Jeremías 31 - Mam Huehuetenango New Ortography

Che ul meltz'aj qe aj Israel tuj kytanmi

1Chi Qman: Tuj tq'ijlalil tzul aqine chin okel te Kydios kykyaqil k'loj tiyjil Israel, ex atzun kye che okel te jun tnam etzan wu'ne.

2Tuj lugar minti' kynajb'il xjal tuj o nb'inchaye xtalb'il kye aj Israel, aqeju minti' e kub' b'yo'n tu'n spad tej in che jyontoq ojlab'l, chi Qman.

3Kub' tyek'un tib' Qman qwitz atxix ojtxi ex tma kyja': Te jumajx ma che nk'ujlaye ex kukx tq'aq'an nk'u'je kyi'je.

4Aqeye aj Israel, axix tok kjawil nb'incha'ne juntl maj kytanmiye. Che elexe b'ixal juntl maj tuk'il kychinb'e pandereta, in che tzalaje wen.

5Kb'elex kyawa'ne juntl maj tqan uva kywi' qe witz tuj Samaria, ex aqeju che awal tqan uva che lo'l ti'j twitz.

6Porke tzul tq'ijlalil che jawil sch'in qe xq'uqil ate' kywi' qe witz tuj kytx'otx' aj Efraín, ex ok kyma': Kytzaje, qo' tuj tnam Sión jatum ta' Qman aju Qdios.

7Chi Qman: Che b'itzane tu'n tzalajb'il kyi'j tiyjil Jacob, ex atzun ju nasyon lu mas ma' toklen kywitz kykyaqil txqantl nasyon. Che b'itzane te Dios tu'n kyb'inte kykyaqil xjal ex kymanxe: Aya Qman, che tkloma qe xjal etzan tu'na, aqeju ch'intl ate'x.

8Che ajetz wi'ne tuj tx'otx' tuj tb'anq'ab' q'ij ex che tzajel nchmo'ne max ttxa'npun tx'otx', kyuk'ix qe moẍ ex qe kox, kyuk'ix qe xu'j ch'ixtoq tul itz'j kyal ex qeju matoqx tul-len itz'j kyal; nim txqan xjal che ul meltz'aj.

9Che ul in che na'n Dios ex in che oq'. Che tzajel wi'ne ttzi'yile a' in b'et, tuj jun b'e chq'ajlaj tu'ntzun mi kyjaw tolj, porke aqine mamb'aj kye aj Israel, ex a Efraín nej nky'ajale.

10Aqeye nasyon, kyb'intze tyol Qman ex kymanxe kyuj lugar xi'yni ttzi mar. Kymanxe: O che b'aj t-sputun Qman qe aj Israel, ex che okel tchmo'n juntl maj ex che okel tkwentin ik tza'n jun pastor in che ok tkwentin qe t-ẍne'l, che chikuye.

11Porke tu'n Qman o che ko'pj qe tiyjil Jacob ex o che klet tu'n kye qeju mas at kyipun kywitz.

12Che ul ex che b'itzal tu'n tzalajb'il twi witz Sión, che tzalajel ti'j ju b'a'n ktzajel tq'o'n Qman kye, ik tza'n triw, ta'l twitz uva, chib'j aseyt, qe ẍne'l ex qe wakẍ. Ik che okel ik tza'n tqan awal a'lin wen, ex mlay che b'isun.

13Qe q'apoj che b'ixal tuk'il nim tzalajb'il, ax ikx qe ku'xun ex qe tij xjal. Kxel nq'uqb'a'ne kyk'u'j. Kxel nq'o'ne tzalajb'il kye te t-xel kyb'is, ex mas nim tzalajb'il kxel nq'o'ne kye twitz ju k'ixk'oj at kyi'j nej.

14Kxel nq'o'ne tb'anil wab'j kye pal tu'ntzun kynoj wen, ex qe xjal etzan wu'ne che tzalajel ti'j ju b'a'n kxel nq'o'ne kye. Aqine Dios in chin q'mante jlu.

