1Attoq jun xjal tuj Cesarea Cornelio tb'i, toktoq te kycapitán jun k'loj soldad Italiana kyb'i.
2Ate xjal lu nimal Dios ex at tchi Dios tuj twitz, ax ikx kykyaqil qeju ate' tuj tja. Ex nimku kykotz xjal judiy in xi tq'o'n, ex kukx in na'n Dios.
3At jun q'ij b'alo las tres te qale, o til Cornelio ik tza'n tuj witzik' q'ancha'lxix, okx jun t-anjel Dios tuk'il ex tma:
—Cornelio, chi anjel.
4Oktzun tke'yinxix Cornelio ti'j anjel, ex tzaj t-xob'il:
—¿Ti taja, Tat? Chi Cornelio.
Atzunte anjel tma te:
—Ma tb'i Dios qe tna'j Diosa ex ma til qe kotzb'aj in che'x tq'o'na kye meb'a.
5Ja'lotzun samanxa kab'e xjal tuj tnam Jope txkol te Simón, aju Pedro tkab'in tb'i.
6Atzun ta' tposad jlu tuj tja jun xjal Simón tb'i, aju tzq'ajsal tz'u'm, aju tkub' tja ttzi mar.
7Tajlenxitzun anjel aju otoq yolin tuk'il Cornelio, e tzaj ttxko'n Cornelio kab'e tmajen tuk'ix jun soldad nimal Dios kyxol qeju in che ajb'en te.
8Tb'ajlenxi ttx'olb'a'n tkyaqil jlu kye, e je'xtzun t-sama'n tuj tnam Jope.
9Ex te juntl q'ij, kyja'toq kyxi' qe xjal lu tuj b'e, ch'ixtoq kykanun tuj tnam Jope, jax Pedro na'l Dios twi' ja, te chilkuq'ij.
10Ex tzaj elxix tk'u'j, ex o tajb'e tu'n twa'n; ex matoq in b'ant ch'in twa, o til ik tza'n tuj witzik',
11ex o til katl ttzi kya'j, ex ku'tz jun ik ke'yin ik tza'n jun nintz xb'alun, ex k'u'l twitz tx'otx', k'alo'n kykyajil ttxa'n.
12Tujtzunju nintz xb'alun lu attoq ela' txkaj jil kyaje kyqan, kyuk'ix qe lob'aj, ex qe chyu'j.
13Ex tzaj jun tq'ajq'ajel in tma'n:
—We'ktza, Pedro, b'yonkuya te tchi'ya.
14Atzunte Pedro xi ttzaq'we'n:
—Mlay, Tat, porke b'ajx txi nchyo'ne jun ti'xti mya b'a'n ex qa tz'il.
15Tb'itzun Pedro tkab'maji'n tq'ajq'ajel in tma'n:
—Aju tx'jo'maj tu'n Dios, mi'n tz'ok tq'o'na te mya b'a'n.
16Ox maj o q'manjtz jlu; atzunju nintz xb'alun jax q'i'ntl tuj kya'j.
17Ex matoq in ximan Pedro ti'j jlu, ti t-xilen aju otoq til ik tza'n tuj witzik', e pon qe xinaq ttzi ja, aju otoq che tzaj sama'n tu'n Cornelio, in che qanin ti'j jatum ta'toq tja Simón.
18E okxtzun q'ajt, xi kyqanin qa axtoq in posadiyin Simón aju Pedro tkab'in tb'i.
19Matoq in ximan Pedro ti'j aju otoq til ik tza'n tuj witzik', tzaj tma'n Xewb'aj Xjan te:
—Ate' ox xinaq in jyonjtza kyu'n.
20We'ktztzuna, ex tku'xa, txi'ya kyuk'il, ex mi'n jawje' tk'u'ja, porke aqine ma chin tzaj saman kye, chi Xewb'aj Xjan.
21K'u'ltzun Pedro jatum ate'toq qeju xinaq otoq che tzaj sama'n tu'n Cornelio, ex tma kye:
—Lu qine lu aju in kyjyo'ne; ¿tiqu'n ma che tzaje wuk'ile?
22Atzun kye xi kytzaq'we'n:
—Ma qo tzaj sama'ne tu'n Cornelio aju capitán, jun xinaq tz'aqlxix ex nimal Dios, ex kykyaqil xjal judiy in che yolin b'a'n ti'j. Ma tzaj q'ma'n te tu'n jun t-anjel Dios tu'n tpona tja ex tu'n tb'inte aju tyola.
23Xitzun tma'n Pedro tu'n kyokx tuja, ex xi tq'o'n kyposad. Ex te juntl q'ij kub' b'e tu'n Pedro, xi' kyuk'il; ex at junjun erman e je'x tuk'il, aqeju najl qe tuj tnam Jope.
24Tujtzun juntl q'ij e kanun tuj Cesarea. Atzunte Cornelio in ayontoq kyi'j, otoq che tzaj ttxko'n qeju at kyxilen tuk'il ex qe tamiw aqeju k'ujla'nxix tu'n.
25Tejtzun tpon Pedro tja Cornelio, etz naj Cornelio q'olb'el te, ex kub' ẍmeje' k'ulul twitz.
26Atzunte Pedro jaw twab'an, ex tma:
—We'ktza, porke ax xjal qine.
27Oktzun ten Pedro yolil tuk'il ex okx tuja, ex o til nimku xjal otoq tz'ok kychmon kyib'.
