2 Samuel 24 - Mam Huehuetenango New Ortography

Jaw jun kyajlal aj Israel tu'n David 1 Crónicas 21.1-27

1Tzaj juntl maj tq'oj Qman kyi'j aj Israel, ok tq'o'n il ti'j David tu'n tjaw ti'n kyajlal aj Israel ex aj Judá.

2Xitzun tma'n rey te Joab aju nejenel kye soldad, aju attoq ttxlaj:

—Txi'ya kyxol kykyaqil k'loj kyiyjil aj Israel, tzajx qe' tu'na max tuj Dan tu'n tpon b'aj tuj Beerseba, ex q'in jawa kyajlal kykyaqil tnam xjal, tu'ntzun tel nnik'e ti'j nik'pun xjal at.

3Atzunte Joab xi ttzaq'we'n:

—Tat Rey, awt Qman aju Tdiosa b'inchante tu'n tchmet txqantl kyb'aj tnam xjal etzan tu'n, jun syent maj mas ik tza'n qeju ate' ja'lo, ex kukxwit itz'xa Tat Rey tu'ntzun ttila; ex ¿titzun tajb'en teya tu'n tjaw jun kyajlal xjal?

4Maske ikju, ex tu'nju mas at tipun tyol rey, o japun tu'n Joab ex kyu'n qe nejenel kye soldad aju xi q'ma'n kye. Kyja'tzun ate Joab kyuk'ix qe nejenel kye soldad e je'x tu'n tjaw kyi'n kyajlal tnam xjal aj Israel.

5E ik'x tuj nima Jordán ex atzun e kub' ten niqayin ttxlaj tnam Aroer aju tkub' tuj tmijil chq'ajlaj tumlal kytx'otx' tiyjil Gad ex tumlal tnam Jazer.

6Te tib'ajxi e je'x tuj Galaad ex tuj Cades, tuj kytx'otx' aj Heteo. E pon tuj Dan ex maxtzun tuj Dan e q'o'n welt tu'n kypon tuj Sidón.

7Te tib'ajxi e je'x tuj tnam Tiro ex kyuj kykyaqil tnam kye aj Heveo ex kye aj Canaán, tu'n kyku'pun tuj tx'otx' Néguev aju at tuj tkwent Judá, ex max tuj Beerseba.

8Tb'ajlenxi kyb'etin tkyaqil tx'otx' b'elaj xjaw tuk' winqin q'ij xi ti'n, ex te tib'ajxi e pontzun tuj Jerusalén.

9Xitzun tq'o'n Joab te rey aju tajlal otoq jaw ti'n kyi'j tnam xjal, ex kyxol aj Israel o japun jun tajlal te wajxaq syent mil xinaq otoq b'ant tu'n kyxi' tuj q'oj, ex kyxol aj Judá japun jun tajlal te jwe' syent mil xinaq.

10El tnik' David ti'j qa ate at til ti'j tajlal otoq jaw ti'n kyi'j tnam xjal, ex xi tma'n te Qman kyja':

—Ma b'ant jun il ma'xix wu'ne tu'nju ma nb'inchaye jlu. Ex in chin kub'sane twitza Nman tu'n tkub' tnajsa'na ja'lo aju il ma b'ant wu'ne, aqine tmajena, porke ma nb'inchaye jlu ik tza'n jun xjal minti' tnab'l, chi David.

11Tuj juntl q'ij tej tjaw we' David, xi tma'n Qman te Gad aju t-sanjel, aju in ajb'entoq ttxlaj David:

12Txi'ya tuk'il David ex q'manxa te kyja': Ox castiw kb'el nq'o'ne twitza, sk'on jawa jun kyxol qe jlu alkye tajb'ila tu'n nb'inchanteye, chikuya te David, chi Qman.

13Xi'tzun Gad tuk'il David ex xi tqanin te:

—¿Alkye b'a'n tuj twitza: Qa tu'n ttzaj wuq ab'q'i we'yaj tuj kytx'otx' aj Israel, qa tu'n kyel oqe ox xjaw kywitz aj q'oj kyi'je, ex qa tu'n ttzaj ox q'ij tx'u'j yab'il kyxol aj Israel? Ximana ti'j ja'lo ex q'mantza alkye tzaq'web'l kxel nma'ne teju saj samante weye, chi Gad.

