1Chin kub'sale kywitz qe anciano ate' kyxole, ax ikx weye anciano qine kyuk'il ex testiw qine ti'j tkyaqilju ik'x tu'n Crist, ax ikx at woklene tu'n njaw nimsa'ne junx tuk'il Crist ok tul tuj tajwalil.
2Aqeye anciano, kypastorin oke qe t-ẍne'l Dios o che kyaj q'o'n tuj kykwente, ex kykwentin oke qe; pero mya lajwers tu'n kyxi'ye, kyu'nx kyib'e tu'n kyxi'ye ik tza'n tajb'il Dios, ex mya tu'n kyk'monteye jun kamb'ab'l mya tuj tumel, noq o'kx tu'n kyajb'ene tu'n tkyaqil kyk'u'je.
3Ex mi'n kub' kyximane tu'n kyoke te kyajaw qeju ate' tuj kykwente, noq o'kx tu'n kyoke te jun yek'b'il tu'n kyok lpe' ẍne'l kyi'je.
4Oktzun tul ju Nejenel kye pastor, ok kyk'ma'ye jun oyaj mlay naj ex tb'anilxix.
5Ax ikx kyeye, aqeye ku'xun, che tene tjaq' kykawb'il anciano; ex kykyaqile che oke mans tu'n kyajb'ene kyxolxe, porke in tma'n tuj Tu'jil:
At tq'oj Dios kyi'j qeju in jaw kyniman kyib', atzun qeju mans in tzaj tq'o'n t-xtalb'il kye, chi tuj Tu'jil.
6Kyja'tzun, kymansin kub' kyib'e tjaq' tipumal tq'ab' Dios, tu'ntzun kyjaw nimsa'ne tu'n ok tpon tq'ijlalil.
7Tkyaqilju in b'aj kyk'u'je ti'j, kyq'onxe tuj tkwent Dios, porke ate Dios kwentil kyeye.
8Tenx kynab'le ex che xq'uqine porke ate tajaw il aj q'oj kyi'je, ex in b'et kyi'jele, in tzanun ik tza'n jun b'alun, in jyon ti'j alkye jun tu'n t-xi tchyo'n.
9Che we'xixe twitz, kyuw kytene tuj kyokslab'le, porke b'a'n kyu'ne, tuj tkyaqil twitz tx'otx' nnik'x kyu'n kyermaniye ik tza'n kyeye nnik'x kyu'ne.
10Kyb'ajlenxitzun yajla'ne kab' q'ij, axte Dios ktz'aqsalte kynab'le, ex tu'n kywe'xixe tuj kyokslab'le, ex kq'olte kyipumale, ex kkyuwsal kyeye. Axte Dios in tzaj q'onte nim t-xtalb'il qe, ex ma qo txkonjtz tu'n, tu'n qten tuj t-spik'umal te jumajx noq tu'n Jesucrist.
11Nimanxwit ju tb'i, ex tu'n tkawin tuj tkyaqil tab'q'iyil te jumajx. Ikxwitju.
Jun q'olb'eb'l tu'n apostol Pedro te b'ajsb'il yol12Ma txi ntz'ib'ane kab' ox yol kyeye; ate Silvano kxel q'inte u'j, porke aju erman lu ma tz'el nnik'e ti'j in japunxix tu'n tuj taq'un Dios. Ma txi ntz'ib'ane tu'n t-xi nq'o'ne kynab'le ex tu'n t-xi nchik'b'ane kyeye qa atzun t-xtalb'il Dios jlu axix tok. Ax che tenkje tuj t-xtalb'il.
13In che'x q'olb'e'ne kyu'n okslal ate' tuj Babilonia, aqeju ma che jaw sk'o'n junx kyuk'ile, ex in che'x q'olb'e'ne tu'n Marcos aju ik tten ik tza'n jun nk'wa'le.
14Kyq'olb'em kyib'e kyxolxe, ex kytz'ub'an el kywitze tu'n tkyaqil kyk'ujlalile.
Awt Dios q'uqb'ante kyk'u'je kykyaqile aqeye okslal ti'j Jesucrist. Ikxwitju.
Who We AreWhat We EelieveWhat We Do
2025 by iamachristian.org,Inc All rights reserved.
