Yesaia 60 - KYER?W KRONKRON（ATWDB）

Yerusalem daakye anigye

1Sɔre haran, na wo hann aba,

na AWURADE anuonyam apue wo so.

2Na hwɛ, esum bɛkata asase so,

na sum kabii akata aman so;

nanso AWURADE bepue wo so,

na n’anuonyam abɛda adi wo so.

3 Adi 21.24 Na amanaman bɛnantew aba wo hann no ho,

na ahene aba hyerɛn a apue wo so no ho.

4 Yes 49.18; 66.12 Ma w’ani so hwɛ wo ho hyia,

wɔn nyinaa aboa ano reba ama wo;

wo mmabanin fi akyirikyiri reba,

na wo mmabea nso, wotuturu wɔn nkyɛn mu reba.

5Ɛno na wubehu, na w’anim atew,

wo koma de ahosɛpɛw bedi ahurusi,

efisɛ ɛpo ahonyade dodow redan abɛyɛ wo de,

amanaman ahode reba wo nkyɛn.

6 Nnw 72.10; Mat 2.1-11 Yoma manyamanya bɛkata wo so,

Midian ne Efa yomaforo no;

wɔn nyinaa fi Seba reba,

sika ne aduhuam na wɔsosoe,

na wɔkeka AWURADE ayeyi.

7Wɔbɛboa Kedar nguankuw nyinaa ano abrɛ wo,

Nebaiot adwennini bɛsom wo;

wɔde anisɔ bɛforo m’afɔremuka,

na mɛhyehyɛ m’anuonyam fi no.

8Henanom ne eyinom a wotu sɛ omununkum,

ne mmorɔnoma a wɔba wɔn ahunaniankansa mu yi?

9Yiw, mpoano aman bɛtwɛn me,

Tarsis ahyɛn na ebedi kan,

na wɔde wo mma fi akyirikyiri aba

a wɔn dwetɛ ne wɔn sika ka wɔn ho,

wɔde rebrɛ AWURADE wo Nyankopɔn din,

ne Israel kronkronni no,

efisɛ ɔno na wahyɛ wo anuonyam.

10 Yes 54.7-8 Na ananafo bɛto w’afasu,

na wɔn ahene asom wo;

na m’abufuw mu na mehwee wo,

na m’adɔeyɛ mu na mahu wo mmɔbɔ.

11 Adi 21.25-26 Na wo kurow apon ano bɛda hɔ daa yi,

wɔrentoto mu awia ne anadwo,

na nkurɔfo de amanaman ahonyade abrɛ wo,

wɔne wɔn ahene a woyuw wɔn.

12Na ɔman ne ahenni

a ɛrensom wo no begu,

saa aman no, ɔsɛe na wɔbɛsɛe wɔn nyinaa.

13Lebanon anuonyam bɛba wo nkyɛn,

na apopaw ne ɔsɛsɛ ne kwabɔhɔrɔ

bɛbom ahyehyɛ me kronkronbea hɔ;

na mɛhyɛ me nan tiabea anuonyam.

14 Yes 14.2; 49.23 Na wo nhyɛsofo mma

de akotowakotow bɛba wo nkyɛn,

na w’ahiyifo nyinaa bɛba abebum wo nan ase,

na wɔafrɛ wo AWURADE kurow,

Israel kronkronni no Sion.

15Nea anka wogyaw wo na wɔtan wo

na obi bi mfa wo mu no,

mɛma wo daa kɛseyɛ

na mayɛ wo awo ntoatoaso a edidi so anigye.

16 Yes 49.23 Na wubenum amanaman nufu,

na woanum ahene mpokua;

na woahu sɛ me, AWURADE, mene w’agyenkwa

ne wo dimafo, Yakob tumfo no.

17 Yes 52.7 Kɔbere ananmu na mede sika mesi maba,

na dade ananmu na mede dwetɛ mesi maba,

na kɔbere asi nnua ananmu,

na dade asi abo ananmu.

Na mɛma asomdwoe adi wo so panyin ahwɛ wo,

na mede trenee mayɛ wo kafo.

18 Yes 26.1 Wɔrente nhyɛso nka w’asase so bio,

wɔrente ɔsɛe ne obubu nka w’ahye mu;

na wobɛfrɛ w’afasu Nkwagye,

ne wo kurow apon nso Ayeyi.

19 Yes 24.23; 30.26; Adi 21.23 Ɛnyɛ owia na ɛbɛyɛ wo hann awia bio,

na ɔhyerɛn nso, ɛnyɛ ɔsram na ɛbɛharan ama wo,

na mmom AWURADE na ɔbɛyɛ wo daa hann,

na wo Nyankopɔn ayɛ w’anuonyam.

20Wo wia rentɔ bio,

na wo sram nso renwu,

na AWURADE bɛyɛ wo daa hann,

na wo nkɔmmɔdi nna awie ɔsa.

21Na wo man de, wɔn nyinaa bɛyɛ treneefo,

wobedi asase no so akosi daa;

wɔbɛyɛ me tɛdua dubaa a afefɛw, me nsa ano adwuma

a ɛhyɛ me anuonyam.

22Nea osua koraa no bɛdan apem

na akumaa adan ɔman a ɛyɛ den.

Me, AWURADE,

mɛyɛ no ntɛm ne bere mu.