1Nman Dios, aya xpich'ul weye ex ojtzqi'ntl qine tu'na;
2ojtzqi'n tu'na tkyaqilju in b'ant wu'ne; maske najchaq ta'ya, ex b'a'ntl nximb'etze tu'na.
3Ojtzqi'ntl tu'na qa in chin b'ete ex qa in chin ojlane, b'a'ntl tu'na tkyaqilju in b'ant wu'ne.
4Ok na'nxtoq tetz jun yol tuj ntzi'ye, lu ojtzqi'ntl tkyaqil tu'na, Nman.
5Txolin wi'je tu'na; ex tzyu'n qine tu'n tq'ab'a.
6Nimxix nne'la tnab'la tuj nwitze, mlayx kanun nnab'le ti'j ex ma' t-xilen, tu'ntzunju mlayx chin kanune tu'n tel nnik'e ti'j.
7¿Tza'n b'an nxi'ye najchaq twitz T-xewa? ¿Ex tza'n b'an nxi oqe twitza?
8Qa ma chin jaxe max twitz kya'j, atzun ta'ya ma chixin, ex qa ma chin ku'xe t-xe'pun tx'otx' jatum ta' kynajb'il kyimni, ex axtzun ta'ya ma chixin;
9qa ma chinx lipane jatum in tzaj spik'e' t-xe kya'j, ex qa ma chin najane jlajxi mar tuj telex q'ij,
10ax ikx ma chixin ẍaqlu'n qine tu'n tq'ab'a, ex mlayx chinx ttzoqpi'n tb'anq'ab'a.
11Qa ma kub' nximane tu'n tkub' wewan wib'e tuj qlolj, ex qa ma kub' nximane tu'n tch'expet spik'un at wi'jele tu'n tok te qlolj,
12mlayx b'ant tu'n nkub' ewane tu'n qlolj twitza; porke in qoptz'aj qonik'an twitza ik tza'n q'ijl. Junx nne'la qlolj teya ik tza'n spik'un.
13Aya b'inchante nximlale; tu'na in b'ante tuj talb'il ntxu'ye.
14Kxel nq'o'ne chjonte teya tu'nju ma'xix t-xilen taq'unb'ena; in chin lab'ine ti'j ex ma tz'el nnik'e ti'j ax tok jlu.
15Minti' ewat nximlale twitza tej twiniqax ex tej nb'ante tuj ewaj tuj talb'il ntxu'ye, ax ikx tej nwiniqaxe tuj ewaj, mer ik tza'nku t-xe'pun tx'otx' tuj qlolj.
16O chin tila tej matoq in chin winiqaxe; tkyaqil jlu tz'ib'amaj tuj tu'ja. Ximamajtl tu'na jte' ab'q'i tu'n ntene tej na'nxtoq wul itz'je.
17Nman Dios, ma'xix t-xilen t-ximb'etza tuj nwitze ex nimxix kyajlal.
18Noqwit chin ok tene ajlal kye, maslo nim kyajlal twitz ttxa tz'a'n; ex ok tel nwatle ax atine tuk'ila.
19Nman Dios, b'yonkuya qeju b'inchal mya b'a'n, ex laq'b'a'mila wi'je qe b'yol xjal,
20ex qeju in che xmayin ti'ja, aqeju in che q'ojin ti'ja noqx gan.
21Nman, in che el wik'une qeju in che ik'un teya. Nk'i'ye tu'n ntene kyxol aj q'oj ti'ja.
22Te jumajx ma che el wik'une. Ma che ok nq'o'ne te aj q'oj wi'je.
23Nman Dios, chin t-xpich'un b'aja ex ojtzqima wanmiye; e tik' twitza wi'je ex ojtzqima tuj nnab'le;
24ex ke'yintza qa in chin b'ete tuj b'e mya b'a'n, ex chin t-ẍaqluma tuj b'e te jumajx.
Who We AreWhat We EelieveWhat We Do
2025 by iamachristian.org,Inc All rights reserved.
