Nyansa 18 - KYER?W KRONKRON（ATWDB）

Hann Hyerɛn wɔ Israelfo so

1 Eks 13.17-22 Na mo akronkronfo de hann kɛse wɔ mo so.

Mo atamfo tee mo nne

nanso wɔanhu mo tebea,

na munyaa anigye

efisɛ moanhyia amanehunu biara,

2na wɔdaa wo kronkroni no ase

sɛ mfiase no, wɔfom wo mpo a,

woanyɛ wɔn bɔne,

na wɔsrɛɛ bɔne fakyɛ

sɛ wɔne wo ntam totoe.

3Na enti womaa wɔn ogyaframa

sɛ ɛyɛ wɔn kwankyerɛfo wɔ akwantu a wonnim hɔ kwan no so,

ne awia a ano dwo

wɔ wɔn akyinkyin akyinkyin mu.

4na wɔn atamfo de, na ɛmfata sɛ wonya hann no,

na wɔde wɔn gu afiase sum mu;

wɔn a wɔde wo mma guu afiase no

wo mma a anka wonam wɔn so

de hann a ennum da,

a ɛyɛ wo mmara no

de rema wiase no.

Misraimfo mmakan wuwu

5Bere a wɔbɔɔ wɔn tirim,

sɛ wobekunkum w'akronkronfo mma nketewa no,

wogyee ɔba biako wɔatow no akyene nkwa

na wɔn asotwe a wode maa wɔn ne sɛ

wogyee wɔn mma pii fii wɔn nsam

na wode nsuyiri kɛse sɛe wɔn nyinaa.

6Wɔkaa saa anadwo no ho asɛm

kyerɛɛ yɛn agyanom ansa,

na ama wɔadi ahurusi

wɔ ntam a wonim yiye

na wɔn werɛ hyɛ mu no.

7Na w'atreneefo nkwagye

ne w'atamfo sɛe yɛ nea

wo nkurɔfo hwɛ kwan.

8Efisɛ ɔkwan koro a wonam so twe yɛn atamfo aso no,

wonam ɛno so ara frɛ yɛn ba wo nkyɛn

de hyɛ yɛn anuonyam.

9Na wo mma akronkronfo a wofi nnipa pa mu bɔ wo afɔre komm,

na wɔde anokoro pene wo Nyame mmara no so,

sɛnea ɛbɛyɛ a ahotefo benya wɔn kyɛfa pɛpɛɛpɛ

wɔ nhyira ne ɔhaw mu;

na mpo wɔafi ase dedaw sɛ wɔreto

nananom ho ayeyi dwom.

10Nanso wɔn atamfo su basaa ne

gyegyeegye no san ba bio

na wɔn ayamhyehye benabɔ

wɔ wɔn mma ho gyigye kɔɔ baabiara.

11Na akoa ne ne wura nya asotwe pɛ

na apapahwekwa ne ɔhene amanehunu yɛ pɛ

12na wɔn nyinaa wuu owu koro no ara bi,

na wɔn afunu dodow nti wontumi nkan.

Efisɛ na ateasefo no

sua koraa sɛ wobetumi asie wɔn,

esiane sɛ prɛko pɛ ara

na wɔn mma a wɔdɔ wɔn no

afi wɔn nsa.

13Na esiane wɔn nkonyaayi nti

wɔanngye biribiara anni mpo a,

bere a wɔsɛe wɔn mmakan no de, wɔgyee too mu sɛ

wo nkurɔfo no yɛ Onyame mma.

14Efisɛ bere a dinnyɛ tumi ade nyinaa yɛ no,

na ɔhyew so ara na anadwo no fa retwam,

15Na wo nsɛm a tumi wom no,

fii adehye ahengua no anim sian

baa asase a wɔadome no so,

16Na okura w'ankasa mmara nsɛm nkrante namnam no

na obegyinae, na ɔde owu hyɛn nneɛma nyinaa mu

na bere a ogyinaa asase so no, na ne ti pem soro.

17Na mpofirim ara adaeso mu haw

huhuuhu haw wɔn pii

na akomatu a ɛnna kwan hyɛɛ wɔn so;

18na wɔhwehwee fam a

obiako da ha, na ɔfoforo da ha,

na wɔayɛ mmerɛw da owu so

wɔma wohuu nea nti a wɔrewuwu.

19Na adaeso a ɛhaw wɔn no,

bɔɔ wɔn nkae wɔ eyi ho,

na amma wɔanwu

bere a wonnim dekode a ɛma wohuu amane saa no.

Aaron mpaebɔ gye Israelfo no fi Owu mu

20 Num 16.41-50 Owu no kaa atreneefo no nso bi,

na ɔyaredɔm baa dɔm no so wɔ sare no so,

mmom abufuw no yɛɛ bere tiaa bi.

21Efisɛ ɔtreneefo bi yɛɛ ntɛm sɔre

gyinaa hɔ sɛ wɔn dikanfo;

ɔno na ɔde ne som mu akokyɛm:

Mpaebɔ ne mpata aduhuam pue bae,

ɔno na ogyinaa abufuw no ano,

na ɔmaa ɔhaw no to twae

de kyerɛɛ sɛ ɔyɛ wo somfo.

22Odii abufuw no so nkonim, nyɛ

sɛ ɔde honam mu ahoɔden anaasɛ akode tumi,

mmom ɔde ne kasa maa ɔweretɔfo no dii nkogu

na ɔtwee adwene gyinaa ntam a

ɔne yɛn agyanom kae no so.

23Na bere a nnipa awuwu

na funu deda funu so pempe no,

ɔno na ogyinaa ntam siankaa abufuw no,

na osiw no kwan wɔ ateasefo no ho.

24Na n’atade tenten no so na

wɔanya wiase nyinaa nkwagye

na agyanom anuonyam no

wɔakyerɛw no wɔ abo pon anan no so

na w’ahenni no wɔ abotiri a

ɛbɔ ne ti no so.

25Eyinom mu na ɔsɛefo no dii nkogu,

na ɔbɔɔ hu;

efisɛ sɔ ara mpo a wɔbɛsɔ

abufuw no ahwɛ no dɔɔso.