Ezequiel 10 - Mam Huehuetenango New Ortography

B'i'x ex tajwalil Qman tuj tja

1Ex wile jun ti'xti ik ke'yin ik tza'n jun q'uqb'il te kawb'il, ex mer tal ab'j tb'anilxix zafiro tb'i tkub'sa'n tib'aj ju wa'lb'il, aju tkub'sa'n tib'ajxi kywi' qe querubín.

2Xi tma'n Qman te xinaq tok t-xb'alun saq ke'yin: Tokxa kyxol qe rwed kyjaq' qe querubín, ex q'intza jun yub' xq'a'l in k'ant tu'n q'aq', aju tokx kyxol qe querubín, ex sputinxa tib'aj tnam.

Ex o wile tej tokx ju xinaq.

3Otoq che pon we' qe querubín ttxlaj tja Dios tuj b'anq'ab'aj, ex aju ttxa'n pe'n tkub' twitz tja Dios b'i'x noj tu'n muj.

4Jaw laq'e' tajwalil Qman kyib'aj qe querubín, ex kyja' xi' tu'n tpon ttzi ja; ex b'i'x noj tuj tja Qman tu'n muj, ex b'i'x ul qoptz'aj ttxa'n pe'n tu'n t-spik'umal tajwalil Qman.

5Aju tq'ajq'ajel kyxik' qe querubín o b'injtz max ttxa'n pe'n ti'jxi twitz tja Dios. Mer aku tq'ajq'ajel ok tyolin Dios aju at tipumal tu'n tb'ant tkyaqil tu'n.

6Xi tma'n Qman teju xinaq, aju tok t-xb'alun saq ke'yin, tu'n tetz ti'n q'aq' kyxol qe rwed ex kyxol qe querubín. Okxtzun ju xinaq ex kub' we' kytxlaj qe rwed.

7Jun kye qeju querubín xi tnuqpi'n tq'ab' tib'aj q'aq' in k'ant kyxol, tzaj ttzyu'n ch'in xq'a'l in k'ant q'aq' ti'j, ex kub' tq'o'n tuj tq'ab' ju xinaq tok t-xb'alun saq ke'yin. Tzajtzun ttzyu'n xinaq aju xq'a'l lu ex ex tuja.

8Tjaq' kyxik' qe querubín q'ancha'l jun tilb'ilal ik ke'yin ik tza'n tq'ab' xinaq.

9Junx kyuk'il qe querubín o wile kyaje rwed, jun rwed tkub'sa'n ttxlaj junjun kye. Ex qe rwed lu in qoptz'aj kyi'j, mer ik tza'n qe tal ab'j topacio kyb'i.

10Qe kyaje rwed lu junx ta' ke'yb'il kye, ex aju ke'yb'il kye mer ik tza'n q'e'l tex juntl rwed tujxi juntl.

11Oktzun kyxi b'et qe querubín noq jatum, qa kub'ni, qa jawni, qa elni ex qa okni, minti' in q'on welt kyximlal, o'kx in che'x lpe' ti'j jun nejni kywitz.

12Nim tb'aq' witzb'aj tok kyi'jele kyximlal, ex ti'j ttzal kyi'j, ex ti'j kyq'ab' ex ti'j kyxik', ax ikx kyi'j qe kyaje rwed.

13O nb'iye tej t-xi q'ma'n kye rwed kyja': Che sutine.

14Teylex te junjun querubín at kyaje kywitz: Aju tnejel kywitz ik ke'yin ik tza'n twitz jun tor; aju tkab'in kywitz ik ke'yin ik tza'n twitz jun xinaq; aju toxin kywitz ik ke'yin ik tza'n twitz jun b'alun; aju tkyajin kywitz ik ke'yin ik tza'n twitz jun t'iw.

15Ax qe querubín lu otoq che ok nke'yine ttzi nima Quebar. Ex e jaw lipan twitz kya'j,

16ok kyb'et qe querubín ax ikx qe rwed in che b'et kytxlaj, ex ok kyjaw lipan twitz kya'j minti' nne'l kypa'n kyib' qe rwed kyi'j.

17Ok kywe' qe querubín ax ikx qe rwed b'i'x in che we'; ex ok kyjaw lipan twitz kya'j ax ikx qe rwed in che jaw twitz kya'j junx kyuk'il, ex ax kychwinqlal qe querubín at kyuj qe rwed lu.

18El tpa'n tib' tajwalil Qman tib'aj ttzi ja, ex kub' ten kyib'aj qe querubín.

19Xitzun kylik'un querubín kyxik' ex e jaw lipan twitz kya'j. O wile tej kyjaw lipan kyuk'ix qe rwed ate' kytxlaj, ex o wile tej kywe' ttzi tja Qman, aju xi'yni twitz tuj tumlal tjawitz q'ij. Ex tkub'toq tajwalil Kydios aj Israel kyib'aj.

20Ax qe querubín lu otoq che ok nke'yine ttzi nima Quebar, aqeju tkub'sa'n Dios kyib'aj. Eltzun nnik'e kyi'j, atzun qe jlu querubín kyb'i.

21Teylex te junjun attoq kyaje kywitz ex kyaje kyxik', ex tjaq' kyxik' q'ancha'l qe tilb'ilal ik che ke'yin ik tza'n tilb'ilal tq'ab' jun xinaq.

22Qe kywitz ikx che ke'yin ik tza'n che ke'yin kywitz qe querubín otoq che ok nke'yine ttzi nima Quebar. Teylex te junjun xi b'et tumlal jatum in xi kyke'yin.