Isaías 24 - Mam Huehuetenango New Ortography

Aju jwisi ktzajel tib'aj tkyaqil twitz tx'otx'

1Kyb'intze, knajel tkyaqil twitz tx'otx' tu'n Qman, kb'ajel tq'uchin, kb'ajel ttzpet-sa'n ex che b'ajel t-sputun qe xjal najl twitz.

2Aju kb'ajel kyi'j pal axju kb'ajel kyi'j xjal, aju kb'ajel kyi'j patrón xinaq axju kb'ajel kyi'j majen xinaq, aju kb'ajel kyi'j patrón xu'j axju kb'ajel kyi'j majen xu'j, aju kb'ajel kyi'j qe xjal in che laq'on axju kb'ajel kyi'j qe xjal in che k'ayin, aju kb'ajel kyi'j qe xjal b'a'n che q'on ch'ex axju kb'ajel kyi'j qe xjal in che k'monte ch'ex, aju kb'ajel kyi'j qe xjal k'asb'enal axju kb'ajel kyi'j qe xjal in che q'onte kych'ex.

3B'i'x knajel tkyaqil twitz tx'otx', b'i'x k'elex b'aj kyi'n tkyaqil aju at tuj, ex atzun jlu ma tma Qman.

4Ma tzqij tkyaqil twitz tx'otx' ik tza'n qe awal in che kub' motx'j, enter twitz tx'otx' tuj b'is ta' ex jumajx ma b'aj motx'j; qe xjal ma'xix kyoklen twitz tx'otx' ate' tuj b'is.

5Aju tx'otx' ma tz'ilix kyu'n qe xjal najl twitz porke minti' ma che japun qe ley kyu'n, ma che ik' kyib'aj qe mandamyent, ma che ik' tib'aj ju yol kyaj b'ant ti'j kyuk'il te jumajx.

6Tu'ntzun jlu ma kub' tcastiw tx'otx' tu'n Dios ex ma naj. Qe xjal najl twitz ma kub' kycastiw tu'n tlaj kyil. Kyja'tzun, qe xjal najl twitz tx'otx' ma kub' naj kyb'et ex noq nik'xi xjal atx.

7Minti'tl ta'l twitz uva, ma che kub' motx'j qe tqan uva, qe xjal in che anq'intoq tuj tzalajb'il nej, ma tzaj nim kyb'is.

8Ma b'aj twi' tzalajb'il tu'n tq'ajq'ajel kywi' qe tampor ex qe chnab' arpa, ex ma we' tq'ajq'ajel kywi' qe xjal nim in che achin.

9Mi'ntl che k'an vin tuk'il kyq'ajq'ajel qe b'itz; aju kyk'a xjal q'e'n k'okel te k'a.

10Aju tnam ma b'aj xitj, noq ttx'aqan ma kyaj b'uye', kykyaqil kylamel ja lamo'n tu'n mi'n kyokx xjal.

11In che oq' xjal kyuj cay tu'n tlaj minti' kyk'a vin; tkyaqil kytzalajb'il xjal ma b'aj, ma kub' naj ju tzalajb'il at twitz tx'otx'.

12Aju tnam ma kub' xitj, noq ttx'aqan ma kyaj b'uye', aju tlamel tnam b'i'x ma b'aj b'uchj.

13Iktzun kb'ajel kyuj kykyaqil nasyon ate' twitz tx'otx', ik tza'n in ku'tz yukut twitz olivo ex qa ik tza'n ok in jaw sukwi'n qe twitz uva tkub'lenxi b'aj twitz.

14Atzun qe ch'intl xjal che kyjel anq'in, che jawil sch'in tu'n tzalajb'il, kjawil tq'ajq'ajel kywi' max tuj telex q'ij ok kylonte aju tajwalil Qman ma'xix.

15Ax ikx tuj tjawitz q'ij ex kyuj qe tnam ate' ttzi mar kxel kyq'o'n nimb'il te Qman aju Kydios aj Israel.

16Max ttxa'npun tx'otx' ma qb'iye lu qe xjal in che b'itzan: Nimanxwit tb'i ju tz'aqlxix, che chi.

Atzun weye xi nma'ne kyja': B'ek'b'il nwitze, b'ek'b'il nwitze. Qe xjal b'inchal mya b'a'n in kyb'incha'n aju jumajx mya b'a'n.

17Qe xjal najl twitz tx'otx', ik che okel ik tza'n qe jil lajo'n kyu'n xjal b'a'n che kamb'an, ex at xob'ajil kyi'j tu'n kyxi tz'aq tuj jun jul ex qa tuj jun k'ob'il.

18Aju xjal nne'l oq twitz xob'ajil kyu'n kamb'al kxel tz'aq tuj jul, aju xjal kjawitz tuj jul kb'el tz'aq tuj k'ob'il. Ktzajel jun q'eqab' twitz kya'j ex che tzajel lu'lun qe tq'uqb'il tx'otx'.

19Ktzajel lu'lun tx'otx' kyuwxix wen, kb'ajel pax ex kb'ajel b'uchj.

20Ktx'ayjeb'il ik tza'n jun xjal k'al q'e'n, kb'ajel yukun ik tza'n jun tal pach in yukch tu'n kyq'iq'. Nimxix kyil xjal ik tza'n jun iqtz alxix, kyja'tzun kb'el tz'aq enter twitz tx'otx' ex mlay jaw we'tl.

21Tuj tq'ijlalil tzul kb'el tq'o'n Qman kycastiw qeju at kyipumal ate' twitz kya'j, kyuk'ix qe rey ate' twitz tx'otx'.

22Che okel tchmo'n ex che okex tjapu'n tuj jun calabós, che okex tpresin, ex tb'ajlenxi nim q'ij kb'eltzun tq'o'n kycastiw.

23Oktzun ttzyet tkawin Qman aju Tajaw Tkyaqil twi witz Sión tuj Jerusalén, k'okel qlolj twitz q'ij tuk'ix xjaw, ex qe kytijil xjal ate' tuj tnam k'okel kyke'yin tajwalil Qman.