Ezequiel 42 - Mam Huehuetenango New Ortography

Qe ja ate' ttxlaj tja Dios

1Te tib'ajxi in pon q'ine tu'n xinaq tuj tnejel ttxa'n pe'n ti'jxi tja Dios, aju tkub' tuj tumlal tb'anq'ab' q'ij, ex in okx q'i'ne tu'n kyuj qe cuart kykub' tuj tumlal tb'anq'ab' q'ij, twitz ttxa'n pe'n pe'nin ti'j ax ikx twitz ja tkub' ti'jxi tja Dios.

2Jatum kykub' qe ja lu, attoq 50 metro tnuqb'il tuj tumlal tb'anq'ab' q'ij, ex 25 metro twitz.

3Tuj jun pak' kytxlaj kyja' xi'yni tumlal tkab'in ttxa'n pe'n aju attoq laj metro twitz, atzun juntl pak' kytxlaj kyja' xi'yni tumlal tnejel ttxa'n pe'n aju lo'tzintoq xaq twitz tx'otx' tuj, attoq ox kol, ex teyle junjun kol attoq jatum tu'n qb'et twitz ex kykub'sa'ntoq kywitz juntl ox kol.

4Kywitz qe cuart attoq jun cay te jwe' metro twitz ex 50 metro tnuqb'il max tujxi. Qe kylamel cuart kyja' xi'yni kywitz tuj tumlal tb'anq'ab' q'ij.

5Qe cuart ate' tuj toxin kol ja mas ch'in qe kywitz qeju ate' tuj tkab'in kol ex tuj tnejel kol, porke aju jatum tu'n qb'et kywitz qe cuart tuj toxin kol, mas ma' twitz twitz ju tuj tkab'in kol ex tuj tnejel kol.

6Qe cuart lu te ox kolin kyten, ex minti'toq kyqan ik tza'n qe txqantl cuart ate' ttxa'n pe'n, noq o'kx qe cuart te toxin kol mas ch'in kyuj kywitz qe cuart te tkab'in kol ex tnejel kol.

7Tkub'sa'ntoq jun muro ttxa'n tnejel ttxa'n pe'n ex kywitz qe tal cuart, ex attoq 25 metro tnuqb'il.

8Aju tnuqb'il jatum kykub'sa'n qe tal cuart ttxlaj tnejel ttxa'n pe'n attoq 25 metro. Atzun tnuqb'il jatum kykub'sa'n qe tal cuart ttxlaj tja Dios attoq 50 metro.

9Tuj tnejel kol cuart attoq jun ttzi ja tkub' tumlal tjawitz q'ij jatum in che okx xjal in che tzaj tuj tnejel ttxa'n pe'n.

10Twitzile muro tuj tnejel ttxa'n pe'n tuj tumlal tnayaj q'ij ax ikx attoq qe cuart kykub'sa'n twitz ttxa'n pe'n pe'nin ti'j, ax twitz ju ja tumlal telex q'ij te tja Dios;

11junx ta' b'inchb'en kye ex junx ta' echb'in kye ik tza'nx qe cuart ate' tuj tumlal tb'anq'ab' q'ij, ex qe ttzi ja ikx kyten ik tza'nx qe ttzi ja ate' tuj tumlal tb'anq'ab' q'ij, ex attoq jun cay nno'kx kywitz.

12Tu'n tpon jun xjal jatum ate' qe cuart tuj tumlal tnayaj q'ij, attoq jun tlamel jatum in tzaj qe' ju cay aju tkub' twitz ju muro in ajb'en te maqb'il, aju tkub' tumlal tjawitz q'ij.

13Tzajtzun tma'n ju xinaq weye kyja': Tza'nx qeju cuart ate' tuj tumlal tb'anq'ab' q'ij ikx qeju ate' tuj tumlal tnayaj q'ij, aqeju kykub' twitz ttxa'n pe'n pe'nin ti'j xjansa'maj qe. Aqeju pal in che pon laq'e' twitz Qman in xi kychyo'n qe oyaj mas xjanxix kyuj qe cuart lu. Ax ikx kyuj qe cuart lu in kub' kyq'o'n qe oyaj mas xjanxix, ik tza'n qe oyaj twitz awal, ex ju oyaj te chojb'il il ex ju oyaj te chojb'il kypaltil xjal, porke aju lugar lu xjan te.

14Ok kyokx qe pal tuj tja Dios, mlay che etz tu'n kye'lel tuj tnejel ttxa'n pe'n qa na'nxtoq tkyaj kych'expu'n kyxb'alun, aju in ajb'en kyu'n ok in che aq'nan tuj tja Dios, porke aju xb'alun lu xjan. Ok kye'lel jatum ate' qe xjal, il ti'j k'okel kyq'o'n juntl kyxb'alun.

Aju echb'in te tx'otx' jatum tkub'sa'n tja Dios

15Tejtzun tb'aj techan xinaq tja Dios ex qe txqantl cuart ex qe ttxa'n pe'n, in ex q'i'ne tu'n ttzi ju tlamel tkub' tuj tjawitz q'ij ex in elpune ti'jxi, ex ok ten xinaq echil te muro tok ti'jele tx'otx' te tja Dios.

16Tzaj ti'n aju ajlaj in ajb'en te echb'il, ex xi techan ttxlaj tkub' tumlal tjawitz q'ij: ex attoq 250 metro.

17Ikx xi techan ttxlaj tuj tumlal tb'anq'ab' q'ij, ax ikx attoq 250 metro:

18ex xi techan ttxlaj tkub' tuj tumlal tnayaj q'ij, ax ikx attoq 250 metro;

19ex te b'ajsb'il xi techan ttxlaj tkub' tumlal telex q'ij, ax ikx attoq 250 metro.

20Xi techan tx'otx' tuj kykyajil pak' ttxlaj. Aju tx'otx' jatum tkub'sa'n tja Dios attoq jun muro tok ti'jele te 250 metro echb'in te junjun pak' ttxlaj, ex atzunju nne'l pa'nte tx'otx' xjan tuk'il ju tx'otx' mya xjan.