Sirak 6 - KYER?W KRONKRON（ATWDB）

1Nyɛ ɔtamfo, mmom yɛ ɔdɔfo,

efisɛ din bɔne de animguase ba;

na saa ara na ɛba ɔdebɔneyɛfo a ɔwɔ anontanta no so.

2Hwɛ na wantɔ ahomaso afiri mu,

na ɛbɛtetew wo sɛnea nantwinini yɛ n'ade.

3W'anuonyam bɛsɛe na w'aba asɛe;

na wobɛyɛ sɛ duwui.

4Ahomaso sɛe ne wura,

na ɛma n'atamfo serew.

Atoro ne nokware nnamfofa

5Kasapa ma nnamfo dodow,

na adɔeyɛ tɛkrɛma ma nidi dɔɔso.

6Ma wɔn a wɔpɛ w'asɛm nnɔɔso,

mmom wo fotufo nyɛ obiako wɔ nnipa apem mu.

7Sɛ wofa nnamfo a, sɔ wɔn hwɛ,

na mpɛ ntɛm nnye wɔ nni.

8Efisɛ nnamfo bi wɔ hɔ a, wɔpɛ nea eye ma wɔn ho,

nanso sɛ asɛm to wo a, wɔtwe wɔn ho.

9Nnamfo bi nso wɔ hɔ a, wɔdan yɛ atamfo,

Na wɔkeka wo ho nsɛm de gu w'anim ase.

10Nnamfo bi wɔ hɔ a, wɔne wo to nsa didi,

nanso, sɛ asɛm to wo a, wɔpo wo.

11W'ahonya bere mu wɔbɛyɛ wɔn ho sɛ w'atipɛnfo,

na wɔahyɛ w'asomfo so;

12Na sɛ wo ho kyere wo a, na wonnim wo,

wɔbɛdan wɔn ho afi wo ho.

13Twe wo ho fi w’atamfo ho,

na hwɛ wo yiye wo nnamfo ho.

14Nnamfo anokwafo yɛ hintabea pa,

Nea onya obi saa no anya adepa.

15Nnamfo anokwafo som bo kɛse

na biribiara nni hɔ a ɛne wɔn bo no sɛ.

16Nnamfo anokwafo yɛ abrabɔ mu ogyefo

na wɔn a wosuro Awurade na wonya wɔn;

17Wɔn a wosuro Awurade no,

hwehwɛ wɔn nnamfo ɔkwan pa so,

Efisɛ, sɛnea wɔte no, saa ara na wɔn nnamfo nso te.

Nyansa so nhyira

18Me ba, hyɛ wo ho so fi wo mmerante bere mu,

na wo nkwakorabere mu wobɛkɔ so ayɛ onyansafo.

19Bra ne nkyɛn sɛ obi a ofuntum asase na odua,

na twɛn otwa bere pa no,

sɛ wodua no a wobɛbrɛ kakra de,

nanso akyiri yi wobebu so aba pa.

20Ne ho yɛ ahometew ma nea onni ahohyɛso,

na ɔkwasea rentumi ne no ntena.

21Ɔbɛyɛ sɔhwɛ ama wɔn sɛ ɔbo kokroko,

na wɔbɛtow no akyene ntɛm.

22Efisɛ nyansa ne ne din sɛ

na ɛnyɛ nnipa pii na ehu no.

23Me ba, yɛ aso tie me nteɛso

na mpo m’afotu.

24Fa w’anan hyehyɛ nyansa mpokyerɛ mu

na fa wo kɔn hyɛ n’atade mu.

25Fa wo mmati kɔsoa no,

na mma ne kyerɛkyerɛ mfono wo.

26Fa wo kra nyinaa bata ne ho,

na fa w’ahoɔden nyinaa tie n’akwan.

27Hwehwɛ mu, na hwehwɛ no, na wobehu no.

na sɛ wuso no mu a, nnyae ne mu.

28Na ewiei no wobehu asomdwoe a, ɔde ma wo,

na ɔbɛma adan anigye ama wo.

29Akyiri no, ne mpokyerɛ no bɛyɛ

bammɔ dennen ama wo,

na n’adesoa no ayɛ anuonyam batakari ama wo.

30Ne kɔnnua bɛyɛ sika kɔkɔɔ adwinni,

na n'adesoa ayɛ sɛ srikyi hama.

31Wobɛhyɛ no sɛ anuonyam atade,

na wasoa no sɛ ahenkyɛw fɛfɛ.

32Me ba, sɛ wopɛ a

wubetumi ahyɛ wo ho so,

na sɛ wudi wo ho so a,

wobɛyɛ ɔbadwemma.

33Sɛ wopɛ sɛ woyɛ osetie a, wobenya nimdeɛ.

34Gyina mpanyimfo agyinatu mu,

Hena ne onyansafo? Fa wo ho bata ne ho.

35Yɛ krado sɛ wubetie nea Awurade ka biara,

na mma nyansa abebusɛm biara ntwa wo ho nkɔ.

36Sɛ wuhu ɔbadwemma bi a, sɔre ntɛm kɔsra no;

ma w’anammɔn nyɛ ntiantia wɔ n’abobow ano.

37Dwene Awurade mmara ho,

na dwene ne mmara nsɛm no ho daa nyinaa.

Na ɔno na ɔbɛma wo nhumu,

na wo nsa bɛka w'apɛde wɔ nyansa ho.