15Chi Qman: In b'injtz tq'ajq'ajel kywi xjal tuj Ramá in che wuyin ex in che oq' wen. In oq' Raquel kyi'j qe tal ex minti' taj tu'n tq'uqb'anjtz tk'u'j tu'nju otoq che naj.

16Ex chi Qman te Raquel: Mi'n tz'oq'a mastl, mi'n tz'el txqantl ta'l twitza, porke tzul t-xel teya ti'j ju ma tzik'x tu'na, ex che ajetz qe tala tuj kytx'otx' aj q'oj kyi'j. Aqine Dios in chin q'mante jlu.

17Qe' tk'u'ja, porke tzul jun b'a'n te teya tuj tq'ijlalil tzul; che ul meltz'aj qe tala tuj kytanmi. Aqine Dios in chin q'mante jlu.

18O nb'iye qe tiyjil Efraín in che ayayan kyuw wen ex in kyma'n: Ma kub' qcastiwoye tu'na tu'nju ik qo'ye nej ik tza'n jun tor minti' in mansix, qo ti'nxa juntl maj tuk'ila ex jaku qo aj meltz'aje, porke aya Qmane ex Qdiose.

19El qpa'n qib'e ti'ja, ex ma tz'ajtz ti'j qanmiye, ma tz'el qnik'e ti'j qile ex nno'k qq'ajtza'ne ttzi qxu'ke tu'n tlaj qb'ise; ma tzaj qch'ixwiye ex ma kub' qmansin qib'e tu'n tlaj qile o qb'inchaye tuj qku'xumale, che chi tiyjil Efraín.

20Ik kyten qe tiyjil Efraín te weye ik tza'n jun k'wa'lb'aj k'ujla'nxix ex atzun qeju mas in chin tzalaje kyi'j. Maske in che kub' nkawine, ex kukx in q'aq'an nk'u'je kyi'j, kyja'tzun in tzaj ta'w tuj wanmiye ex nimxix in tz'e'y nk'u'je kyi'j. Aqine Dios in chin q'mante jlu.

21Aqeye aj Israel, b'i'x kyq'on kyaje techal b'e, kyq'onke kwent ti'j b'e jatum e b'ete, ti'j b'e jatum e je'x q'i'ne, ex ax kyajtz meltz'aje tuj juntl maj. Aqeye aj Israel, kyajtz meltz'aje tu'n kyule juntl maj tuj kytanmiye.

22¿Jtoj b'an t-xi kykoline tu'n kyb'etje'ye ik tza'n jun q'apoj mib'an b'in? Aqine Dios ma nb'inchaye jun ti'xti ak'aj twitz tx'otx': Aqe xu'j che okel ten kolol kyi'j xinaq.

Che b'el ky'iwla'n aj Israel tu'n Dios

23Chi Qman aju Tajaw Tkyaqil ex Kydios aj Israel: Ok kyajtz meltz'aj qe aj Judá tu'n kyul juntl maj tuj kytx'otx' ex tuj kytanmi, kxel kyma'n juntl maj kyja': Awt Qman ky'iwlante teya, aya witz xjan jatum in b'inchet aju tz'aqlxix.

24Junx che najal aj Judá kyuj qe tnam ate' tuj kytx'otx' kyuk'il qe aq'nal ti'j tx'otx' ex qe pastor alumaj.

25Kxel nq'o'ne nim kywa ex nim kyk'a' qeju sikni ex qeju minti' kyipun, chi Dios.

26Ultzun nnab'le ex jaw nke'yine. Puro b'a'n ela nwatle nna'ne.

27Chi Qman: Tzul tq'ijlalil che chmetel xjal ex qe alumaj wu'ne tuj kytx'otx' aj Israel ex tuj Judá.

