Sirak 25 - KYER?W KRONKRON（ATWDB）

Wɔn a wɔfata ayeyi

1M'ani gye nneɛma abiɛsa ho,

na ɛyɛ fɛ wɔ Awurade ne nnipa ani so,

anuanom ayɔnkofa,

nnamfo biakoyɛ,

ne awarefo a wɔte dwoodwoo.

2Mikyi nnipa horow abiɛsa,

na wɔn abrabɔ nyɛ me fɛ,

ɔsrɛsrɛfo a ɔkyerɛ ne ho,

osikani a otwa atoro,

ne ɔpanyin kwasea a ɔbɔ aguaman.

3Sɛ wo mmerantebere mu woannya hwee a;

wobɛyɛ dɛn anya biribi, wɔ wo nyin bere mu?

4Hwɛ fɛ a ɛyɛ sɛ nnipa a dwen agu wɔn atifi bu atɛn trenee,

na wɔn a wɔn ani afi no tu fo pa.

5Hwɛ! ɛyɛ fɛ, sɛ nimdeɛ

wɔ mpanyimfo tirim,

na ntease ne akwankyerɛ

wɔ hɔ ma wɔn a wohia.

6Abrabɔ mu suahu pii yɛ mpanyimfo abotri,

na wɔhoahoa wɔn ho wɔ Nyamesuro mu.

7Metumi adwene nnipa baakron bi ho a mɛfrɛ wɔn nhyira,

na nea ɔto so du no, mede me tɛkrɛma bɛbɔ ne din.

Onipa a ɔredi dɛ wɔ ne mma ho;

Onipa a ɔte ase na ohu n’atamfo asehwe;

8Ɔbarima a ɔde anigye

ne ne yere ɔbadwemma te,

ne nea ɔmma nantwi ne afurum mfuntum afuw bere,

nea ɔmfa ne tɛkrɛma nyɛ bɔne,

ne nnipa a ɔnsom nea ɔmfata

9Nea ɔwɔ adamfo pa no ani gye,

ne nea ɔkasa a atiefo yɛ aso ma no.

10Nea wahu nyansa no yɛ onipa kɛse.

Nanso obiara nni hɔ a ɔyɛ kɛse sen nea osuro Awurade.

11Awurade suro boro ade nyinaa so;

hena na yɛde no bɛto nea

okura Awurade suro mu no ho?

Bɔne bi boro so

13Kuru biara, nso nyɛ

komam kuru;

amumɔyɛ biara, nso nyɛ

ɔbea ho amumɔyɛ.

14Amanehunu biara, nyɛ amanehunu a efi nea okyi wo no hɔ!

Aweredi biara, nso nyɛ

atamfo aweredi!

15Bɔre biara nni hɔ a, ano yɛ den

sen ɔwɔ bɔre,

na abufuhyew biara nni hɔ

a ano yɛ den sen ɔbea de.

Bɔne a efi ɔbea sɛmmɔnedifo hɔ

16Mɛpɛ sɛ mene gyata ne aboa bi a ne ho yɛ hu bɛtena,

sen sɛ mene ɔbea sɛmmɔnedifo bɛtena.

17Ɔbea nsɛmmɔne sesa n'animdua,

ɛma n’anim yɛ kusuu sɛ sisi de.

18Ne kunu te ne mfɛfo mu no,

na ɛyɛ ahomegu yayaayaw.

19Amumɔyɛ biara yɛ ketewa,

sɛ wɔde to ɔbea de ho a;

ɔbɔnefo akatua mmra no so!

20Sɛnea mpanyin anammɔn te wɔ anwea mu no,

saa ara na ɔbea koko te wɔ okunu a ɔmpɛ kasa ho.

21Mma ɔbea ahoɔfɛ nsum wo afiri,

na nware ɔbea wɔ n’ahode nti.

22Sɛ ɔbea bi boa ne kunu a,

ɛde abufuhyew, mpi ne animguase ba.

23Adwenem mmɔbɔmmɔbɔ, anim kusuu,

ne komam awerɛhowdi no, ɔbea bɔne na ɔde ba.

Nsa a emu agow, nkotodwe a ayɛ mmerɛw,

fi ɔbea a ɔmma ne kunu ani nnye.

24Ɛnam ɔbea so na bɔne fii ase,

na ɔno ara nti na yenyaa owu.

25Mma nsu ntue kwan,

na mma kwan na ɔbea bɔne nkeka nea ɔpɛ.

26Sɛ ɔnyɛ nea wopɛ a,

yi no fi wo ho.