28Xitzun tma'n Pedro kye:
—Aqeye b'a'n kyu'ne qa mya q'o'n tu'n kyley xjal judiy tu'n tok tmojb'an tib' jun xjal judiy tuk'il jun xjal te junxitl tnam ex mya q'o'n tu'n tokx tuj tja. Pero ma tzaj tyek'un Dios weye tu'n mi'n t-xi nma'ne qa mya b'a'n ex qa tz'il juntl xjal.
29Kyja'tzun, tej nb'inteye txokb'il weye, minti' kub' nxk'ayin wib'e. Wajb'ile tu'n nb'inteye: ¿Titzun kyajb'ile weye tu'nju ma chin tzaj kytxko'ne tu'n wule tzalu?
30Atzunte Cornelio xi ttzaq'we'n:
—Ma b'ant-xi kyaje q'ij ax or ik tza'n ja'lo ex las tres te qale matoq in chin na'ne Dios tuj njaye, o wile jun xinaq kub' we' nwitze tok t-xb'alun in qoptz'aj wen,
31ex tma weye: Cornelio, ma tzaj tb'i'n Dios aju tna'j Diosa, ex ma tzaj tke'yin qe kotzb'aj in xi tq'o'na kye meb'a.
32Samanxtzuna kab'e xjal tuj tnam Jope txkol te Simón, aju Pedro tkab'in tb'i. Atzun in posadiyin Pedro tuj tja jun xjal Simón tb'i aju tzq'ajsal tz'u'm, aju tkub' tja ttzi mar.
33Kyja'tzun e je'x nsama'n naje kab'e xjal txkol teya; ex b'a'n ma tb'inchaya ma tzula. Ja'lotzun qkyaqile ato'ye tzalu twitz Dios qaje tu'n qb'inteye tkyaqil aju ma tzaj tma'n Dios teya, chi Cornelio.
Aju tpakb'ab'l Pedro tuj tja Cornelio34Oktzun ten Pedro yolil ex tma:
—Axix tok ma tz'el nnik'e ti'j, minti' in tke'yin Dios aju kyxilen xjal,
35noq o'kx in tzalaj kyi'j xjal at tchi Dios kye tuj tkyaqil nasyon, ex in kyb'incha'n aju tz'aqlxix.
36Tzaj tma'n Dios tyol kye aj Israel ex tzaj tma'n tqanil b'a'n tu'n tb'ant kyten xjal tuk'il Dios noq tu'n Jesucrist, aju Tajaw Tkyaqil.
37B'a'n kyu'ne aju yol lu el tqanil tuj tkyaqil Judea, atzun tzaj xe't tuj Galilea tb'ajlenxi tpakb'a'n Juan qa ilxix ti'j tu'n kyb'yan xjal.
38Ex b'a'n kyu'ne tza'n tten tzaj tq'o'n Dios tipumal Jesús aj Nazaret, ex o noj tu'n Xewb'aj Xjan tu'n tk'monte toklen, ex b'a'n kyu'ne tza'n tten o b'et Jesús in tb'incha'n b'a'n, ex kykyaqil qeju in che yajlanjtz tu'n tajaw il e b'anix tu'n Jesús, porke attoq Dios tuk'il.
39Ex a qo'ye testiw ti'j tkyaqilju o tb'incha Jesús tuj tx'otx' Judea ex tuj tnam Jerusalén; jaw q'o'n twitz crus kyu'n xjal ex kub' kyb'yo'n.
40Ex tuj toxin q'ij jatz anq'in tu'n Dios, ex tma Dios tu'n tkub' tyek'un tib' Jesús qwitze.
41Mya kywitz kykyaqil xjal kub' tyek'un tib', noq o'kx qwitze, aqo'ye sk'o'maj tu'n Dios tu'n qoke te testiw ti'j, porke o qo wa'ne ex o qo k'ane tuk'il tjatzlenxi anq'in kyxol kyimni.
42Ex tzaj tma'n Jesús qeye tu'n t-xi qpakb'a'ne kye xjal ex tu'n t-xi qchik'b'a'ne kye ax tok tu'n Dios ma tz'ok q'o'n Jesús te Jwes kyib'aj xjal itz' ex kyib'aj qe xjal kyimni.
43Atxix ojtxi kykyaqil t-sanjel Dios in tzaj kychik'b'a'n ti'j Jesús, in kyma'n qa kykyaqil qeju ma che okslan ti'j Jesús, knajsetel kyil tu'n, chi Pedro kye.
Tzaj q'o'n Xewb'aj Xjan kye xjal mya judiy44Matoq in yolin Pedro ti'j jlu, k'u'ltzun Xewb'aj Xjan kyib'aj kykyaqil qeju in che b'in tyol Pedro.
45Atzun kye okslal judiy, aqeju otoq che tzaj tuk'il Pedro, b'i'x naj kynab'l, tu'nju tzaj tq'o'n Dios Xewb'aj Xjan kye xjal mya judiy qe.
46Porke in kyb'i'ntoq in che yolin tuj kyyol txqantl tnam ex in kynimsa'n tb'i Dios.
47Atzunte Pedro xi tma'n:
—¿Jakupelo tma jun xjal tu'n mi'n kyb'yan qe jlu tuj a'? Mlaylo tma, porke ma kyk'am Xewb'aj Xjan ik tza'n qe.
48Xitzun tma'n Pedro tu'n kyb'yan tuj tb'i Jesucrist. Ex e kub'san twitz Pedro tu'n tkyaj ten noq jte' q'ijtl kyuk'il.
Who We AreWhat We EelieveWhat We Do
2025 by iamachristian.org,Inc All rights reserved.