28Ik tza'nx o nb'inchaye kyi'j tu'n kyik' wi'ne tu'n kyxi' tuj juntl lugar, tu'n tkub' xitj kytanmi, tu'n kyb'aj naj ex tu'n kyyajlanjtz, ikxtzun ok nb'inchaye tu'n kyjaw b'inchet juntl maj kytanmi ex tu'n kyul wi'ne juntl maj tu'n kyten kyuj. Aqine Dios in chin q'mante jlu.

29Tuj tq'ijlalil tzul mlay kyma juntl maj kyja': Qe mamb'aj xi kylo'n tx'am uva, kyja'tzun at ta'w twitz kye' qe kyk'wa'l, che chiwt.

30Porke aju kxel lo'nte tx'am uva, ax te ktzajel chyo'n twitz te' tu'n. Kyja'tzun teylex te junjun kymel tu'n tex til.

31Chi Qman: Tzul tq'ijlalil tu'n tb'ant ti'j jun ak'aj yol wu'ne kyuk'il aj Israel ex aj Judá.

32Aju yol kyjel b'ant ti'j wu'ne, mya ik tten ik tza'n yol o kyaj b'ant ti'j wu'ne kyuk'il qe kyxe'chel tej kyetz nẍaqlu'ne tuj tx'otx' Egipto, porke minti' japun kyu'n maske aqine kyajaw. Aqine Dios in chin q'mante jlu.

33Aju nyole kyjel b'ant ti'j kyuk'il aj Israel tuj tq'ijlalil tzul, atzun jlu: K'okex nq'o'ne nleye tuj kynab'l ex kb'el ntz'ib'ane twitz kyanmi; aqine chin okel te Kydios, atzun kye che okel te jun tnam etzan wu'ne. Aqine Dios in chin q'mante jlu.

34Ex mya il ti'j tu'n kyq'onte xjal xnaq'tzb'il kyxolx mi kye qe kyerman tu'n tel kynik' wi'je qa aqine Dios, ex kykyaqil k'elel kynik' wi'je, tza'nx qeju ch'in kyoklen, ax ikx qeju ma' kyoklen. Kb'el nnajsa'ne tkyaqil kyb'inchb'en mya b'a'n ex mlay tzaj nna'ntle kyil juntl maj. Aqine Dios in chin q'mante jlu.

35Ate Qman aju kyaj q'onte q'ij twitz kya'j tu'n tq'onte spik'un q'ijtl, ex aju kyaj q'onte xjaw ex qe che'w tu'n kyq'onte spik'un te qonik'an, aju in yukch mar tu'n ex in julin ok tjatz pulj, aju tok tb'i Qman Tajaw Tkyaqil, chi kyja':

36O'kx qa ma che naj kykyaqil jlu, atzun q'ij ya mya etzantl qe aj Israel wu'ne. Aqine Dios in chin q'mante jlu.

37Alkye jun q'ij qa ma b'ant techet twitz kya'j ex qa ma tz'el kynik' xjal ti'j jatum ta' t-simyentil tx'otx', atzun q'ij che elel wik'une aj Israel tu'n tlaj tkyaqil kyb'inchb'en mya b'a'n. Aqine Dios in chin q'mante jlu.

38Chi Qman: Tzul tq'ijlalil tu'n tjaw b'inchet juntl maj tnam lu tu'n tok te weye. Kxelx qe' ti'j nintz ja Hananeel ex max kpol b'aj ttzi Tlamel T-skyin Tnam.

39Ok tpon ttxlaj Tlamel T-skyin Tnam, jiqan kxe'l ti'j mojón tu'n tpon max ttxa'n tal witz Gareb ex atzun kq'ol welt tu'n tpon ttxa'n lugar Goa.

40Tkyaqil chq'ajlaj jatum in che ku'x maqut qe kyimni ex jatum nne'x chitun tza'j, ex tkyaqil ju kojb'il tjax tib'aj tq'ab' xaq Cedrón, tu'n tpon b'aj jatum ta' Tlamel Kyja Chej tkub' tuj tjawitz q'ij, che okel te xjan te weye. Aju tnam lu mlay kub' xitj ex mlay naj, kukx ktel te jumajx, chi Qman.