Kwadwom 1 - KYER?W KRONKRON（ATWDB）

Yerusalem sɛe ne n’ahohora

1 Yer 51.5 Ao, kurow a anka emu nkurɔfo dɔɔso no,

ne nko ara te hɔ dɛn ni?

Nea anka ɔso amanaman mu no,

wayɛ sɛ okunafo.

Nea odi nsaase horow so hemmaa no,

wayɛ nea oyi tow.

2 Nnw 69.20 Osu ara na osu anadwo,

na nusu sensan n’afono so.

Onnya n’adɔfo nyinaa mu

ɔwerɛkyekyefo bi.

Ne mfɛfo nyinaa atwitwa no nkontompo,

wɔadannan no atamfo.

3Amane ne ɔsom dodow nti

Yuda atu kɔ.

Ɔte amanaman mu,

na onnya homebea.

N’atiwfo nyinaa kɔtoo no

n’ahokyere mu.

4Sion akwan no di awerɛhow,

sɛ obiara mma afahyɛ no ase nti.

N’aponkɛse nyinaa ayɛ afo.

N’asɔfo gu ahome,

ne mmabaa ayɛ mmɔbɔmmɔbɔ,

na wɔn nso werɛ ahow.

5N’ahohiafo abedi ti,

n’atamfo di yiye;

na ne mmarato dodow nti

AWURADE ahyɛ no awerɛhow:

Ne mmotafowa adi ɔtamfo anim

kɔ nnommumfa mu.

6Na Sion babea ahokeka

nyinaa aguan afi ne ho kɔ;

ne mmapɔmma ayɛ sɛ atwe

a wonnya adidibea,

wodi atiwfo anim

na wonni ahoɔden.

7 Lew 26.34-35 Yerusalem amane ne n’ahometew nna yi mu

wakae n’afɛfɛde

a ɛwɔ hɔ fi tete nna no mu no nyinaa;

ne nkurɔfo hwee ɔhohiafo nsam

na wannya ɔboafo no,

n’ahohiafo ani gyei,

na wɔserew n’asehwe no.

8 Kwa 1.17; Yer 13.22 Yerusalem ayɛ bɔne kɛse

ɛno nti na wadan asrede.

Wɔn a anka wodi no ni nyinaa to ne ho mpe,

efisɛ wɔahu n’adagyaw.

Ɔno ankasa gu ahome,

na wadan n’ani.

9N’ahohwi bra ada adi n’atade mmuano mu;

wannwene ne daakye ho,

enti n’asehwe yɛ hu;

onni ɔwerɛkyekyefo bi.

AWURADE, hwɛ m’amane,

na ɔtamfo di akokurokosɛm!

10 Deut 23.3 Ɔhohiafo no ateɛ ne nsa

n’afɛfɛde nyinaa so,

na wahu amanaman mpo,

sɛ wɔrefow ne kronkronbea hɔ ade,

nnipa a wohyɛe

sɛ wɔnnhyɛn w’asafo mu no.

Sion kwadwom ne n’adesrɛ

11Ne nkurɔfo nyinaa gu ahome

rehwehwɛ aduan.

Wɔde wɔn agyapade ma gye aduan

de hyɛ wɔn ho den.

AWURADE, hwɛ na hu,

sɛ madan ohuhuni!

12 Kwa 1.5 So ɛmfa mo a mofa ɔkwan so twam nyinaa ho bi?

Monhwɛ na munhu,

sɛ ɛyaw bi wɔ hɔ a ɛte sɛ me yaw

a wɔde aba me so yi

a AWURADE de ahow me werɛ

n’abufuhyew da no!

13Wama ogya fi soro

aduru me nnompe mu,

na edidi mu;

wasum m’anan afiri,

wama masan m’akyi.

Wama mayɛ pasaa,

meyɛ gorɔw daa adesae.

14Ɔde ne nsa

akyekyere me mmaratode ayɛ no kɔndua;

ɛtoatoa mu gu me kɔn mu,

wama m’ahoɔden atu,

AWURADE ayi me ahyɛ wɔn

a mintumi minnyina wɔn anim no nsa.

15 Yes 63.3 AWURADE atow m’akunini

a ɛwɔ me mu nyinaa agu;

ɔfrɛɛ nnipa ma wohyiaa mu hyɛɛ me,

sɛ wɔnnwerɛw me mmerante;

AWURADE atiatia Yuda babea so

sɛ wotiatia nsa-kyi-amoa mu.

16 Yer 9.1 Eyinom nti na misu;

m’aniwam kyi nusu;

na me werɛkyekyefo

a obedwudwo me kra

ne me ntam ware;

me mma ayɛ pasaa,

efisɛ ɔtamfo no adi nim.

17 Kwa 1.8 Sion atrɛw ne nsam:

Onni ɔwerɛkyekyefo bi;

AWURADE ahyɛ Yakob sɛ,

ne mfɛfo a atwa ne ho ahyia nyɛ n’atamfo;

Yerusalem adan afide wɔ wɔn ntam.

18 Kwa 3.42; 5.16 Ɔtreneeni ne ɔno AWURADE,

na me na matew n’anom asɛm ho atua.

Amansan nyinaa, muntie,

monhwɛ me yaw!

Me mmabaa ne me mmerante

kɔ nnommumfa mu.

19 Kwa 1.11 Mefrɛɛ m’adɔfo,

nanso wɔdaadaa me;

m’asɔfo ne me mpanyimfo

repɛ aduan

de ahyɛ wɔn ho den no,

wɔtotɔɔ beraw kuro no mu.

20AWURADE hwɛ m’awerɛhow yi!

M’ayamde kyinkyim;

me koma adan me yam;

efisɛ matew atua kɛse,

afoa twitwa me mma abɔnten so,

na owu nso wɔ fie.

21 Kwa 4.21 Wɔtee sɛ meresi apini;

minni ɔwerɛkyekyefo bi;

m’atamfo nyinaa ate m’amane;

wɔn ho sɛpɛw wɔn sɛ woayɛ me saa;

wobɛma ɛda a woahyɛ no adu,

na wɔn nso ayɛ sɛ me.

22Ma wɔn nnebɔne nyinaa mmra w’anim,

na yɛ wɔn

sɛnea me mmaratode nyinaa nti

woyɛɛ me no;

na m’apinisi adɔɔso,

na me koma agurow.