Números 28 - Mam Huehuetenango New Ortography

Qe oyaj tu'n kyxi q'ot tkyaqil q'ij Éxodo 29.38-46

1Tzaj yolin Qman tuk'il Moisés ex tma:

2Q'manxa kye aj Israel tu'n mi'n t-xi kykolin tu'n ttzaj kyq'o'n kyoyaj weye, aqeju patun in che kub' kyuj qe ninq'ij b'animaj ti'j, te jun oyaj at tk'ok'jal in chin tzalaje ti'j.

3Ax ikx q'manxa kye: Aqeju oyaj tu'n tkub' kypatun te weye, atzun qe jlu: Tkyaqil q'ij kb'el kypatun kab'e tal tman ẍne'l te jun ab'q'i qe ex minti' kypaltil;

4jun kb'el patit te prim ex juntl te qale,

5tuk'ix kab'e libr arin tb'anilxix xyoq'imaj tuk'il jun litr aseyt nne'l ti'j twitz olivo.

6Atzunju chojb'il lu tu'n tkub' patit tkyaqil q'ij, ik tza'n xi nma'ne kye t-xe witz Sinaí, te jun oyaj at tk'ok'jal in chin tzalaje ti'j,

7tuk'ix jun litr oyaj vin, tu'n t-xi kyq'o'n ti'j junjun tal ẍne'l. Kb'el qet vin lu nwitze twitz njaye.

8Aju tkab'in tal tman ẍne'l kb'el patit te chojb'il te qale, tuk'ix oyaj ti'j twitz awal ex ju oyaj ti'j ta'l twitz uva, ik tza'nx ju oyaj kxel kyq'o'n te prim. Jun oyaj lu patun in kub' at tk'ok'jal in chin tzalaje ti'j.

Qe oyaj tu'n kyxi q'ot kyuj q'ij te ojlab'l

9Kyuj qe q'ij te ojlab'l ktzajel kyq'o'n kab'e tal tman ẍne'l te jun ab'q'i qe ex minti' kypaltil, tuk'ix kyaje libr arin tb'anilxix xyoq'imaj tuk'il aseyt te jun oyaj ti'j twitz awal, tuk'ix oyaj ti'j ta'l twitz uva.

10Atzun oyaj jlu tu'n tkub' patit kyuj qe q'ij te ojlab'l, ex part aju oyaj in kub' patit tkyaqil q'ij tuk'ix oyaj ti'j ta'l twitz uva.

Qe oyaj tu'n kyxi q'ot kykyaqil xjaw

11Tuj tnejel q'ij te teyle junjun xjaw ktzajel kyq'o'n qe chojb'il patun in che kub' te weye, ex atzun qe jlu: Kab'e tal tor, jun tman ẍne'l ex wuq tal tman ẍne'l ma te jun ab'q'i qe, ex kykyaqil qe jlu minti' kypaltil.

12Ti'j teyle junjun tal tor ktzajel kyq'o'n qaq libr arin tb'anilxix xyoq'imaj tuk'il aseyt, atzun ti'j tman ẍne'l ktzajel kyq'o'n kyaje libr arin xyoq'imaj tuk'il aseyt,

13ex ti'j teyle junjun tal tman ẍne'l ktzajel kyq'o'n kab'e libr arin xyoq'imaj tuk'il aseyt. Atzun jun oyaj jlu patun in kub' at tk'ok'jal in chin tzalaje ti'j.

14Ti'j teyle junjun tal tor, ktzajel kyq'o'n kab'e litr oyaj ta'l twitz uva, ex jun litr tuk' mey ti'j tman ẍne'l, ex jun litr ti'j teyle junjun tal tman ẍne'l. Atzun qe chojb'il lu patun tu'n kykub' ok kytzaj ke'yin xjaw tkyaqil maj tuj ab'q'i.

15Ax ikx ktzajel kyq'o'n jun tman chip weye te chojb'il kyil ok kytzaj ke'yin xjaw, ex part qe chojb'il patun in che kub' tkyaqil q'ij, tuk'ix oyaj ta'l twitz uva in che'x q'ot kyi'j.

Qe oyaj tu'n kyxi q'ot tuj Xjan Q'ij Levítico 23.5-8

16Tuj kyajlaj tajlal tnejel xjaw te ab'q'i kb'el kyik'sa'n Xjan Q'ij te weye,

17ex tuj olaj tajlal ax xjaw lu kb'el kyik'sa'n jun ninq'ij. Wuq q'ij che wa'l pan minti' t-samel tuj tu'n tjaw mal tk'u'j.

18Tuj tnejel q'ij ninq'ij lu, k'okel jun b'uyj tib'il xjan kyu'n, ex mi jun b'a'n tu'n taq'nan tuj q'ij lu.

19Tujx q'ij lu kb'el kypatun te chojb'il weye, kab'e tal tor, jun tman ẍne'l, ex wuq tal tman ẍne'l ma te jun ab'q'i qe, ex kykyaqil qe jlu minti' kypaltil.

20Kyi'j qe chojb'il lu ktzajel kyq'o'n arin xyoq'imaj tuk'il aseyt: Ti'j junjun tal tor, qaq libr arin, ti'j tman ẍne'l, kyaje libr

21ex ti'j junjun tal tman ẍne'l kab'e libr.

22Ax ikx kxel kyq'o'n jun tman chip te chojb'il kyil.

23Atzun jlu kxel kyq'o'n, ex part aju chojb'il patun in kub' tkyaqil prim.

24Iktzun ktemb'il kyu'n teyle junjun q'ij tuj wuq q'ij ninq'ij lu, te jun oyaj patun in kub' at tk'ok'jal in chin tzalaje ti'j. A jlu kxel kyq'o'n, ex part aju chojb'il kb'el patit tkyaqil q'ij junx tuk'il oyaj ta'l twitz uva.

25Ax ikx tuj twuqin q'ij te ninq'ij lu k'okel jun b'uyj tib'il xjan kyu'n, ex mi jun b'a'n tu'n taq'nan tuj q'ij lu.

Qe oyaj kyi'j tnejel kywitz awal Levítico 23.9-22

26Tuj ninq'ij kyi'j tnejel kywitz awal, ok t-xi kyq'o'n aju tnejel ak'aj twitz awal weye, ex qa aju ninq'ij ok tjapun b'aj wuq seman tb'ajlenxi Xjan Q'ij, ax ikx k'okel jun b'uyj tib'il xjan kyu'n, ex mi jun b'a'n tu'n taq'nan tuj q'ij lu.

27Kb'el kypatun kab'e tal tor, jun tman ẍne'l ex wuq tal tman ẍne'l ma te jun ab'q'i qe, te chojb'il weye at tk'ok'jal in chin tzalaje ti'j.

28Kyi'j qe chojb'il lu ktzajel kyq'o'n arin xyoq'imaj tuk'il aseyt: Ti'j junjun tal tor qaq libr arin, ex ti'j tman ẍne'l kyaje libr,

29ex kab'e libr ti'j junjun tal tman ẍne'l.

30Ax ikx ktzajel kyq'o'n jun tman chip te chojb'il kyil.

31Kb'el kypatun qe chojb'il lu, tuk'ix twitz awal ex ta'l twitz uva in xi q'ot kyi'j, ex part qe chojb'il patun in che kub' tkyaqil q'ij. Qe alumaj kxel kyq'o'n te chojb'il, il ti'j minti' kypaltil.