Nyansa 4 - KYER?W KRONKRON（ATWDB）

1 Sir 16.3 Eye sɛ, wonni ba na wowɔ suban pa,

efisɛ adepa wɔ nkae,

na Onyankopɔn ne adasamma nyinaa hu.

2Ɛwɔ hɔ a, nnipa sua yɛ bi

na sɛ enni hɔ nso a, wɔkae;

na bere nyinaa

ɛwɔ hɔ nkonimdi so

sɛ ahenkyɛw a ɛho nni dɛm.

3Mmom wɔn a wonnim Nyame no mma

pii ho, remma mfaso,

na wɔn asefo mu biara rennyina.

4Sɛ mpo wonya asiye a,

bere tiaa bi akyi wɔbɛhwe ase,

mframa bɛwosow wɔn,

na ahum dennen

bɛma wɔn ase atutu.

5Wɔn abaa no bebubu efi hɔ

ansa na wɔanyin,

na wɔn aba no bɛsɛe,

na ɛrennyin,

na ɛho remma mfaso.

6Efisɛ mma a wɔwo wɔn wɔ aguamammɔ mu no,

nyɛ nhwɛso pa mma wɔn awofo,

bere a Onyankopɔn bɛyɛ wɔn mu nhwehwɛmu.

Ɔtreneeni Nsɛm

7Mmom onipa trenee de,

sɛ owu ntɛm mpo a, obenya ahotɔ.

8Esiane sɛ, onyinkyɛ mu nidi

ɛnyɛ mmere tenten,

na wɔmmfa mfe dodow nsusuw.

9Mmom ntease yɛ atifi dwen so ade ma onipa biara,

na ɔbra kronkron yɛ onyinkyɛ pa.

Enok yɛ Nhwɛso

10Nnipa bi wɔ hɔ a, wɔsɔɔ Nyankopɔn ani,

na Onyankopɔn nso dɔɔ wɔn,

na bere a wɔte abɔnefo mu no,

Onyankopɔn faa wɔn kɔɔ soro.

11Wɔtwee wɔn kɔɔ soro na bɔne bi ansɛe wɔn,

anaa asisisɛm bi annaadaa wɔn kra,

12efisɛ amumɔyɛ ho akɔnnɔ

kata papayɛ so,

na adwene ntanta,

sɛe adwene pa.

13Wɔn mudi bere tiaa mu no,

ma wonyaa nkwa tenten.

14Efisɛ wɔn kra sɔɔ AWURADE ani,

nti oyii wɔn ntɛm ara fii bɔne mu.

15Nanso nkurɔfo hui nanso wɔante ase,

nanso wɔamfa no asɛm biara,

efisɛ Onyankopɔn adom ne n'ahummɔbɔ

wɔ ne mma so,

na ɔwɛn n'akronkronfo.

Atreneefo Nkonimdi

16Nnipa trenee a wɔawuwu no,

bebu abɔnefo a wɔte ase no fɔ,

na mmerante a wɔn ho nni fi,

beyi amumɔyɛ a atena akyɛ

no ho atɛn.

17Efisɛ wobehu anyansafo awiei,

na wɔrente nea AWURADE ahyehyɛ ama wɔn no ase,

ne nea enti a AWURADE koraa wɔn so.

18Abɔnefo behu na wɔn werɛ ahow,

mmom AWURADE bɛserew wɔn .

na animguase aka wɔn amu;

na wɔn awufo ho bɛyeraw wɔn afebɔɔ;

19esiane sɛ wɔbɛka wɔn wu mu afebɔɔ

na wɔrentumi nkasa,

na wɔbɛwosow wɔn fapem no ara;

na wobegya wɔn krawee koraa a anidaso biara nni mu,

na wɔn ho beguan wɔn

na wɔn ho nkae nyinaa bɛyera.

Atemmuda kɛse no

20Wɔn akoma betutu

wɔn bɔne ho akontaabu ho,

na wɔn brakyew bebu wɔn fɔ

wɔ wɔn anim.