2 Samuel 3 - Mam Huehuetenango New Ortography

1Nim tuj o ten q'oj kyxol qe xjal ate'toq tuk'il qtzan Saúl kyuk'il qeju xjal ate'toq tuk'il David, ex qe xjal ate'toq tuk'il David noq kyja' ok mastl kyipun, atzun qeju ate'toq tuk'il qtzan Saúl noq kyja' tb'aj kyipun.

Qe tky'ajal David e ul itz'j tuj tnam Hebrón 1 Crónicas 3.1-4

2Qe tky'ajal David e ul itz'j tej tten tuj tnam Hebrón, atzun qe jlu: Aju nej k'wa'l Amnón tb'i, tal ju xu'j Ahinoam aju aj Jezreel;

3aju tkab'in Quileab tb'i, tal ju xu'j Abigail aju t-xu'jilb'en qtzan Nabal aju aj Carmel; aju toxin Absalón tb'i, tal ju xu'j Maaca aju tme'jel Talmai aju rey te Gesur;

4aju tkyajin Adonías tb'i, tal ju xu'j Haguit; aju tjwe'yin Sefatías tb'i, tal ju xu'j Abital;

5aju tqaqin Itream tb'i, tal ju xu'j Egla aju juntl t-xu'jil David. Atzun qe jlu e ul itz'j tej axtoq ta' David tuj tnam Hebrón.

B'ant ti'j jun kyyol Abner tuk'il David

6Kukxtoq tok q'oj kyxol qe xjal ate'toq tuk'il qtzan Saúl, kyuk'il qeju ate'toq tuk'il David, ex kyxol qe xjal ate'toq tuk'il qtzan Saúl ok mas tipun Abner.

7Otoq ten jun tkab' t-xu'jil Saúl Rizpa tb'i, tme'jel jun xjal Aja tb'i, ex xi tma'n Is-boset te Abner:

—¿Tiqu'n ma kub' tana tuk'il tkab' t-xu'jil qtzan nmane?

8Atzunte Abner tzaj nimxix tq'oj ti'j Is-boset tu'nju otoq tma ikju, ex xi ttzaq'we'n kyja':

—¿Baqa tx'yan qine tu'n wajb'ene kye aj Judá? Tuj tumelxix ma chin ajb'ene kye qe xjal ate' tuk'il Saúl aju qtzan tmana, ex kye qe xjal at t-xilen kyuk'il ex kye qe tamiw, ex minti' xi nq'o'ne tuj tq'ab' David; atzun teya ma jaw t-simina yol wi'je qa ma nb'inchaye il tuk'il jun xu'j.

9Awt Qman kub' q'onte ncastiwoye kyuwxix qa mi'n ma b'ant wu'ne tu'n wonine te David, tu'n tjapun aju tzaj ttziyan Qman te,

10tu'n tel kyoklen qe tiyjil Saúl te rey, ex tu'n tkyuwset toklen David tu'n tkawin kyxol aj Israel ex aj Judá, ktzajelx qe' tuj Dan tu'n tpon b'aj max tuj Beerseba.

11Atzunte Is-boset minti' xi ttzaq'we'n, ex tzaj nim t-xob'il twitz Abner.

12Atzunte Abner xi t-sama'n qe sanjel q'malte te David kyja': ¿Al e ju tx'otx' lu? E tb'ant ti'j jun qyol qxol: Jaku chin onine teya tu'n kyul kykyaqil aj Israel tuk'ila.

13Atzunte David xi ttzaq'we'n: B'a'n, jaku b'ant ti'j jun qyol ex qa ma b'ant tu'na aju kxel nma'ne teya: Ok ttzaja ke'yil weye, mlay tzula nwitze qa mya uk'in Mical tu'na, aju tme'jel Saúl.

14Ax ikx xi t-sama'n David qe t-sanjel tuk'il Is-boset, ex xi tma'n te kyja': Q'ontza Mical weye, aju nxu'jile, aju in moje'ye tuk'il nej ex o chjet wu'ne tu'n jun syent ttz'umal kytz'a'lb'il qe xjal aj Filisteo e kub' nb'yo'ne.

15Xitzun tma'n Is-boset tu'n tel xk'ayin Mical twitz tchmil, aju Paltiel tb'i, ex tky'ajal Lais;

16atzunte Paltiel xi lpe' ti'j t-xu'jil ex in oq'toq ti'j, ex xi lpe' ti'j tejxi tpon tuj tal tnam Bahurim. Ex atzun xi tma'n Abner te tu'n taj meltz'aj, ex ajtzun meltz'aj Paltiel.

17Te tib'ajxi o yolin Abner kyuk'il qe kytijil xjal kyxol aj Israel ex xi tma'n kye kyja': Ma b'et-xi q'ij kyajb'ile tu'n tok David te kyreye.

18Ma pon tq'ijlalil ja'lo tu'n kyb'inchanteye jlu, porke ma tzaj ttziyan Qman te David kyja': Tu'n David che kletel qe aj Israel; aqeju etzan tu'n che kletel tjaq' kykawb'il aj Filisteo ex tuj kyq'ab' kykyaqil qe aj q'oj kyi'j.

19Ax ikx o yolin Abner kyuk'il qe xjal tiyjil Benjamín, ex te tib'ajxi xi' tuj tnam Hebrón tu'n t-xi tma'n te David alkye kyajb'il aj Israel, ex alkye kyajb'il kykyaqil tiyjil Benjamín.

20Uk'in winqin xinaq tu'n Abner tej tpon tuj tnam Hebrón jatum ta'toq David, ex o b'ant jun nintz wa'n tu'n David te Abner ex te kye qeju tuk'il uk'in tu'n.

