Salmos 107 - Mam Huehuetenango New Ortography

Aju tk'ujlalil Qman Dios kukx tten

1Kyq'onxe chjonte te Qman tu'nju b'a'n te ex kukx k'ujla'n qo' tu'n te jumajx.

2Kymanxe jlu aqeye ma che klet tu'n Qman ex ma che klete tuj kyq'ab' aj q'oj,

3aqeye ma che ajtz chmo'ne tu'n kyuj txqantl tnam te jawni ex te kub'ni, te okni ex te elni.

4At junjun otoq che'x tzpet tuj tzqij tx'otx' minti' kynajb'il xjal tuj, ex minti' knet jun b'e kyu'n tu'n kypon tuj jun tnam jatum tu'n kynajan;

5tzaj we'yaj ex txqetle'n kyi'j, ex ch'ixtoq kynaj,

6pero tu'nju nim kyb'is e ok ten kub'sal twitz Qman ex e klet tuj b'is tu'n;

7e je'xtzun ẍaqlu'n tu'n tuj jun b'e jiqun ti'j tu'n kypon tuj jun tnam jatum tu'n kynajan.

8B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

9Porke nne'l txqetle'n kyi'j xjal tu'n, ex in xi tq'o'n nim kywa qeju nne'l kyk'u'j.

10At junjun najltoq qe tuj jun nintz qlolj, presintoq qe tu'n caden ex ate'toq tuj b'is.

11Tzaj jlu kyi'j tu'nju minti' xi kyniman tyol Qman aju Ma'xix Toklen, ex el kyik'un aju t-ximb'etz b'a'n kyi'j.

12Kub' tq'o'n Dios jun aq'untl kyuwxix kyib'aj, e jaw tz'aq ex mi jun onin kyi'j.

13Pero tu'nju nim kyb'is e ok ten kub'sal twitz Qman ex e klet tuj b'is tu'n;

14e je'tz q'i'n tu'n tuj nintz qlolj ex e je'l tko'pin tuj caden.

15B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

16B'aj tpa'n qe tlamel ja q'an k'uxb'il, ex e kub' ttoqin qe k'uxb'il toksa'n ttzi tventanil pres.

17At junjun e yab't ex tzaj yajb'il kyi'j tu'n tlaj kyb'inchb'en mya b'a'n ex kyil,

18tk'i'toq kyk'u'j ti'j wab'j tu'nju ch'ixtoq kykyim.

19Pero tu'nju nim kyb'is e ok ten kub'sal twitz Qman ex e klet tuj b'is tu'n;

20tu'nju tyol tzaj tma'n, b'i'x e b'anix ex e klet tu'n te kamik.

21B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

22B'a'n tu'n t-xi kyq'o'n oyaj te, te aq'b'il chjonte, ex tu'n kyb'itzan tu'n tzalajb'il ti'j tb'inchb'en.

23At junjuntl e je'x aj jyol kyk'a'ẍ ttzi mar, ex in che b'et tib'aj mar tuj kybarc,

24o kyil aju tb'inchb'en Qman ma' t-xilen tib'aj mar.

25Tej ttzaj yolin Qman, tzaj jun nintz kyq'iq' ex jaw pulwin mar tu'n;

26qe barc in che jaw iqan leq'ch wen tu'n a', ex in che ku'x aj max t-xe a' in jaw pulwin, b'i'x tzaj b'aj kyk'u'j qe xjal q'il barc tu'n tlaj a' xob'ajilxix.

27In che pich'je' ik tza'n k'al q'e'n; maske at nim kynab'l tu'n kyyukun barc pero ok te noqx gan.

28Pero tu'nju nim kyb'is tzaj e ok ten kub'sal twitz Qman ex e klet tuj b'is tu'n.

29B'i'x take' kyq'iq' tu'n Qman ex minti' jaw pulwintl mar.

30Tej kyke'yinte kub' nume' mar, e jaw tzalaj ex e pon q'i'n tu'n Dios max tuj tnam tkub' ttzi mar, jatum ximan kyu'n tu'n kypon.

31B'a'n tu'n t-xi kyq'o'n chjonte te Qman tu'nju at tk'ujlalil, ex ti'j t-xtalb'il in tb'incha'n kyi'j xjal.

32B'a'n tu'n tjaw kynimsa'n tb'i ok tok kychmon kyib' xjal, ex tu'n t-xi kyq'o'n chjonte te ok tok kychmon kyib' qe kytijil xjal.

33In che aj tzqij qe nima ex qe twi a' tu'n Qman ex in che ok te tzqij tx'otx'.

34In che ok qe tb'anil tx'otx' tu'n te meb'a tx'otx' tu'n tlaj kyb'inchb'en xjal mya b'a'n, aqeju najl twitz;

35aju tzqij tx'otx' nno'k te nintz najab' tu'n, ex atzun in che jatz jlet qe twi a' tuj,

36atzun in che kub' tq'o'n qeju minti' in kanun kywa, ex in jaw kyb'incha'n kytanmi tuj.

37In ku'x kyawa'n kyawal tuj kojb'il, in ku'x kyawa'n tqan uva, ex nim twitz kyawal in jaw kychmo'n.

38In che kub' ky'iwla'n tu'n Qman, in chmet kyb'aj ex in che chmet qe kyalun.

39Qatzun ma che kyim ex qa noq nik'x kyb'aj in kyaj ten tu'n tlaj yajb'il kye kyu'n txqantl xjal, ex tu'n tlaj kyb'is ex tu'n tlaj k'ixk'oj in tzaj kyi'j,

40nne'ltzun tik'un Dios qeju in che yajlan kye, ex in che takpaje' tu'n tuj lugar minti' kynajb'il xjal tuj, jatum minti' b'e.

41In che klet qe meb'a xjal tu'n, tu'n mi'n kyten tuj b'is, ex in chmet mas kyb'aj tu'n, ik tza'n txqan ẍne'l.

42Ok kyke'yinte qe xjal tz'aqlxix tkyaqil jlu in che jaw tzalaj, atzun qeju b'inchal mya b'a'n minti'tl in che q'ajt.

43Aju xjal at tnab'l, b'a'n tu'n tok tkwent ti'j jlu, ex b'a'n tu'n tel tnik' ti'j tk'ujlalil Qman.