1 Crónicas 17 - Mam Huehuetenango New Ortography

Aju yol kyaj b'ant ti'j tu'n Dios tuk'il David 2 Samuel 7.1-29

1Tej otoq pon b'ant rey David tuj tja, xi tma'n te Natán aju t-sanjel Dios:

—B'intza, aqine najl qine tuj jun ja puro tb'anil tze' wi'ten, atzunju kax k'ub'l tley Dios tokxsa'n tuj jun ja xb'alun.

2Atzunte Natán xi ttzaq'we'n:

—B'inchama tkyaqil ik tza'nx ma kub' t-ximana, porke a Dios tuk'ila.

3Ex tujx qonik'an lu, tzaj tma'n Dios te Natán kyja':

4Txi'ya tuk'il nmajene David ex q'manxa te: Chitzun Qman in tma'n teya: Mya aya kjawil b'inchante jun njaye tu'n ntene tuj.

5Atxix tuj q'ij tej kyetz wi'ne aj Israel tuj Egipto, ex kukx ja'lo, mi jun maj ma chin tene tuj jun ja tb'anil; noq o'kx ma chin tene tuj ja xb'alun ex noq ma chin b'etje'ye.

6Atxix ojtxi o chin b'ete kyuk'il aj Israel, ok nq'o'ne qe nejenel kyxol tu'n kykawin kyib'aj, ex mi jun maj o txi nma'ne kye tu'n tjaw kyb'incha'n jun ja te k'ulb'il weye, aju puro tb'anil tze' wi'ten.

7Kyja'tzun, q'manxa te nmajene David: Aqine Dios aju Tajaw Tkyaqil in xi nma'ne jlu te: Ma tz'el wi'ne tu'n mi'n tpastorintla kyi'j ẍne'l tuj kojb'il, tu'n toka te nejenel kye aj Israel, aqeju etzan wu'ne,

8ma chin b'ete junx tuk'ila noq alkyex lugar jatum ma tzik'a tuj; ax ikx o che kub' b'aj nb'yo'ne qe aj q'oj, aqeju e ok tzoqpaj ti'ja, ex k'elel tqanila wu'ne tu'n kyb'inte xjal qa ma' toklena, ik tza'n qe xjal ma' kyoklen ate' tuj tkyaqil twitz tx'otx'.

9Ax ikx o b'aj nb'incha'ne jun lugar jatum tu'n kynajan aj Israel tuj, aqeju etzan wu'ne, ex ax ma che kub' nq'o'ne tu'n kynajan tuj kyex kytx'otx', tu'ntzun mi jun tu'n tlab't kyi'j, ex mlay che yajlanjtz juntl maj kyu'n qe xjal b'inchal mya b'a'n, ik tza'n nej,

10tej kyok nq'o'ne qe nejenel tu'n kykawin kyib'aj qe xjal etzan wu'ne, aqeju aj Israel. Wu'ne kb'el kyi'j kykyaqil aj q'oj ti'ja ex che kyjel ten tjaq' tkawb'ila. Ax ikx kxel nma'ne teya, kchmetel kyb'aj qe tiyjila wu'ne.

11Oktzun ttijina ex ok tkyima, aqine chin okel q'onte jun tky'ajala te rey, ex kkyuwsetel tkawb'il wu'ne,

12ex atzunte kjawil b'inchante jun ja te k'ulb'il weye, ex aqine chin kyuwsalte tkawb'il te jumajx.

13Aqine chin okel te tman ex atzunte k'okel te nk'wa'le. Ex mlay tz'el npa'ne nk'ujlalile ti'j ik tza'n o b'ant wu'ne ti'j rey ten nej twitza;

14noq o'kx kkyuwsetel wu'ne tuj njaye te jumajx ex tuj nkawb'ile, ex kyxol qe tiyjil kukx kjawil nsk'o'ne jun tu'n tok te rey te jumajx, chi Qman, tzaj tma'n te Natán.

15Xi ttx'olb'a'n Natán tkyaqil jlu te David cabalxix ik tza'nx otoq til ex otoq tb'i.

16Atzunte rey David okx yolil tuk'il Qman ex tma kyja': Nman Dios, ¿alkyetzun qine ex ti kyoklen qe wiyjile, tu'nju ma tzaj tq'o'na woklene te rey?

17Ex mya ma' ma tz'ela jlu tuj twitza, Nman Dios; ax ikx ma tzaj tma'na aju kb'ajel kyi'j qe wiyjile tuj tq'ijlalil tzul, qa che okel te rey. Ma chin ok tq'o'na ik tza'n jun xjal ma' toklen.

18¿Alkye mas yol b'a'n txi nma'ne teya tu'nju ma chin ok tq'o'na te jun xjal ma' toklen? Porke b'a'n tu'na alkye qine, aqine tmajena.

19Aya Nman, noq tu'nju at tk'ujlalila wi'je, ex ik tza'nx tajb'ila, ma tb'inchaya tkyaqil tb'inchb'ena ma'xix kyxilen tu'n tel nik'b'aj kyi'j.

20Aya Nman Dios, mi a'l juntl ik tza'n teya, ex mi a'l juntl Dios at, noq o'kx aya, ik tza'n tkyaqilju o qb'iye ti'ja,

21ex minti' juntl nasyon ik tza'n kye aj Israel, aqeju etzan tu'na, porke o'kxku junx nasyon lu sk'o'maj tu'na tuj tkyaqil twitz tx'otx'. Tu'na ma che tzoqpet tu'n kyok te jun tnam etzan tu'na, ex ma tz'el tqanil kyi'j qe tb'inchb'ena nim kyipumal ex ma'xix kyxilen. Tej kyetz tkolpi'na tuj Egipto e ik' tlajo'na qe txqantl nasyon kywitz,

22ex tu'na ma che ok qe aj Israel te jun tnam etzan tu'na te jumajx; atzun teya, Nman, ma tz'oka te Kydios.

23Kyja'tzun Nman Dios, kyuwsama ju yol ma tzaj ttziyana weye ex kye qe wiyjile che ul itz'j te tib'ajxi, ex japunx tu'na aju ma tmaya.

24Ex aju yol tzaj ttziyana, kuchiwt tu'n tjapun tu'na, ex aju tb'iya kuchiwt kukx tu'n tjaw nimset te jumajx ex tu'n tq'manjtz kyja': Ate Qman aju Tajaw Tkyaqil, atzun Kydios aj Israel, ex atzunju axix tok Kydios aj Israel. Ex kuchiwt tu'n mi'n kykub' yupj qe wiyjile che ul itz'j te tib'ajxi.

25Aya Nman Dios, ma tzaj tma'na weye qa che kyuwsetel qe wiyjile tu'na tu'n kyok te rey; tu'ntzun jlu, maske tmajena qine, ma nnimarin wib'e tu'n nkub'sane twitza.

26Ja'lo Nman, aya Dios ma tzaj ttziyana tu'n ttzaj tq'o'na nimxix t-xtalb'ila weye,

27kuchiwt b'a'n ma tz'ela tuj twitza tu'n tkub' tky'iwla'na qe wiyjile che okel te rey te tib'ajxi, ex kukx tu'n kyten twitza. Aya Nman, ma che kub' tky'iwla'na, ex kukx che kb'el ky'iwla'n te jumajx.