj Israel, ex e klete wu'ne tuj kyq'ab' aj Egipto ex tjaq' kykawb'il txqantl nasyon e yajlante kyeye, chi Qman.

19Atzun kyeye ma tz'el kyik'une Kydiose aju ma klonte kyeye tuj tkyaqilju in tzaj kyi'je, ex tuj yajb'il kyeye, ex ma tz'el kyik'une tu'nju in che qanine ti'j tu'n tok jun rey te kawil kyib'aje. Ja'lotzun che laq'etze twitz Qman, teylex junjun k'loj kyiyjile, chi Samuel kye.

20Xitzun tma'n Samuel tu'n kypon laq'e' kykyaqil k'loj aj Israel, ex kyib'aj tiyjil Benjamín kub' tz'aq swert, ex atzun qe e jaw t-sk'o'n Qman kyxol txqantl k'loj kyiyjil.

21Xitzun tma'ntl Samuel tu'n kypon laq'e' qe tiyjil Benjamín, ex kyxoltzun kykyaqil tiyjil Benjamín jaw sk'o'n tiyjil Matri, ex kyxol tiyjil Matri, jaw sk'o'n Saúl aju tky'ajal Cis. E je'xtzun qe xjal jyolte Saúl ex minti' o knet kyu'n,

22kyja'tzun, e ok ten qanilte juntl maj te Qman tu'ntzun kyb'inte qa ax ta' Saúl. Atzunte Qman tzaj ttzaq'we'n: Lu Saúl at tewan tib' kyxol qe iqtz.

23E je'xtzun qelan q'ilte te kyxol iqtz. Tejtzun tpon Saúl kyxol xjal, o kyil mi jun aj Israel in pon twa'l ik tza'n te, noq o'kx in japun kywa'l twi t-semil.

24Atzunte Samuel xi tqanin kye kykyaqil xjal:

—¿Mape kyile aju xjal ma jaw t-sk'o'n Qman tu'n tok te rey? Mi jun aj Israel jaku pon ik tza'n te.

Atzun kye aj Israel e jaw sch'in kyja':

—B'a'nwt tz'el tq'ij rey.

25Xi tchik'b'a'n Samuel kywitz kykyaqil xjal aju ley te kawb'il, kub' ttz'ib'an tuj jun libro, ex okx tq'o'n tuj ja xb'alun te Qman. Tb'ajlenxitzun jlu, xi tma'n Samuel kye kykyaqil xjal tu'n kyaj kyja.

26Ax ikx te Saúl aj meltz'aj tja max tuj Gabaa, ex o yolin Dios tuj kyanmi txqan xinaq kyuw kyk'u'j tuj q'oj tu'n kyxi' te tuk'il.

27Atzun qe xjal mya b'a'n kymod kyma kyja': ¿Maj atzun jlu ok klolte qe? Ex el kyik'un ex minti' oyaj xi kyq'o'n te; atzunte Saúl, minti' o q'ajt.