Sirak 22 - KYER?W KRONKRON（ATWDB）

Ɔkwadwofo

1Ɔkwadwofo te sɛ ɔbo a ɛho wɔ fi,

na obiara ka n’animguase ho asɛm.

2Ɔkwadwofo te sɛ sumina so fi,

obiara a ne nsa ka no, bopa fi no fi ne nsa.

Mmofra asoɔdenfo

3Ɛyɛ animguase sɛ woyɛ agya ma abofra soɔdenfo,

na ɔbabea awo ho nni mfaso.

4Ɔbabea a ɔwɔ adwene pa no

nya ne so kunu,

na nea ɔbɔ animguase bra no

hyɛ n’agya awerɛhow.

5Ɔbabea a ɔmfɛre ade no,

gu n’agya ne ne kunu anim ase,

na wɔn baanu nyinaa mpɛ n'asɛm.

6Osu bere mu nnwom nyɛ bere pa mma nkɔmmɔbɔ

nanso nkanim ne nteɛso,

yɛ nyansa ma bere nyinaa.

7Mmofra a wɔatetew wɔn ama abrabɔ pa no,

kata wɔn awofo hia so.

8Na mmofra a wɔne nkwaseafo bɔ no,

gu wɔn abusua ho fi.

Nyansasɛm ne agyimisɛm

9Nea ɔkyerɛ ɔkwasea ade no,

te sɛ obi a ɔde amane,

retare kuku a abɔ.

10Nea ɔto anasesɛm kyerɛ ɔkwasea no,

to kyerɛ ɔsabofo:

Na awiei no obebisa sɛ: Dɛn ni?

11Su ma owufo, efisɛ wagyaw hann wɔ n'akyi;

na su ma ɔkwasea, efisɛ wagyaw nimdeɛ ato hɔ;

Nni awerɛhow pii mma owufo, efisɛ ɔregye n'ahome.

Ɔkwasea bra no, na efanim owu.

12Awufo ayiyɛ no, wɔyɛ no nna nson,

nanso ɔkwasea ne nea onnim Nyame no de, wɔyɛ no daa nyinaa.

13Wone ɔkwasea nkasa pii,

na nkɔsra onipa a onni adwene;

mfa wo ho mmɔ nkwaseafo ho

anyɛ a wobenya ɔhaw,

na sɛ ɔtwe ne ho a,

mma ɛnyɛ wo yaw;

Gyaw no na wobenya ahotɔ,

na woremmrɛ wɔ n'adwene hunu ho.

14Dɛn na ɛyɛ duru sen sumpii?

Na din bɛn na wɔde frɛ no, ɛnyɛ Ɔkwasea?

15Anwea, nkyene ne dadebo

ne soa nyɛ den sɛ woso ogyimfo.

16Dua mpoma a wɔde wura dan mu no so mu pintinn,

na asasewosow mpo ntumi nhɔn no mfi hɔ;

saa ara na adwene a wosi no pi

wɔ agyinatu mu no te,

ɔhaw bere mpo no, ehu bi renka no.

17Adwene a ɛnam nyansa kwan so no,

te sɛ dan a woasiesie ho no fɛfɛɛfɛ.

18Ban a wɔagye no wɔ bepɔw so no

rentumi nnyina pintinn wɔ mframa ano;

saa ara na adwene ntanta a ɛwɔ ɔkwasea mu no,

rentumi nnyina ehu biara ano.

Ayɔnkofa ho banbɔ

19Nea ɔde ne nsa wɔ w'aniwa no,

ɔno na ɔde nusu ba,

na nea ɔtew koma no

da n'ahintasɛm adi.

20Nea ɔtow ɔbo bɔ nnomaa no,

bɔ wɔn hu ma woguan,

na nea ɔbɔ ne yɔnko adapaa no, sɛe nnamfofa.

21Sɛ mpo wotwe nkrante wɔ wo yɔnko so a,

mma wo werɛ nhow,

efisɛ nnamfofa bɛsan aba bio.

22Sɛ wokasa tia wo yɔnko a,

mma ɛnhaw wo, efisɛ nsiesie pa bɛma ayɛ yie,

Nanso adapaabɔ, ahantan, kokoamsɛm a ɛda adi, anaa nkontompotwa nneyɛe no -

eyinom bɛma adamfo abɔ hu aguan.

23Ma wo yɔnko mfa ne werɛ nhyɛ wo mu ne hia da,

na wo ne n'ani agye wɔ n'ahonya bere mu;

gyina ne ho, n’ahohia bere mu,

nea ɛbɛyɛ a wobenya n’agyapade mu kyɛfa.

24Huhuro ne wusiw di ogya anim kan;

saa ara nso na adapaatwa di mogya hwiegu anim.

25M'ani nwu sɛ mɛkora m'adamfo so,

na meremfa me ho nhintaw no;

26Nanso sɛ ɔhaw bi nam no so bɛba me so a,

obiara a ɔbɛte no bɛhwɛ ne ho yie wɔ ne ho.

Mpaebɔ a wɔde siw bɔne kwan

27Hena na ɔbɛhwɛ m’ano so,

na ɔde nsɔano a ɛfata asɔw m’anofafa,

nea ɛbɛyɛ a wɔn nti merenhwe ase,

na ama me tɛkrɛma asɛe me?