Éxodo 7 - Mam Huehuetenango New Ortography

1Tzajtzun tma'n Qman te Moisés kyja':

—B'intza. O txi nq'o'ne toklena tu'n tyolina twitz Faraón te nxele; atzunte Aarón aju ttzika k-yolil te t-xela.

2Kxel tma'na te Aarón tkyaqilju kxel nma'ne teya; atzunte Aarón aju ttzika kxel tma'n te Faraón, tu'ntzun kyetz ttzoqpi'n qe aj Israel tuj ttx'otx'.

3Atzun weye kb'el nkyuwsa'ne tanmi Faraón, ex che b'el nb'incha'ne nim techal ex b'inchb'en nim kyipumal tuj Egipto.

4Ex mlay tz'okx tniman Faraón kyyole maske b'ant tkyaqil jlu. Atzun weye kxel nyek'une wipumale, kb'el nq'o'ne castiw ma'xix kyib'aj aj Egipto, ex tuj k'lojin che eletz wi'ne qe xjal etzan wu'ne, aqe aj Israel.

5Ok t-xi nyek'une wipumale kye aj Egipto ex ok kyetz wi'ne qe aj Israel kyxol, k'eleltzun kynik' aj Egipto ti'j qa aqine Kymane, chi Dios te Moisés.

6Kyb'inchatzun Moisés ex Aarón ik tza'nx o tma Qman kye.

7Otoq japun Moisés twi' 80 ab'q'i, atzunte Aarón otoq japun twi' 83 ab'q'i tej kyyolin twitz Faraón.

Aju tky'aqo'ch Aarón

8O yolin Qman tuk'il Moisés ex Aarón ex tzaj tma'n kye kyja':

9—Qatzun ma tzaj tqanin Faraón kyeye: Kyyek'untze jun techal qa chi, q'manxtzuna te Aarón tu'n ttzaj ti'n tky'aqo'ch ex tu'n t-xi t-xo'n twitz Faraón tu'n tok te jun lob'aj, chi Qman.

10E je'xtzun Moisés ex Aarón twitz Faraón, ex o kyb'incha ik tza'n otoq tma Qman kye; xitzun t-xo'n Aarón tky'aqo'ch twitz Faraón ex kywitz qeju at kyoklen ttxlaj, ex ok tky'aqo'ch te jun lob'aj.

11E tzajtzun ttxko'n Faraón qe aj nab'l ex qe chman; ax ikx kye kyb'incha tu'n kymañ ik tza'n otoq tb'incha Aarón.

12Xi t-xo'n teyle junjun tky'aqo'ch twitz tx'otx', ex e jo'k te lob'aj. Atzunju tky'aqo'ch Aarón e je'x tb'alq'u'n qe kyky'aqo'ch qe chman ex kyky'aqo'ch qe aj nab'l.

13Atzunte Faraón kub' tkyuwsa'n tanmi, ex minti' xi tq'o'n twi' ti'j tyol Moisés ex Aarón, ik tza'n otoq tma Qman.

Aju k'ixb'isab'l tej tok a' te chik'

14Tzajtzun tma'n Qman te Moisés kyja':

—Ma kyuwix tanmi Faraón ex mi'n taj tu'n kyex ttzoqpi'n qe aj Israel,

15txi'ya prim nchi'j tuk'il Faraón ok tku'x ttzi nima, atzun b'ix ayona ti'j ttzi a', q'i'n tky'aqo'cha tu'na, aju ok te lob'aj,

16ex q'manxa te kyja': Ma chin tzaj sama'ntle tuk'ila tu'n Qmane aju Qdiose aqo'ye aj Hebreo, tu'n t-xi nma'ne teya kyja': Che ttzoqpi'mexa qe xjal etzan wu'ne, tu'n kyk'ulun weye tuj tzqij tx'otx'. Atzun teya b'ajx txi tnimana tu'n kyex ttzoqpi'na.

17Kb'el npeq'une nima tu'n nky'aqo'che tzyu'n wu'ne, ex k'okel nima te chik', ex tu'n jlu k'elel tnik'a ti'j qa aqine Dios, chi Qmane.

18Che kymel qe kyiẍ ate' tuj nima, nim ktzuwixtel, ex ktzajel molmon kyk'u'j aj Egipto ti'j tu'n mi'n t-xi kyk'a'n, chikuya te Faraón.

19Tzaj tma'ntl Qman te Moisés: Q'manxa te Aarón kyja': Tzyuma tky'aqo'cha ex nuqpinx tq'ab'a kyib'aj kykyaqil a' tuj Egipto, tib'aj nima, kyib'aj qe toma, qe najab' ex qe tkub'il a', tu'n tok a' te chik', ex tu'n tten chik' kyuj qe chok tze' ex qe chok ab'j tuj tkyaqil tx'otx' Egipto, chikuya te Aarón, chi Qman te Moisés.

20Tb'inchatzun Moisés ex Aarón ik tza'n otoq tma Qman. Jaw ti'n Moisés tky'aqo'ch, kub' tpeq'un tib'aj nima twitz Faraón ex kywitz qeju attoq kyoklen ttxlaj, ex tkyaqil a' tuj nima ok te chik'.

21Ax ikx e b'aj kyim qe kyiẍ ate'toq tuj, o tzuwix nima, ex tu'n jlu minti' e k'an aj Egipto ti'j. Tuj tkyaqil tx'otx' Egipto attoq chik'.

22Ax ikx kye chman tuj Egipto o kyb'incha jlu tu'n kymañ. Tu'ntzun jlu kub' tkyuwsa'n tanmi Faraón, ex minti' xi tq'o'n twi' ti'j Moisés ex Aarón, ik tza'n otoq tma Qman.

23Ajtzun meltz'aj Faraón tja, ex minti' xi tq'o'n twi' ti'j jlu.

24Tuj tkyaqil tx'otx' Egipto e ku'x kyjaqo'n xjal jul ttzi'yile nima tu'n tjatz a' te kyk'a, tu'nju minti'toq tumel tu'n kyk'an a' tuj nima.

Aju k'ixb'isab'l kyu'n ẍal

25Kyjapunlenxi wuq q'ij tkub'len tk'ixb'isa'n Qman nima,