1 Timoteo 5 - Mam Huehuetenango New Ortography

Alkye tu'n qb'inchante kye txqantl okslal

1Mi'n tz'ok tilina jun tij xinaq, noq o'kx q'onxa tnab'l ik tza'nku tmana; atzun kye ku'xun, q'onxa kynab'l ik tza'nku termaniya.

2Q'o'nka qe tij xu'j ik tza'nku ttxu'ya; ex qe q'apoj q'o'nka ik tza'nku tanb'a, mi'n kub' t-ximana mya b'a'n kyi'j.

3B'a'n tu'n kyok kwentit qe meb'a xu'j qa ax tok meb'a xu'j qe.

4Pero qa at jun meb'a xu'j ate' tal ex qa tal tchman, il ti'j tu'n kyxnaq'tzet jlu, tu'n kyonin kye qeju ate' tuj kyja ex tu'n taj kyq'o'n ch'in t-xel kye qeju jatum ẍe el itz'j, porke b'a'n te jlu tuj twitz Dios.

5Ex ju xu'j ax tok meb'a xu'j ex tjunalx ma kyaj ten, q'uql tk'u'j ti'j Dios, ex kukx tna'n Dios ex in kub'san qonik'an ex q'ijl; b'a'n tu'n tok kwentit.

6Pero aju meb'a xu'j in xi tq'on tib' tuj achb'il, b'a'nwtlo itz' pero mer ik tza'n kyimni.

7Q'manxa tkyaqil jlu kye tu'n kyten minti' kypaltil.

8Qa at jun okslal minti' in che ok tkwentin qe terman, ex qa minti' in che ok tkwentin qeju ate' tuj tja, ma kyaj tkolin tokslab'l, ex mas ploj tmod twitz jun xjal mya okslal.

9B'a'n tu'n ttz'ib'anjtz kyb'i meb'a xu'j, o'kx qeju ma japun 60 ab'q'i kyu'n ex noq junx kychmil otoq ten,

10ex qa b'i'n kyu'n kykyaqil qa b'a'n kyb'inchb'en, ex qa at kyal o kych'isa, ex qa b'a'n che q'on kyposad xjal, ex qa o tz'el kytx'jo'n kyqan qe okslal; ex qa o che onin kye qeju ate' tuj b'is, ex qa kyaq' kyib' tu'n kyonin tuj tkyaqil aq'untl b'a'n.

11Pero mi'n ku'x tq'o'na kyajlal qe meb'a xu'j q'apojx qe, porke ok tb'aj kygan kyjunalx kjawil kyi'n kyib' ti'j Crist, ex kyajb'il tu'n kymoje' juntl maj.

12Kyja'tzun at kyil, tu'nju minti' ma japun kyu'n aju yol xi kytziyan nej.

13Ax ikx in che naq'et ti'j in che ok ky'aj, noq in che b'et ttzi kyja xjal; ex mya noq o'kx ky'aj qe, ax ikx ẍtaq'il yol qe, ex nno'kx kylamon kyib' kyxol txqantl, in che yolin mya tuj tumel.

14Kyja'tzun, aqeju meb'a xu'j q'apojx qe, waje tu'n kymoje' ex tu'n ttzaj kyal ex tu'n tb'ant kykwentin qeju ate' tuj kyja; ex tu'n mi'n t-xi kyq'o'n amb'il teju aj q'oj tu'n tyolin mya b'a'n kyi'j.

15Tu'nju at junjun meb'a xu'j ma tz'el kypa'n kyib', ma che ok lpe' ti'j Satanás.

16Qa at jun okslal xinaq ex qa jun okslal xu'j, qa at jun meb'a xu'j tuj kyja, b'a'n tu'n tok kyk'a'chan, tu'ntzun mi'n tten jun iqtz kyib'aj txqantl okslal, tu'ntzun tkanun k'a'chb'il kye qeju axix tok meb'a xu'j qe.

17Qe anciano in che kawin tuj tumelxix, b'a'n tu'n t-xi q'ot mastl onb'il kye, axixpe qeju kyq'on kyib' tu'n kypakb'an ex tu'n kyq'on xnaq'tzb'il.

18Porke in tma'n tuj Tu'jil: Mi'n tz'ok kyk'alo'ne twi ttxa'n boys aju in b'et tib'aj triw tu'n tel ttxk'omil; ax ikx in tma'n: Aju aq'nal, tuj tumelxix tu'n tchjet twi tk'u'j, chi tuj Tu'jil.

19Qa at jun ma pon tuk'ila q'malte qa at til jun anciano, mi'n txi tb'i'na tyol; qatzun at kab'e ex qa ox testiw, b'inxtzuna.

20Aqeju kukx kyb'inchan il, q'manxa kyil kywitz kykyaqil tu'ntzun kyxob' txqantl okslal.

21Kxel nkyuwsa'ne teya twitz Dios ex twitz Qajaw Jesucrist ex kywitz qe t-anjel sk'o'maj qe tu'n, japunx tu'na tkyaqil jlu, mi'n txi tma'n naja qa at til jun okslal qa na'nxtoq tb'inteya, ex mi'n tz'ok tq'o'n twitza ti'j t-xilen xjal.

22Mya jurat naj tu'n t-xi tq'o'na kyoklen okslal, tu'ntzun mi'n tel tiqan tila ti'j qa ma kub' tz'aq tuj il. Kwentin ok tib'a tu'n tten tuj tanmiya saq.

23Mi'n txi tk'a'na junxte a', k'anxa ch'in vin tu'n tlaj tk'u'ja ex tu'n tlaj kukx in tzaj tyab'ila.

24At junjun xjal nne'l naj kyil tuj q'ancha'l na'nxtoq kyok tuj xjel; atzun junjuntl maxi nne'l kyil tuj q'ancha'l ok kyok tuj xjel.

25Ax ikx qeju qaq'unb'en b'a'n, nne'l tuj q'ancha'l; qa at maj minti' q'ancha'l, pero cheb'a nne'l tuj q'ancha'l, porke mlay b'ant tu'n tkyaj ten tuj ewaj.