Job 15 - Mam Huehuetenango New Ortography

Yolin Elifaz tkab'maji'n tuk'il Job

1Xitzun ttzaq'we'n Elifaz aju aj Temán ex tma:

2Aju xjal at tnab'l minti' in tzaj ttzaq'we'n tuk'il jun yol noqx gan, ex minti' in tma'n jun yol minti' ttxolil;

3minti' in tklon tib' tu'n yol noqx gan ex tu'n yol minti' tajb'en.

4Tu'n tyola mya tuj tumel mlay che nimantl xjal twitz Dios; ex mlay che na'ntl Dios.

5Tu'n t-ximb'etza mya b'a'n in yolina ikju, ex in ajb'en ju yol te sb'ub'l tu'na.

6Mya il ti'j tu'n t-xi nma'ne at tila, ex tu'nx ju yol in tma'na in tchik'b'ana at tila.

7¿Maj in ximana ti'j qa aya tnejel xjal b'ant tu'n Dios twitz tx'otx', ex qa minti'toq qe witz ate' tej tb'anta tu'n Dios?

8¿Ope tena kyxol qe q'ol nab'l ttxlaj Dios, ex o'kxpe teya at tnab'la twitz tx'otx'?

9¿Alkye b'a'n tu'na aju minti' b'a'n qu'ne? ¿Alkye tzqi'n tu'na aju minti' tzqi'n qu'ne?

10Qxole at qe tij xjal wen, mas tij xjal qe twitz tmana.

11¿Maj ch'in nne'la tuj twitza tu'nju ax Dios in q'uqb'ante tk'u'ja ex cheb'a in qo yoline teya?

12¿Tiqu'n noq in tx'a'l ti'j tk'u'ja, ex tiqu'n in che etz wakpaj qe tb'aq' twitza tu'n tq'oja?

13¿Tiqu'n in tzaj ttx'u'jila ti'j Dios ex nimxix tyola mya b'a'n in tma'na ti'j?

14Minti' jun xjal saq tuj tanmi ex minti'wt tpaltil.

15Milpe kyi'j qe t-anjel minti' nno'k qe' tk'u'j, ex mya'lpe saq nne'l ju kya'j tuj twitz,

16pyortzun te xjal jumajx tz'il ex ik'b'il, in pon tk'u'j ti'j mya b'a'n ik tza'n jun xjal in k'an a' ok ttzaj txqetle'n ti'j.

17Chin tb'intza, kxel nma'ne teya aju ma tz'el nnik'e ti'j,

18aju o tzaj kytx'olb'a'n qeye qe xjal at kynab'l. O tz'el kykano'n kyi'j qe kyxe'chel,

19aqeju o'kxku kye xi q'o'n tx'otx', ex minti' b'aj kysmon kyib' kyuk'il qe stranjer xjal.

20Tuj tkyaqil tanq'ib'l xjal mya b'a'n, nim yajb'il in tzaj ti'j. Aju xjal in yajlan kye txqantl, mya ma' tuj tq'ij.

21B'i'x in sek'paj tu'nju tq'ajq'ajel in tb'i'n; aju q'ij mas b'a'n ta' tna'n, atzun q'ij in che ok tzoqpaj qe eleq' ti'j.

22Minti' tumel tu'n ttzoqpaj tuj qlolj; b'anin tten jun spad ti'j tu'n tkub' b'yo'n.

23K'ajb'el t-ximlal te kychi' k'utz; b'i'n tu'n mlay tzik'x ti'j tu'n tnaj.

24Ok ttzaj qlolj nim kjawil xob', ktzajel nim tb'is ex ktzajel b'aj tk'u'j, ik kyten jlu ik tza'n jun rey b'anin tten tu'n tok tzoqpaj q'ojlel.

25Atzun jlu in b'aj ti'j ju xjal in jaw ti'n tib' ti'j Dios, ex in jaw tniman tib' twitz Dios aju at tipumal tu'n tb'ant tkyaqil tu'n,

26nno'k tzoqpaj ti'j Dios, ex tokx jun maqb'il tuj tq'ab' te tkolb'il tib'.

27Puro gord qe tq'o'tx ax ikx tk'u'j.

28Qe tnam jatum najl che b'el xitj; kyjel kykolin xjal kyja ex noq tuj b'yujin che kyjel ten qe ttx'aqan.

29Mlay tz'ok q'inun te ela' q'ij, ex mlay chmet tq'inumab'l.

30Mlay tzoqpaj tuj qlolj. Ik k'okel ik tza'n jun awal in tz'e'y t-xul tu'n q'aq' ex in xi iqan t-xmakal tu'n kyq'iq'.

31Mi'n tz'ok qe' tk'u'j ti'j ju noqx gan, qatzun ma qe' tk'u'j ti'j, axte kb'el sb'u'n.

32Ik k'okel ik tza'n jun tze' na'nxtoq tpon tq'ijlalil kb'el tzqij tq'ab' ex mlay tzaj t-xul.

33Ik tten ik tza'n jun tq'ab' uva mlay q'anax twitz, ik tza'n tze' olivo nne'l tz'aq t-xmakal.

34Qe xjal mya b'a'n mlay tzaj kyiyjil, ex kb'el tz'e'y kyja tu'n q'aq' tu'nju otoq che q'inumax tu'n pwaq mya tuj tumel nne'l kyqanin kye xjal.

35Qe xjal lu in kub' kyximan tu'n kyb'inchante mya b'a'n, ex atzun in b'ant kyu'n. Ex nojni tuj kyanmi tu'n sb'ub'l.