Jeremías 21 - Mam Huehuetenango New Ortography

Tqanil castiw tu'n tkub' tib'aj tnam Jerusalén

1Xi sama'n Pasur aju tky'ajal Malquías, tu'n rey Sedequías, tuk'ix pal Sofonías aju tky'ajal Maasías, e je'x sama'n tu'n kyyolin tuk'il Jeremías ex tu'n t-xi kyma'n te kyja':

2B'inchama xtalb'il, qaninxa te Qman ti kb'ajel qi'j, porke ma tz'ok tzoqpaj Nabucodonosor qi'j, aju rey te Babilonia. B'alo taj Qman tu'n tb'ant jun b'inchb'en nim tipumal tu'ntzun tel laq'e' Nabucodonosor qi'j, che chi.

Yolintzun Qman tuk'il Jeremías.

3Atzunte Jeremías xi ttzaq'we'n kye xjal otoq che'x sama'n tu'n Sedequías: Kyq'manxe te Sedequías kyja':

4Ate Qman aju Kydios aj Israel ma tma kyja': Aqine chin b'inchalte tu'n kyajtz meltz'aje ex tu'n kyul nchmo'ne tuj tmijil tnam tuk'il kymakb'ile tokx tuj kyq'ab'e, aqeju in che ajb'en kyu'ne te kyq'ojb'ile, ti'j rey te Babilonia ex kyi'j aj Caldeo, aqeju aj q'oj kyi'je ate' ti'jxi tnam.

5Ax qine chin okel tzoqpaje q'ojlel kyi'je tuk'il wipumale, tuk'il nq'oje ex ntx'u'jile nimxix.

6Che b'el nb'yo'ne kykyaqil xjal najlqe tuj tnam lu tu'n tx'u'j yab'il plojxix, ex kyuk'ix qe alumaj che kymel.

7Ex te tib'ajxi kxel nq'one Sedequías aju rey kye aj Judá tuj tq'ab' Nabucodonosor, junx kyuk'il qe xjal at kyoklen ttxlaj, ex kyuk'ix qe t-soldad ex qe xjal otoq che kyaj anq'in tuj tnam tik'lenxi tx'u'j yab'il, q'oj ex we'yaj, ex che xel nq'o'ne tuj kyq'ab' aj q'oj kyi'j, aqeju kyaj che kub' b'yonte kye. Che b'el b'yo'n tu'n spad tu'n Nabucodonosor, ex mlay tzik'x kyi'j tu'n mi'n kykub' b'yo'n, ex mlay tzaj q'aq'an tk'u'j kyi'j. Aqine Dios in chin q'mante jlu.

8Ax ikx q'manxa kye tnam xjal, chi Dios in tma'n kyja': Kxel nq'o'ne amb'il kye tu'n tjaw kysk'o'n jun kyb'e: Qa aju b'e te chwinqlal, ex qa aju b'e te kamik.

9Alkye ma kyaj ten tuj tnam lu, kymel tuj q'oj, tu'n we'yaj ex qa tu'n tx'u'j yab'il, atzunju ma tz'ex ex ma txi tq'on tib' kyuk'il aj Caldeo, aqeju kytxolb'an kyib' ti'j tnam, mlay kyim, ok kletel.

10Porke ma kub' nximane tu'n ttzaj wi'ne jun mya b'a'n tib'aj tnam lu te t-xel ju b'a'n. Kxel nq'o'ne tnam tuj tq'ab' rey te Babilonia ex k'okel tq'o'n tq'aq'al. Aqine Dios in chin q'mante jlu.

Tqanil te rey kye aj Judá ti'j q'oj tzul

11Ax ikx tzaj tma'n Qman weye: Txi'ya yolil tuk'il rey te Judá ex kyuk'il qeju ate' tuj tja, ex q'manxa kye: Kyb'intze aju tqanil tu'n Qman:

12Aqeye tiyjil David, kyb'intze tyol Qman: Kyb'inchanxe kyi'j xjal tuj tumelxix tkyaqil q'ij; kyklome qe xjal in che b'aj yajla'n kyu'n qeju yajlal kye, tu'ntzun mi'n ttzaj ntx'u'jile kyi'je tu'n tlaj kyb'inchb'ene mya b'a'n, ex qa mi'n, jaku tzaj ntx'u'jile kyi'je, ik tza'n jun q'aq', ex ok tk'ant mi a'l jun jaku yupj tu'n.

Tqanil castiw tu'n tkub' tib'aj tnam Jerusalén

13Aqeye xjal aj Jerusalén najlqeye twi' jun tal witz puro pk'at ex txolin kyi'je kyu'n tq'ab' xaq, ma tzaj nq'oje kyi'je aqeye in kyma'ne kyja': ¿Alkye b'a'n tok tzoqpaj qi'j? ¿Alkye jaku pon max jatum ta' qkolb'il qib'?

14Kb'el kycastiwoye wu'ne ik tza'nx kyb'inchb'ene; k'okel nq'o'ne tq'aq'al chk'ul at tuj kytx'otx'e, ex tu'n q'aq' lu kb'ajel tz'e'y tkyaqil ttxa'nile tnam. Aqine Dios in chin q'mante jlu.