Números 34 - Mam Huehuetenango New Ortography

Qe tmojonil tx'otx'

1Tzaj yolin Qman tuk'il Moisés ex tma:

2Q'manxa kye aj Israel kyja': Ok kypone tuj tx'otx' Canaán aju tx'otx' k'okel te kyetzb'ile, atzun qe tmojonil jlu:

3Aju tmojonil tuj tumlal tnayaj q'ij, atzun kmojonil tib' tuk'il tzqij tx'otx' Zin ex tuk'il tx'otx' Edom. Atzun ktzajel qe' tmojonil tuj tnayaj q'ij ttxa'npun mar at Nim Atz'an Tuj, tumlal tjawitz q'ij,

4k'elex tuj tnayaj q'ij tu'n tex tk'u'j witz Acrabim, tu'n tex tuj lugar tzqij tx'otx' Zin ex tu'n tpon max Cades-barnea, tu'n tik'tl tu'n tpon Hasar-adar, tu'n tpon tuj Asmón,

5tu'n tik'tl tuj Asmón, tu'n tpon max ttzi tq'ab' xaq tmojonil Egipto ex atzun kpol b'aj ttzi Nintz mar.

6Aju tmojonil tuj tumlal telex q'ij, atzun Nintz mar.

7Aju tmojonil tuj tumlal tb'anq'ab' q'ij, atzun jlu: Ktzajel qe' max ttzi Nintz mar tu'n tjapun twi witz Hor,

8ex k'oketz twi witz Hor tu'n tpon ttzi tnam Hamat, ex tu'n tik'tl tu'n tpon tuj Zedad.

9Ktzajelx tuj lugar Zedad tu'n tpontl max tuj Zifrón ex atzun kpol b'aj tuj lugar Hazar-enán. Ex atzun tmojonil tx'otx' lu tuj tumlal tb'anq'ab' q'ij.

10Aju tmojonil tuj tumlal tjawitz q'ij ktzajel qe' tuj lugar Hazar-enán, tu'n tpon max tuj lugar Sefam,

11tu'n tik'tl tuj lugar Sefam, tu'n tpontl tuj tnam Ribla, tuj tumlal tjawitz q'ij te lugar Aín; ex atzun kb'eletz tu'n tku'pun tuj tumlal tjawitz q'ij te lagun Cineret,

12kb'eletz ttzi'yile nima Jordán ex atzun kpol b'aj ttzi mar at Nim Atz'an Tuj.

Atzun qe lugar lu tmojonil kytx'otx'e, chi Qman te Moisés.

Tej tb'aj sipet tx'otx'

13Xitzun tma'n Moisés kye aj Israel kyja':

—Atzun tx'otx' lu kb'ajel kysipane tu'n swert; aju o tma Qman tu'n t-xi q'ot kye b'elaj k'loj tuk' mijtl kyiyjil aj Israel,

14porke aqeju tiyjil Rubén, kyuk'ix tiyjil Gad ex mij tiyjil Manasés ma kyk'am kyetzb'il ik tza'nx junjun k'loj kyiyjil.

15Aqeju kab'e k'loj tuk' mij kyiyjil aj Israel lu ma kyk'am kyetzb'il tuj tumlal tjawitz q'ij te nima Jordán, aju tx'otx' tkub'sa'n tumlal twitz Jericó.

16Tzaj yolin Qman tuk'il Moisés ex tma:

17Aqeju che b'el sipante tx'otx' kyxole, atzun qe jlu: Pal Eleazar ex Josué aju tky'ajal Nun.

18Ax ikx k'okel kyq'o'ne jun nejenel kye teyle junjun k'loj kyiyjil aj Israel, tu'n tkub' sipet tx'otx',

19ex atzun kyb'i qe xinaq lu:

Ti'j tiyjil Judá: Atzun Caleb aju tky'ajal Jefone.

20Ti'j tiyjil Simeón: Atzun Semuel aju tky'ajal Amiud.

21Ti'j tiyjil Benjamín: Atzun Elidad aju tky'ajal Quislón.

22Ti'j tiyjil Dan: Atzun Buqui, aju tok te nejenel, aju tky'ajal Jogli.

23Kyi'j qe kyiyjil kab'e tky'ajal José: Atzun Haniel aju tky'ajal Efod tok te nejenel kye tiyjil Manasés;

24atzunte Kemuel aju tky'ajal Siftán tok te nejenel kye tiyjil Efraín.

25Ti'j tiyjil Zabulón: Atzun Elizafán tok te nejenel aju tky'ajal Parnac.

26Ti'j tiyjil Isacar: Atzun Paltiel tok te nejenel aju tky'ajal Azán.

27Ti'j tiyjil Aser: Atzun Ahiud tok te nejenel aju tky'ajal Selomi.

28Ti'j tiyjil Neftalí: Atzun Pedael tok te nejenel aju tky'ajal Amiud.

29Kyetzun qe jlu xi tma'n Qman tu'n tkub' sipet tx'otx' Canaán kyxol aj Israel.