Hechos 11 - Mam Huehuetenango New Ortography

Xi tq'o'n Pedro tqanil kye okslal tuj Jerusalén

1Atzun kye apostol ex qe erman ate' tuj Judea, o kyb'i qa otoq txi kyoksla'n txqantl xjal aju tyol Dios, aqeju mya judiy qe.

2Tejtzun tul meltz'aj Pedro tuj Jerusalén, tzaj jun kyyol okslal judiy ti'j Pedro.

3Ex xi kyqanin te:

—¿Tiqu'n ma tz'okxa tuj kyja xjal mya judiy, ex ma wa'na kyuk'il? Che chi.

4Oktzun ten Pedro tx'olb'alte kye tuj tumelxix aju otoq b'aj, chi tma:

5—Atintoqe tuj tnam Jope, in chin na'ne Dios, ex at jun o wile ik tza'n tuj witzik', ik ke'yin ik tza'n jun nintz xb'alun, ku'tz tuj kya'j k'alo'n kykyajil ttxa'n, ex k'u'l nwitze.

6Tej tok nke'yinxixe ti'j, e wile qe txkup kyaje kyqan, qe lob'aj, qe chyu'j ex qe txqantl jil.

7Ex o nb'iye jun tq'ajq'ajel tzaj tma'n weye: We'ktza Pedro, b'yonkuya qe jlu te tchi'ya.

8Ex xi nma'ne kyja': Mlay Tat, porke b'ajx txi nchyo'ne jun ti'xti mya b'a'n ex qa tz'il.

9Tzajtzun q'ajt tkab'maji'n tuj kya'j, tma weye: Aju tx'jo'maj tu'n Dios mi'n tz'ok tq'o'na te mya b'a'n.

10Ox maj o q'manjtz jlu, ex jaxtzun q'i'ntl tkyaqil tuj kya'j.

11Ex jurat e pon ox xinaq jatum in chin posadiyine, otoq che tzaj sama'n tuj tnam Cesarea te txkol weye.

12Tzajtzun tma'n Xewb'aj Xjan weye tu'n nxi'ye kyuk'il ex tu'n mi'n tjawje' nk'u'je. Ax ikx qe qaq erman lu e je'x wuk'ile, ex o okxe tuj tja jun xinaq.

13Tzajtzun ttx'olb'a'n qeye qa otoq kub' tyek'un tib' jun anjel twitz tuj tja; kub' we' anjel twitz, ex tma te: Samanxa kab'e xjal tuj tnam Jope txkol te Simón, aju Pedro tkab'in tb'i;

14ate jlu ktzajel tma'n jun yol teya, tza'n tten tu'n tkleta, aya, ex kykyaqil qeju ate' tuj tjaya, chi anjel xi tma'n te.

15Tejtzun tqe' nyoline, k'u'l Xewb'aj Xjan kyib'aj, ik tza'n k'u'l qib'aj nej.

16Ultzun tuj wanmiye aju o tma Qajaw: Ax tok o che b'yan xjal tuj a' tu'n Juan, atzun kyeye ok che b'yale tuj junxitl tumel ok kyk'monteye Xewb'aj Xjan, chi Qajaw.

17Qatzun ax oyaj tzaj tq'o'n Dios kye, aju tzaj tq'o'n qe tej qokslan ti'j Qajaw Jesucrist, ¿titzun woklene tu'n tmaqet Dios wu'ne? Chi Pedro xi tma'n kye.

18Tejtzun kyb'inte erman tkyaqil jlu, aqeju ate' tuj Jerusalén, minti' e q'ajt, noq o'kx jaw kynimsa'n tb'i Dios, ex kyma:

—Ax tok ma tzaj tq'o'n Dios t-xtalb'il kye txqantl xjal mya judiy qe tu'n tajtz ti'j kyanmi tu'n tten kychwinqlal.

Qe okslal tuj tnam Antioquía

19Atzun kye txqantl okslal otoq che el sputj tu'n tlaj yajb'il kye tzaj xe't tej tkub' b'yo'n Esteban, max e pon tuj tx'otx' Fenicia, ex tuj Chipre, ex tuj Antioquía, minti' xi kyma'n tyol Dios kye txqantl xjal, o'kx kye xjal judiy.

20Ex at junjun okslal aj Chipre ex aj Cirene kyxol, tejtzun kypon tuj tnam Antioquía, ax ikx xi kyma'n tyol Dios kye txqantl xjal mya judiy, ex xi kyma'n tqanil b'a'n kye ti'j Qajaw Jesús.

21Aju tipumal Qajaw attoq kyuk'il, ex nimku xjal kyaj kykolin ojtxi kyokslab'l ex e okslan ti'j Qajaw.

22Pontzun tqanil jlu kyuk'il qe okslal ate'toq tuj tnam Jerusalén, ex xi kysama'n Bernabé tu'n tpon tuj tnam Antioquía.

23Tejtzun tpon Bernabé, ex tej tke'yinte nim t-xtalb'il Dios tzaj tq'o'n kye, jaw tzalajxix, ex xi tq'o'n kynab'l kykyaqil tu'n kykyaj ten wa'lxix tuj kyokslab'l, ex tu'n kyxi lpe' ti'j Qajaw tu'n tkyaqil kyanmi.

24Porke ate Bernabé jun xinaq b'a'nxix, ex nojni tuj tanmi tu'n Xewb'aj Xjan, ex at-xix tokslab'l. Kyja'tzun nim xjal e okslan ti'j Qajaw.

25Tb'ajlenxi jlu xi' Bernabé tuj tnam Tarso jyolte Saulo; tejtzun tknet tu'n, ul ti'n tuj Antioquía.

26Ex axtzun e kyaj ten jun ab'q'i kyuk'il okslal, ex xi' kyq'o'n xnaq'tzb'il kye nimku xjal. Tnejelxix tuj Antioquía ok kyq'o'n xjal kyb'i okslal, okslal ti'j Crist.

27Axtoqtzun ta' Bernabé tuk'ix Saulo tuj Antioquía tej kypon junjun t-sanjel Dios tzajni qe tuj Jerusalén.

28Ex at jun kyxol jlu Agabo tb'i, jaw we' yolil kyxol okslal ex tzaj tchik'b'a'n tu'n Xewb'aj Xjan, ex tma:

—Tzul nimxix we'yaj tuj tkyaqil twitz tx'otx'.

O japun tyol Agabo, ex tzaj nimxix we'yaj tuj tq'ijlalil tej tkawin president Claudio.

29Atzun kye okslal tuj Antioquía kub' kyximan tu'n t-xi kysama'n ch'in onb'il kye erman najl qe tuj Judea, teyle junjun tu'n t-xi t-sama'n ik tza'nx ju at te.

30Kyb'inchatzun ikju, xitzun kysama'n jun oyaj kye erman; ate Bernabé tuk'ix Saulo xi q'inte, ex xi kyq'o'n kye anciano ate' tuj Judea.