14Atzunte David xi ttzaq'we'n:

—Atine tuj jun b'is ma'xix. Mas b'a'n tu'n qkub' tz'aqe tuj tq'ab' Qman, porke aju t-xtalb'il ma'xix te, ex mya tu'n qkub' tz'aqe tuj kyq'ab' xjal.

15Te prim ax q'ij lu tzaj t-sama'n Qman tx'u'j yab'il kyib'aj aj Israel; o ten ox q'ij ik tza'nx b'animaj ti'j, tzajx qe' tuj Dan ex tejxi tpon b'aj max tuj Beerseba e kyim 70 mil xjal.

16Ex tej kyja'toq tnaj tnam Jerusalén tu'nju anjel, tzaj tb'is Qman tu'n tlaj otoq che kyim nim xjal ex xi tma'n teju anjel in che najtoq tnam xjal tu'n: Akux jlu, ya mi'n che kub' tb'yo'na txqantl xjal.

Tujxju or lu otoq pon t-anjel Qman ttxlaj lugar jatum nne'l ttxk'omil triw tu'nju xjal Arauna tb'i, aju aj Jebuseo.

17Ex tej ttil David aju anjel in k'ixb'isantoq kye tnam xjal, xitzun tma'n te Qman:

—Aqine ma chin b'inchan il. Aqine at wile. Atzun qe xjal lu minti' kyil. In chin kub'sane twitza tu'n tkub' tz'aq ju castiw lu tu'na wib'aje ex kyib'aj qeju ate' tuj njaye.

Jaw tb'incha'n David jun altar 1 Crónicas 21.18-27

18Tujx q'ij lu xi' Gad tuk'il David, ex xi tma'n te tu'n tjaw tb'incha'n jun altar te Qman tuj lugar jatum nne'l ttxk'omil triw tu'n Arauna aju aj Jebuseo.

19Xi'tzun David b'inchalte aju otoq tma Gad, ik tza'nx otoq tzaj tma'n Qman.

20Atzunte Arauna o til tej kyja'toq t-xi' rey kyuk'ix qe xjal at kyoklen ttxlaj tu'n tpon jatum ta'toq. Tzajtzun Arauna kanul ti'j rey, kub' ẍmeje' twitz tejxi tpon takl tib'aj twitz twitz tx'otx',

21ex xi tma'n:

—Tat Rey, ¿ti ma tzaja lolte wuk'ile aqine tmajena?

Xi ttzaq'we'n David:

—Waje tu'n tkyaj nlaq'one teya aju lugar jatum nne'l ttxk'omil triw tu'na, tu'n tjaw nb'incha'ne jun altar te Qman tu'ntzun twe' tx'u'j yab'il kyi'j tnam xjal.

22Atzunte Arauna xi ttzaq'we'n:

—Tat Rey, tzyuma noq alkye b'a'n tuj twitza ex q'onxa qe oyaj te Qman. Lu qe tor ate' tzalu tu'n kyajb'en te oyaj patun tu'n kykub', ex qe tze' in che ajb'en te q'ib'l ttxk'omil triw ex qe yuw jaku che ajb'en te si'.

23Tkyaqil jlu jaku txi nq'o'ne teya Tat Rey, chi Arauna.

Ax ikx xi tma'ntl:

—Txi'wt tk'mo'n Qman aju Tdiosa aju chojb'il kxel tq'o'na.

24Atzunte rey xi ttzaq'we'n:

—Chjonte teya tu'n jlu, ex ktzajel nlaq'o'ne tkyaqil teya ex kchjetel wu'ne ik tza'nx twi', ex mlay txi nq'o'ne te Qman Dios qe oyaj patun tu'n kykub', qa mya loq'aj otoq tzaj wu'ne.

Kyja'tzun tten o laq'et tu'n David aju lugar lu ex kyuk'ix qe tor tu'n 50 saq pwaq,

25ex atzun jaw tb'incha'n jun altar te Qman ex e je'x tq'o'n qe oyaj patun in che kub' ex qe chojb'il te mojb'ab'l tib'il. Tzajtzun tb'i'n Qman aju tna'j Dios David kyi'j tnam xjal, ex atzunju tx'u'j yab'il b'i'x we' kyxol aj Israel.