21Ex xitzun tma'n Abner te David kyja':

—Ja'lo b'a'n tu'n waje tu'ntzun kyok nchmo'ne kykyaqil aj Israel, tu'ntzun tkyaj b'ant ti'j jun kyyol tuk'ila, Tat Rey, ex tu'ntzun tkawina kyib'aj ik tza'nx tajb'ila.

B'ajtzun kyq'olb'en kyib' David tuk'il Abner, ex aj meltz'aj Abner in tzalaj wen.

Kub' b'yo'n Abner tu'n Joab

22Pontzun Joab kyuk'ix qe t-soldad David otoq che'x aj q'ojlel, ex q'i'ntoq nimku ti'xti kyu'n aju otoq tz'el kyi'n kye aj q'oj. Ya mi a'ltoq te Abner tuk'il David tuj tnam Hebrón, otoq tz'aj meltz'aj in tzalaj wen tb'ajlenxi kyq'olb'en kyib' tuk'il David.

23Tej tpon Joab kyuk'ix kykyaqil qe soldad in che b'ettoq tuk'il, xi q'ma'n te qa ate Abner aju tky'ajal Ner otoq pon aj tuk'il rey, ex otoq tz'aj meltz'aj tb'ajlenxi kyq'olb'en kyib' tuk'il rey.

24Xi'tzun Joab tuk'il rey, ex xi tma'n te kyja':

—¿Ti ma tb'inchaya? Ma tzul aj Abner ke'yil teya, ¿tiqu'n ma tz'aj ttzoqpi'na tu'n taj meltz'aj?

25¿Minti'petzun b'a'n tu'na, ate Abner aju tky'ajal Ner ma tzul aj noq tu'n tkub' sb'u'na tu'n, ex ke'yilte jatum in b'eta, ex tu'n telxix tnik' ti'j tkyaqilju in tb'incha'na?

26Ex tej tetz Joab tb'ajlenxi yolin tuk'il David, xi t-sama'n qe sanjel jyolte Abner, ex minti'toq b'in David ti'j jlu, ex ajtz meltz'aj Abner kyu'n, max jatum ta' ju xoch Sira tb'i.

27Tejtzun tpon Abner tuj tnam Hebrón, xi q'i'n tu'n Joab ti'jxi tlamel tnam tu'ntzun tyolin tuk'il tjunalx, ex atzun xi t-xayu'n jun kchil tuj tk'u'j, ex kyim tu'n tu'ntzun t-xelin tu'n tu'nju otoq kub' tb'yo'n Abner Asael aju terman.

28Tejtzun tb'inte David jlu mas yajxi, tmatzun kyja': Aqine kyuk'ix qeju ate' tuj nkawb'ile minti' qile twitz Qman ti'j tkamik Abner aju tky'ajal Ner.

29E tkub' tz'aq ju il lu tib'aj Joab ex kyib'aj kykyaqil qeju at kyxilen tuk'il, ex kuchiwt tu'n kyten junjun kyxol yab' qe tu'n poj in jaw tuj twi' kytz'a'lb'il, ex qa tu'n tx'a'k minti' q'anb'il ti'j, ex qa tu'n kyten kox, ex qa b'yo'n tu'n kykub', ex qa tu'n tik'x we'yaj kyu'n, chi David.

30Ate Joab tuk'ix Abisai e kub' b'yonte Abner, porke tuj ju q'oj ok tuj Gabaón otoq kub' tb'yo'n Abner aju kyerman, aju Asael tb'i.

31Te tib'ajxi xi tma'n David te Joab ex kye qe xjal uk'in tu'n: Kysb'it'un ele kyxb'alune ex kyq'o'nke kyxb'alune ch'i'x twitz, ex che b'isune ti'j tkyimlen Abner. Atzunte rey David xi lpe' ti'j kax.

32Ex atzun ku'x maqu'n Abner tuj tnam Hebrón, atzunte rey ok ten oq'el kyuwxix wen ttxlaj tmuqb'il Abner, ax ikx e jaw oq' kykyaqil tnam xjal.

33Oktzun ten rey b'itzal jun b'itz te b'is ti'j Abner, ex chi kyja':

¿Tiqu'n ma kyima Abner? Ma kyima ik tza'n jun xjal at nim til,

34ex mya k'alo'n qe tq'ab'a ex mya k'alo'n qe tqana tu'n caden. Ma kyima ik tza'n in kyim jun xjal tuj kyq'ab' qe xjal b'inchal mya b'a'n, chi David tuj tb'itz.

Ax ikx qe xjal kukx e ok ten oq'el ti'j Abner.

35E je'xtzun kub'sal kywitz twitz David tu'n t-xi' ch'in twa na'nxtoq tex q'ij, atzunte David xi tma'n jun yol axix tok kyja':

—Awt Dios kub' q'onte ncastiwoye kyuwxix qa ma txi nnik'b'e'ne ch'in pan ex qa juntl ti'xti qa na'nxtoq tex q'ij.

36Kykyaqiltzun el kynik' ti'j jlu ex b'a'n ela tuj kywitz, ex tkyaqil aju in tb'incha'n rey in che tzalaj xjal ti'j.

37Tuj q'ij lu, kykyaqil aj Israel el kynik' ti'j qa ate rey minti' toklen ti'j tkyimlen Abner aju tky'ajal Ner.

38Xitzun tma'n rey kye qe xjal at kyoklen ttxlaj:

—Ja'lo b'a'n kyu'ne ma naj jun nejenel ma'xix toklen kyxol aj Israel.

39Kyja'tzun, maske aqine rey aju o jaw t-sk'o'n Dios, ex ma nna'ye minti' wipune kywitz qe tal Sarvia, ex aju ma kyb'incha, jumajx mya b'a'n jlu. Ate Qman k'ajel q'onte t-xel teju xjal ma b'inchante mya b'a'n lu.