1Tej kyyolin qe aj Efraín tzaj tchi kyi'j xjal, o nimanjtz kyyol kyu'n txqantl k'loj kyiyjil aj Israel, ex e naj qe aj Efraín tu'n kyex kyil tu'nju e k'ulun twitz tilb'ilal Baal.
2Ex kukx kyb'inchan il. Nno'kx kyq'o'n saq pwaq tuj q'aq' tu'n tkub' ulj ex in kub' kyb'incha'n qe tilb'ilal ti'j ik tza'nx kyajb'il; kykyaqil jlu kyb'inchb'en xjal at kynab'l tu'n kyb'inchante.
Ex in kyma'n kye xjal: Kyq'onxe qe chojb'il kye ex kytz'ub'an ele kywitz qe tilb'ilal ik che ke'yin ik tza'n jun tal tor.
3Kyja'tzun, ik che okel ik tza'n muj in kub' juke' prim, ik tza'n tq'ab' che'w in kub' twitz tx'otx' te prim, jurat in kub' naj, ik tza'n ch'im in xi tiqan kyq'iq' ex ik tza'n sib' in b'uqin.
Jun nintz xitb'il ktzajel kyib'aj aj Israel4Chi Qman: Aqine Kydiose aju Kymane atxix tej kytene tuj Egipto. Mi'n txi kynimane juntl dios, o'kx qine, ex o'kx aqine klol kyeye.
5Aqine in kwentin kyeye tuj tzqij tx'otx' jatum at nim ta'w kyaq.
6Ex tej tnoj kyk'u'je jaw kyniman kyib'e ex ik' nna'le kyu'ne.
7Tu'ntzun jlu ik chin okele te kyeye ik tza'n jun b'alun, ex ik tza'n jun tigr chin k'okel tzoqpaje kyi'je tuj b'e.
8Chin okel tzoqpaje kyi'je ik tza'n jun ttxu oso otoq che'x elq'a'n qe tal, ex b'i'x kb'ajel npaẍu'ne kyanmiye. Ex ik tza'n in b'ant tu'n jun b'alun, ax che najel wu'ne ma chixin; che najel wu'ne ik tza'n tu'n jun txkup.
9Aqeye aj Israel, che najele wu'ne ex ¿alkye jaku onin kyi'je?
10¿Jatum ta' kyreye ja'lo tu'n tkolin kyi'je tuj tkyaqil kytanmiye? ¿Jatum ate' qe nejenel kyxole? Ax qeye e tzaj qaninte weye tu'n tok nq'o'ne jun kyreye ex qe nejenel kyxole.
11Tej tok nq'o'ne kyreye tzaj nq'oje kyi'je, ax ikx tzaj nq'oje kyi'je tej tel wi'ne kyreye.
12Aju kyb'inchb'en aj Efraín mya b'a'n, k'alo'n tuj potzb'il te ex k'u'n aju kyil.
13Ma pon tq'ijlalil tu'n kyok aj Israel ik tza'n jun k'wa'l kyja' tul itz'j, ex aju k'wa'l lu minti' tnab'l, tk'i' tu'n ttzaj pich'e' tu'n tul itz'j.
14Che kolpetel wu'ne tu'n mi'n kypon tuj kynajb'il kyimni ex che kletel wu'ne te kamik. Aya kamik, ¿jatum ta' tipumala aju in b'aj naj nimku tu'n? Aya kynajb'il kyimni, ¿jatum ta' ju xitb'il tu'na? Mlay tzaj tz'e'y nk'u'je kyi'j qe xjal lu.
15Maske ik ma che ok aj Israel ik tza'n ajlaj in ch'iy naj, tzul jun kyq'iq' tuj tjawitz q'ij, aju kyq'iq' lu in xumin wen, in tzaj tuj lugar tzqij tx'otx', ex tkyaqil a' ex tkyaqil twi a' k'ajel tzqij ex kb'el b'aj tu'n. K'elel q'i'n kyq'inumab'l tuk'ix tkyaqilju wi'yilxix at kye.
16Kb'el kycastiw aj Samaria tu'nju ma jaw kyi'n kyib' tu'n kyq'ojin ti'j Kydios. Che b'el b'yo'n tu'n spad, ex che b'el peq'cha'n qe kyk'wa'l twitz tx'otx' ex qe kyxu'jil ch'ix tul kyal kb'ajel jaqo'n kyk'u'j tu'n spad, chi Qman.
Who We AreWhat We EelieveWhat We Do
2025 by iamachristian.org,Inc All rights reserved.
