Mika 1 - KYER?W KRONKRON（ATWDB）

AWURADE ba abebu wiase atɛn

1 Yer 26.18; Yes 1.1 AWURADE asɛm a ɛbaa Moresetni Mika nkyɛn, Yuda ahene Yotam, Ahas ne Hesekia bere so wɔ Samaria ne Yerusalem ho ni.

2Aman nyinaa, muntie!

Asase ne ne mayɛ, monyɛ aso!

Na AWURADE Nyankopɔn nyɛ ɔdansefo ntia mo,

AWURADE wɔ n’asɔrefi kronkron no mu.

3 Amos 4.13 Na hwɛ, AWURADE refi adi afi n’afa,

na wasian abetiatia asase sorɔnsorɔmmea so.

4Na mmepɔw bedwiriw wɔ n’ase,

na abon mu apaepae,

sɛ hweawa tetew ogya anim no,

te sɛ nsu a wɔahwie agu nea ɛhɔ sian.

5 Yer 23.13-14 Efi Yakob mmarato

ne Israel fi nnebɔne nti na eyi nyinaa ba,

Dɛn ne Yakob mmarato?

So ɛnyɛ Samaria?

Na dɛn ne Yuda sorɔnsorɔmmea?

So ɛnyɛ Yerusalem?

Samaria ne Yerusalem sɛe

6Enti mede Samaria mɛyɛ wuram abokuw wɔ aman anim

ne abobe atɛwee,

na mede n’abo megu obon no mu,

na mayi ne nnyinaso adi.

7 Hos 2.5, 12 Na wɔbɛbobɔ n’ahoni nyinaa,

na wɔde ogya ahyew n’ayɛyɛde nyinaa,

na mɛyɛ n’abosom adum nyinaa afo,

efisɛ aguaman apɛde na ɔde aboa ano,

na aguaman apɛde na ɛbɛsan akɔyɛ.

8Eyi nti mesu na matwa adwo,

mɛnantew a mpaboa nni mu, akɔ no adagyaw mu,

metue osu sɛ sakraman,

na madi nkɔmmɔ sɛ sohori.

9Na n’apirakuru no wontumi nsa bio;

na abedu Yuda,

abɛso me man pon ano,

adu Yerusalem.

10 2 Sa 1.20 Monnka no wɔ Gat,

munnkosu koraa;

wɔ Bet-leafra

na monyantam mfutuma mu.

11Safirfo, monsen nkɔ,

wɔ adagyaw ne aniwu mu;

Sanaanfo mfi adi;

Bet-esel retwa adwo

na obegyae w’akyi gyina;

12na Marotfo de ahoyeraw twɛn mmere pa,

efisɛ amane afi AWURADE nkyɛn aduru aba

Yerusalem kurow pon ano.

13Lakisfo, momfa teaseɛnam nsa ɔpɔnkɔ hoɔharefo;

ɛyɛ Sion babea bɔne mfiase,

sɛ mo mu na wohuu Israel mmaratode no.

14Enti wɔbɛma Moreset-gat nkradi akyɛde:

Aksib afi bedi

Israel ahene huammɔ.

15Maresafo, mede ɔdedifo foforo mɛbrɛ mo;

Adulam na Israel anuonyamfo bedu.

16Bɔ tikwaw na bɔ kwatrekwa,

w’akorɔkorɔ mma nti,

ma wo tikwaw ntrɛw sɛ opete de,

efisɛ wɔatu wo nkyɛn kɔ nnommum mu.