1Tejtzun tb'aj tkyaqil jlu, e ul laq'e' qe nejenel kye xjal judiy ntxlaje, ex tzaj kyma'n weye kyja': Qe aj Israel, kyuk'ix qe pal ex qe aj Leví, minti' pab'l tib' kyxol kyuk'il qe xjal ax najlqe tuj tx'otx' lu, aqeju aj Canaán, aj Heteo, aj Ferezeo, aj Jebuseo, aj Amón, aj Moab, aj Egipto ex aj Amorreo, noq o'kx ma che'x lpe' ti'j kycostumr qe xjal lu puro ik'b'ilxix.
2Aku qe ex qe kyk'wa'l ma che jaw moje' kyuk'il kyme'jel qe xinaq te lugar lu; kyja'tzun tten ma b'aj kysmon kyib' qe xjal etzan tu'n Dios kyuk'il qe xjal mya Judiy qe. Ex aqeju ma che b'inchante il lu tnejel, aqe nejenel ex qe gobernador, che chi weye.
3Tejtzun nb'inteye tqanil lu, el nsb'it'une nxb'alune wi'je, jatz nb'aqo'ne ttzmal nwi'ye ex nxmatze te jun yek'b'il te ta'w nb'ise tuj wanmiye, in kub' qe'ye ex tzaj nimxix nb'ise.
4Kykyaqil qeju in che xob'toq twitz Dios, aju Kydios aj Israel, ul b'aj kychmon kyib' wuk'ile tu'n tlaj il kyb'incha qeju otoq che'x q'i'n pres ex otoq che ul meltz'aj; atzun weye kukx q'uql qine tu'n nim nb'ise tejxi tpon or tu'n tkub' patit chojb'il te qale.
5Tujtzun or lu in jaw we'ye jatum q'uql qintoqe tu'n b'is, ex tokxtoq nxb'alune sb'it'umaj, in kub'tzun ẍmeje'ye twitz Qman aju Ndiose,
6ex xi nma'ne te kyja': Aya Nman Dios, in chin ch'ixwiye ex tzpetni ta' nnab'le, minti' in knet ttxolil nyole tu'n nyoline tuk'ila; ma chmet nimxix qpaltile twitza, aju qile nimxix ma japun tuk'ila tuj kya'j.
7Atxix tuj tq'ijlalil tej kyten qtzan qxe'chele ax ikx ja'lo kukx in qo b'inchane nimxix il. Tu'n tlaj qb'inchb'ene mya b'a'n o qo'x q'o'ne tuj kyq'ab' qe rey kye txqantl nasyon, tza'nx qeye, kyuk'ix qreye ex qe pal. At o che kub' b'yo'n tu'n spad ex o ex q'i'ne tuj qtanmiye tu'n qxi'ye tuj juntl tnam, el q'i'n aju at qeye ex o el ik'une, ax ikx in b'aj qi'je ja'lo.
8Ax ikx ja'lo, aya Qman ex Qdiose, tu'nju tk'ujlalila ma tzaj tq'o'na amb'il qeye tu'n qkyaj tene jun b'yuj qb'ete tu'n qule najal tuj tx'otx' xjan; tu'na ma spik'e' tuj qwitze juntl maj, ex maske majentoq qo'ye, ma tzaj tq'o'na tzalajb'il tuj qanmiye.
9Maske majen qo'ye, pero minti' ma qo kyaj tkolina; ma tzaj tyek'una tk'ujlalila qeye kywitz qe rey kye aj Persia, ma tzaj tq'o'na ak'aj qchwinqlale tu'n tjaw qb'incha'ne juntl maj tjaya aju o kub' xitj, ma tzaj tq'o'na kolb'il qeye tuj Judá ex tuj Jerusalén.
10Atzun ja'lo Qman Dios ¿ti kxel qma'ne tib'aj tkyaqil jlu? Minti' ma che japun qe tmandamyenta qu'ne,
11aju tzaj tma'na kye t-sanjela aqeju tmajena. B'i'x tzaj tma'na qeye qa nimxix mya b'a'n at tuj tx'otx' jatum tu'n qokxe tuj, aju tu'n tok te qetzb'ile. Tu'n tlaj kyb'inchb'en xjal najlqe tuj lugar lu ex tu'nju kycostumr puro ik'b'ilxix, nojni twitz tx'otx' tu'n mya b'a'n.
12Ax ikx tzaj tma'na qeye tu'n mi'n t-xi qq'o'ne qme'jele tu'n kymoje' kyuk'il kyky'ajal qe xjal lu, ex tu'n mi'n t-xi qq'o'ne amb'il tu'n kymoje' qe kyme'jel kyuk'il qky'ajale, ex tu'n mi'n q-onine kyi'j qe xjal lu tu'n kyanq'in tuj txub'txaj; tu'ntzun tokxix qipune ex tu'n qwa'ne ti'j kywitz awal in tzaj tq'o'n tx'otx', ex te tib'ajxi tu'n tkyaj ten tx'otx' lu te kyetzb'il qe qiyjile te jumajx.
13Te tib'ajxi tkyaqilju ma tzaj qi'je tu'n tlaj qb'inchb'ene mya b'a'n ex qile nimxix, minti' ma kub' tq'o'na qcastiwoye ik tza'nx qile, noq o'kx ma tzaj tq'o'na amb'il qeye, jun b'yuj qb'ete, tu'n qule tzalu.
14¿B'a'npetzun tuj twitza tu'n mi'n t-xi qnimane tmandamyenta ex tu'n qmoje'ye kyuk'il qe xjal ik'unxix kycostumr tu'na? ¿Mlaypetzun tzaj tq'oja qi'je ex mlaypetzun qo kub' b'aj tb'yo'na tu'n mi'n tkyaj anq'in jun qeye?
15Aya Nman aju Kydios aj Israel tz'aqlxixa quk'ile; noq tu'n t-xtalb'ila ma kyaj anq'in jun b'yuj qb'ete ik tza'n in qile ja'lo. Qeye ax tok aj il qo'ye twitza; tu'ntzunju minti' qoklene tu'n qtene twitza, nchiye tuj nna'j Diose.
Who We AreWhat We EelieveWhat We Do
2025 by iamachristian.org,Inc All rights reserved.
