Sirak 31 - KYER?W KRONKRON（ATWDB）

Ahonya mu suban pa

1Ahonya ho apesi sɛe onipa honam,

na ɛho dadwen yi aniwa mu nna.

2Apesi ne dadwen pam nkotɔ,

na yare dennen yi aniwa mu nna.

3Osikani brɛ, nya ahode,

na sɛ ɔrehome a odi nea ɛyɛ dɛ.

4Ohiani brɛ nya abrabɔ mu ade ketewa bi,

na sɛ ɔrehome a, na ahia no,

5Nea odi sika no, wɔremmɔ no din pa,

na nea odi sika akyi no bɛyera.

6Nnipa dodow no ara na ahyia ɔhaw a efi sikapɛ mu,

na wɔn asehwe ato wɔn mpofirim.

7Ɛyɛ hintidua de ma wɔn a wogyaa wɔn ho ma no,

na ɛbɛfa ɔkwasea biara nnommum.

8Nhyira ne osikani a, wɔnnka ne ho asɛmmɔne

na onni sika akyi.

9Hena na yɛnkamfo no?

Esiane sɛ wayɛ anwonwade wɔ ne nkurɔfo mu.

10Hena na wɔasɔ no ahwɛ wɔ mu, na wɔahu no sɛ odi mu?

Wɔmma eyi nyɛ ade a ɔde bɛsɛpɛw ne ho.

Hena na onyaa kwan sɛ ɔde bɛyɛ bɔne nanso wannyɛ,

na ɔde bɛyɛ amumɔyɛde na wannyɛ?

11Ne yiyedi betim

na baguafo bɛka n’adɔe akyerɛ.

Aponto ase nneyɛe

12Wo ne atitiriwfo bi te pon ho?

Nyɛ wo ho odidifo wɔ hɔ,

na nka da sɛ: Aduan ni!

13Kae sɛ, odidifo anim taa gu ase;

Dɛn na wɔabɔ no odidifo kyɛn aniwa?

Saa nti ɔtew nusu wɔ biribiara ho.

14Nteɛ wo nsa nsrɛ biribiara a wohu,

na wo ne wo yɔnko mfom aduan wɔ asanka mu.

15Susuw wo yɔnko ho sɛ wo ara pɛ,

na adeyɛ nyinaa mu no fa adwene to ho.

16Di nea wɔde asi w’anim no,

sɛ onipa a n'ani abue,

na nnidi adifudepɛ so,

na wo ho ayɛ abufuw.

17Di kan wie adidi no,

fa kyerɛ wo suban pa,

na nyɛ sɛ wopɛ biribiara

anyɛ a wobɛfom ebinom.

18Sɛ wote nnipa pii mu a,

nni kan ntow wo nsa

ansa na wɔatow wɔn de.

19Mmere kakra mpo dɔɔso ma onipa a wɔatetew no yiye!

Ongu ahome dennen wɔ ne mpa so.

20Sɛ w'adidi yɛ kakraa bi a

wunya nna pa.

Wosɔre anɔpa a, wuhu sɛ wote apɔw.

Nna mu ɔhaw ne ateetee ne ɔbrɛ,

efi adidi ntraso

na ayamkaw, yɛ adufudepɛ kyɛfa.

21Sɛ wodidi mee, boro so a,

wosɔre fe de nya ahotɔ.

22Me ba, tie me nne, na mmu me animtiaa,

na ewiei no w’ani begye me nsɛm ho.

W'adeyɛ nyinaa mu, tɔ wo bo ase

na yare biara renka wo.

23Nnipa kamfo nea ɔtɔ ne bo ase adidi ho,

na wɔn adansedi wɔ ne nsam,

na ɛyɛ nokware turodoo.

24Kuromfo ka nea ɔpɛ aduan ho asɛm

na wɔn adansedi wɔ n'aduanni ho yɛ turodoo

Nsanom kakra

25Mfa nsanom nkyerɛ w'ahoɔden,

efisɛ nsanom asɛe nnipa pii.

26Sɛnea fononoo sɔ odwumfo adwuma hwɛ no,

saa ara na nsa sɔ koma hwɛ wɔ dwae ne ntɔkwaw ho.

27Nsa ye ma onipa sɛ

ɔnom no kakraa bi a,

Abrabɔ ne dɛn ma onipa a ɔnnom nsa?

Ɛwɔ hɔ boa onipa anigye.

28Nsanom kakra wɔ bere pa mu no,

boa komam anigye, na ɛma ɔkra nya ahomeka.

29Nsanom dodow ma sunsum mu awerɛhow,

ɛde abufuw ne ntɔkwaw ba.

30Asabow ma ɔkwasea abufuw dɔɔso na epira n'ankasa,

ehuan n’ahoɔden so na ɛma ne yaw dɔɔso.

31Nka wo yɔnko anim wɔ nsa apontow ase,

na n'anigye mu no nhyɛ no abufuw;

nka biribi nyaw no,

Mmisabisa no biribi na nhyɛ no ateetee .