Josué 2 - Mam Huehuetenango New Ortography

Xi t-sama'n Josué kab'e xjal ke'yilte tnam Jericó

1Tej ate'toq tuj lugar Sitim e je'x t-sama'n Josué kab'e xinaq tuj ewaj, ex xi tma'n kye tu'n kyxi' ke'yilte tx'otx' ex tnam Jericó.

E je'xtzun ex e pon tuj tnam Jericó tuj tja jun xu'j jawni twitz kyuk'il xinaq, Rahab tb'i, ex atzun e posadiyin te qonik'an.

2Ex at jun pon q'mal tqanil tuk'il rey kye aj Jericó kyja':

—Te qale ja'lo ma che ul kab'e aj Israel ke'yilte tnam.

3Xitzun t-sama'n rey jun xjal q'malte te Rahab:

—Q'i'metza qe xinaq ma che ul tuk'ila, aqeju ate'kx tuj tjaya, porke ke'yil tx'otx' ma che ul xjal lu, ex at nnik' ti'j kyk'u'j.

4Atzunte xu'j otoq che'x tewan qe xinaq ex xi tma'n:

—Ax tok at kab'e xinaq ma che ul aj wuk'ile, pero minti' ma nb'iye jatum tzajniqe.

5Tej xqok yupj, b'i'x ẍe ex, ex atzun or in che lamet qe tlamel tnam. Minti' b'a'n wu'ne tza'n ma che'x, pero qa ma che'x lpe' naje kyi'j, jaku che pon knet kyu'ne, chi xu'j.

6Ex otoq che jax tewan xu'j ma twi tja, ex atzun ewan qe tjaq' junjun che'l lino kyjaxsa'n tu'n kytzqij.

7Kub'tzun b'e kyu'n xjal, aqeju e je'x t-sama'n rey tu'n kypon knet qe b'etin xjal kyu'n, ex atzun e je'x tuj b'e in xi' tlugaril nima Jordán, max tejxi kypon tuj xajb'il a'. O'kx tej kyex qe xjal lu, e lamet naj qe tlamel tnam.

8Na'nxtoq kytan xjal e pon ke'yilte tnam, jax Rahab kyuk'il twi ja ex xi tma'n kye:

9—B'a'n wu'ne, ate Qman ma txi q'onte tx'otx' lu kyeye, tu'nju axte ma tzaj q'onte nim t-xob'il qi'je tu'ntzun ttzaj qxob'ile kywitze. Kykyaqil xjal najl tuj tx'otx' lu nimxix in che xob' kywitze.

10B'i'n qu'ne, tej kyetze tuj Egipto, tu'n Dios b'i'x tzqij mar Kyaq Ke'yin, tu'ntzun kyik'tze tuj. Ax ikx b'i'n qu'ne, kyu'ne e naj qe rey Sehón ex Og, aqeju kyrey aj Amorreo najlqetoq jlajxi nima Jordán.

11Tzaj nimxix qxob'ile tej qb'inteye jlu, kyja'tzun mi a'l jun jaku ten tipun tu'n tq'ojin kyuk'ile, porke ate Qman aju Kydiose, atzun aju Dios at tuj kya'j ax ikx at tzalu twitz tx'otx'.

12Kyja'tzun in chin kub'sane kywitze tu'n ttzaj kyma'ne b'i'x ja'lo jun yol axix tok twitz Qman, tu'n kyb'inchanteye b'a'n kye qeju ate' tuj njaye, ik tza'n weye ma nb'inchaye b'a'n kyeye. B'i'x kyma'n kyaje jun techal axix tok,

13qa tu'n mi'n kub' kyb'yo'ne nmane ex ntxu'ye ex qe txqantl wermaniye, kyuk'ix kykyaqil xjal ate' kyuk'il. Qo kyklome tu'n mi'n qnaje, chi Rahab.

14Atzun kye xi kytzaq'we'n:

—Qa mi xb'ant qu'ne aju ma tzaj tqanina qeye, b'a'n tu'n qkyime tu'n Dios, ex mi'n b'aj tma'na jlu. Ok ttzaj tq'o'n Qman aju tx'otx' lu qeye, ax tok ok qb'inchaye b'a'n teya, che chi.

15Tu'nju atzun najltoq Rahab tuj jun ja b'inchamaj twi muro te tnam, kyja'tzun aqeju kab'e xinaq lu e ex ttzi ventan, ex ti'j saqb'aq e ku'x tu'n Rahab.

16Ex xi tma'n kye:

—Kyxi'ye ewal kyib'e kywi' qe witz tu'ntzun mi'n kyknete kyu'n qeju in che jyon kyi'je. Kyewanx kyib'e ma chixin ox q'ij okxi kyajtz meltz'aj qeju in che jyon kyi'je. Te tib'ajxi jlu b'a'n tu'n tkub' b'e kyu'ne.

17Atzun kye xi kytzaq'we'n:

—Kb'antel qu'ne aju ma txi qtziyane teya ex aju ma tzaj tqanina tu'n qb'inchanteye teya.

18Ex ok qoktze tuj tx'otx' lu, b'ix ku'x tyob'ina ttzi ventan jatum ma qo ku'tz tq'o'na, aju ky'jaj lu kyaq ke'yin, ex chmon b'aja kykyaqil termaniya tuj tjaya, tuk'ix tmana ex ttxu'ya ex kykyaqil qeju at t-xilen tmana kyuk'il.

19Qa at jun kye ma tz'ex ti'jxi tjaya, kymel tu'n tex tlaj ex mya qo'ye at qile. Qatzun at jun qeye ma tz'ok tzoqpaj ti'j jun kyxol qeju ate' tuj tjaya, atzun qo'ye at qile ti'j tkamik.

20Ex qa ma tz'el tqanil jlu tu'na, mlaytzun japun qu'ne aju ma txi qtziyane teya, che chi.

21—B'a'n ikju, kyja'na ktelb'a qu'n, chi xu'j.

B'ajtzun kyq'olb'en kyib' ex kub' b'e kyu'n qe xinaq. Te tib'ajxitzun ok tk'alo'n Rahab ttzi tventan tja aju ky'jaj kyaq ke'yin.

22Aqeju kab'e xinaq lu e je'x ewal kyib' kywi witz ox q'ij, atzun kye xinaq in che jyontoq kyi'j tuj tkyaqil part ex minti' e knet kyu'n. Tej tb'aj kygan tu'n kyjyon kyi'j, e ajtz meltz'aj tu'n kyul tuj tnam Jericó.

23E ku'tztzun qe kab'e xinaq kywi witz, e ik'x tuj nima Jordán, e ul jatum ta' Josué aju tky'ajal Nun, ex xi kytx'olb'a'n tkyaqilju otoq b'aj kyi'j.

24Ex xi kyma'n te Josué: Ma tzaj tq'o'n Qman tkyaqil tx'otx' lu te qe, ex kykyaqil xjal najlqe tuj tnam lu in che xob' wen tu'n qlaj.